Kalan ida, Liurai Nabukodonozór mehi buat ida neʼebé la hanesan baibain. Neʼe halo nia laran-susar toʼo labele toba-dukur. Nia bolu siʼikdór sira no dehan: ‘Esplika haʼu-nia mehi mai haʼu.’ Sira hatán: ‘Oh liurai, favór konta Ita-Boot nia mehi.’ Nabukodonozór dehan: ‘Lae! Imi mak tenke fó-hatene haʼu-nia mehi, se lae, haʼu sei oho imi.’ Sira hatán: ‘Favór konta Ita-Boot nia mehi, depois mak ami sei esplika.’ Maibé liurai dehan: ‘Imi hotu hakarak lohi haʼu. Fó-hatene haʼu-nia mehi!’ Sira hatete: ‘La iha ema ida mak bele siʼik Ita-nia mehi.’

Nabukodonozór sai hirus tebes toʼo fó orden atu oho siʼikdór no matenek-naʼin hotu iha ninia nasaun, neʼe inklui Daniel, Sadrak, Mexak, no Abednego. Daniel husu liurai atu fó tempu uitoan. Tuirmai, nia ho ninia belun sira halo orasaun ba Jeová hodi husu ajuda. Saida mak Jeová halo?

Liuhusi vizaun ida, Jeová hatudu Nabukodonozór nia mehi no ninia signifikadu ba Daniel. Loron tuirmai, Daniel bá hasoru liurai nia atan no dehan: ‘Keta oho matenek-naʼin no siʼikdór sira. Haʼu bele esplika liurai nia mehi.’ Atan neʼe lori Daniel ba Nabukodonozór. Daniel dehan ba liurai: ‘Maromak hatudu sai futuru ba Ita-Boot. Ita-nia mehi mak neʼe: Ita haree estátua boot ida, ninia ulun osan-mean, hirus-matan no liman osan-mutin, kabun ho kelen mak riti, ain parte leten mak besi, no ain parte kraik mak besi kahur ho rai-mean. Tuirmai, fatuk ida tesi sai tiha husi foho, no fatuk neʼe kona estátua nia ain. Estátua neʼe rahun, no anin lori hotu ninia uut. Fatuk neʼe sai foho boot ida toʼo halo nakonu mundu.’

Daniel esplika: ‘Ulun neʼebé halo husi osan-mean mak Ita-Boot nia ukun. Parte osan-mutin mak ukun ida tuirmai. Depois neʼe, sei iha ukun ida neʼebé hanesan riti, neʼebé sei domina mundu tomak. Ukun tuirmai fali mak metin no forsa hanesan besi. Ukun ida ikus mak parte balu forte hanesan besi no parte balu fraku hanesan rai-mean. Fatuk neʼebé ikusmai sai foho mak Maromak nia Ukun. Ida-neʼe sei harahun ukun sira-neʼe hotu no metin ba nafatin.’

Nabukodonozór hakruʼuk ho oin ba rai no dehan ba Daniel: ‘Ó-nia Maromak mak hatudu sai mehi neʼe ba ó. La iha Maromak ida mak hanesan ó-nian.’ Tuirmai, duké oho Daniel, Nabukodonozór foti nia atu sai xefe ba matenek-naʼin hotu no nuʼudar ukun-naʼin iha Babilónia. Jeová hatán duni Daniel nia orasaun, loos ka lae?

Lakleur depois Liurai Nabukodonozór mehi kona-ba estátua, nia halo estátua boot ida husi osan-mean. Nia tau ida-neʼe iha rai-tetuk Dura no haruka ema-boot barak, inklui Sadrak, Mexak, no Abednego atu halibur iha estátua neʼe nia oin. Liurai dehan: ‘Kuandu imi rona dikur, arpa no flauta nia lian, imi tenke hakruʼuk ba estátua neʼe! Ema neʼebé lakohi hakruʼuk tenke soe tiha ba fornu neʼebé ahi lakan makaʼas.’ Mane joven Ebreu naʼin-tolu neʼe sei hakruʼuk hodi adora estátua neʼe, ka sira adora deʼit Maromak Jeová?

Liurai haruka ema atu toka múzika. Ema hotu hakruʼuk hodi adora estátua, só deʼit Sadrak, Mexak, no Abednego mak lae. Ema balu nota no hatete ba liurai: ‘Mane Ebreu naʼin-tolu neʼe lakohi adora Ita-nia estátua.’ Nabukodonozór bolu sira naʼin-tolu, no dehan: ‘Haʼu sei fó oportunidade ida tan ba imi atu adora estátua. Se imi lakohi, haʼu sei soe imi ba ahi. La iha maromak ida mak bele salva imi.’ Sira hatán: ‘Liurai lalika fó oportunidade mai ami. Ami-nia Maromak bele salva ami husi ahi laran. Maski nia la salva ami mós, ami sei la adora estátua.’

Nabukodonozór sai hirus tebes. Nia dehan ba ninia atan sira: ‘Halo fornu nia ahi lakan makaʼas liu dala hitu!’ Tuirmai, nia dehan ba soldadu sira: ‘Kesi metin sira no soe ba ahi!’ Fornu neʼe manas tebetebes. Tan neʼe bainhira soldadu sira hakbesik ba fornu neʼe atu soe joven naʼin-tolu, soldadu sira-neʼe mate kedas. Joven naʼin-tolu neʼe monu iha ahi. Maibé kuandu Nabukodonozór hateke ba fornu laran, nia haree ema naʼin-haat laʼo iha laran, laʼós naʼin-tolu. Nia sai taʼuk no husu ba ema-boot sira: ‘Ita soe ema naʼin-tolu ba ahi, loos ka lae? Haʼu haree naʼin-haat, no sira ida haree hanesan anju!’

Nabukodonozór hakbesik ba fornu no bolu: ‘Sai mai, imi neʼebé Maromak Boot Liu nia atan!’ Ema hotu hakfodak hodi haree katak Sadrak, Mexak, no Abednego laʼo sai husi ahi ho isin-lolon tomak. Sira-nia isin, fuuk, no roupa la sai motuk, no la kona mós ahi-suar nia iis.

Nabukodonozór dehan: ‘Sadrak, Mexak, no Abednego nia Maromak mak boot duni. Nia haruka ninia anju atu salva sira. La iha maromak ida mak hanesan sira-nian.’

Hanesan ho mane Ebreu naʼin-tolu neʼe, ó mós laran-metin nafatin ba Jeová maski hasoru susar naran deʼit ka lae?