Kalan ida, Nabukodonozór hetan mehi ida neʼebé halo nia taʼuk. Nia bolu ninia matenek-naʼin sira atu esplika mehi neʼe katak sá, maibé la iha ida mak bele esplika. Ikusmai, liurai koʼalia ho Daniel.

Nabukodonozór dehan ba Daniel: ‘Haʼu mehi kona-ba ai-hun ida. Ai-hun neʼe sai aas tebes toʼo lalehan no ema hotu iha mundu bele haree. Ai-hun neʼe iha tahan kapás no fó fuan barak. Animál sira deskansa iha ninia mahon, no manu sira halo knuuk iha ninia sanak. Tuirmai, anju ida tun husi lalehan no dehan: “Tesi tiha ai-hun neʼe, no mós ninia sanak sira. Maibé husik hela ninia hun rohan no abut, no bobar metin ho besi no riti. Ai-hun neʼe nia laran sei troka husi ema nia laran hodi sai fali animál nia laran no husik toʼo tempu hitu liu tiha. Ema hotu sei hatene katak Maromak mak Ukun-Naʼin no nia bele entrega ukun ba ema naran deʼit neʼebé nia hakarak.”’

Jeová fó sai mehi neʼe nia signifikadu ba Daniel no nia sai taʼuk. Daniel dehan: ‘Oh liurai, haʼu hein katak mehi neʼe mak kona-ba Ita-nia inimigu sira, maibé loloos neʼe kona-ba Ita-Boot. Ai-hun neʼebé tesi tiha mak Ita-Boot. Ita sei lakon Ita-nia ukun, no sei han duʼut iha rai hanesan animál fuik. Maibé, tanba anju neʼe hatete atu husik ai neʼe nia hun no abut, Ita-Boot sei sai fali liurai.’

Liutiha tinan ida, Nabukodonozór laʼo iha uma-leten iha ninia palásiu, no kontente haree sidade Babilónia. Nia dehan: ‘Haree toʼok sidade furak neʼebé haʼu harii. Haʼu mak liurai boot liu hotu!’ Kuandu nia koʼalia hela, nia rona lian ida husi lalehan, dehan: ‘Nabukodonozór! Agora ó sei la ukun tan.’

Iha tempu neʼe kedas, Nabukodonozór sai bulak no hatudu hahalok hanesan animál fuik. Ema duni sai nia husi ninia palásiu no nia moris hamutuk ho animál fuik sira iha rai-luan. Ninia fuuk sai naruk hanesan makikit nia fulun, no ninia liman-kukun no ain-kukun hanesan manu nian.

Liutiha tinan hitu, Nabukodonozór sai diʼak fali no Jeová halo nia sai liurai iha Babilónia. Ikusmai Nabukodonozór dehan: ‘Haʼu hahiʼi Jeová, Liurai lalehan nian. Agora haʼu hatene, Jeová mak Ukun-Naʼin Boot. Nia hamoe ema foti an, no entrega ukun ba ema naran deʼit neʼebé nia hakarak.’

Ikusmai, Belsazar mak sai liurai iha Babilónia. Kalan ida, nia konvida ema-boot rihun ba rihun no halo festa. Nia haruka ninia atan atu lori kopu osan-mean neʼebé Nabukodonozór foti husi Jeová nia templu. Belsazar no ninia bainaka sira hemu tua husi kopu sira-neʼe no fó hahiʼi ba sira-nia maromak. Derrepente liman ida mosu no komesa hakerek liafuan balu iha didin-lolon.

Belsazar sai taʼuk tebes. Nia bolu siʼikdór sira no promete: ‘Se imi ida hatene esplika liafuan sira-neʼe, haʼu sei foti nia sai ema-boot terseiru iha Babilónia.’ Siʼikdór sira koko, maibé la iha ida mak bele esplika. Liurai-feto mai no hatete: ‘Iha tempu uluk, mane ida naran Daniel sempre esplika mehi ba Nabukodonozór. Nia bele esplika liafuan sira-neʼe.’

Daniel bá hasoru Liurai Belsazar. Liurai dehan: ‘Se ó bele lee no esplika liafuan sira-neʼe, haʼu sei fó korrente osan-mean ba ó no halo ó sai ema-boot terseiru iha Babilónia.’ Daniel dehan: ‘Liurai lalika fó prezente mai haʼu, maibé haʼu sei fó-hatene Ita-Boot liafuan neʼe katak sá. Ita-nia aman Nabukodonozór foti an, maibé Jeová hamoe nia. Ita-Boot hatene buat hotu neʼebé akontese ba nia, maibé la respeitu Maromak Jeová hodi hemu tua husi kopu osan-mean neʼebé foti husi Ninia templu. Tan neʼe, Maromak hakerek liafuan: Mene, Mene, Tekel, no Parsin. Neʼe katak Média no Pérsia mak sei manán Babilónia, no Ita sei la sai tan liurai.’

Ema barak hanoin katak ema nunka bele manán sidade Babilónia tanba moru mahar no mota kleʼan mak haleʼu. Maibé iha kalan neʼebá, ema Média no Pérsia ataka sidade neʼe. Liurai Ciro husi rai-Pérsia halo bee-dalan atu mota neʼe suli ba fatin seluk, hodi nuneʼe ninia tropa bele laʼo toʼo sidade nia portaun. Bainhira sira toʼo, portaun sira loke hela! Tropa sira tama, manán sidade neʼe, no oho liurai. Ciro mak sai fali ukun-naʼin ba Babilónia.

La toʼo tinan ida, Ciro fó sai lia-menon: ‘Jeová haruka haʼu atu harii fali ninia templu iha Jeruzalein. Ninia povu neʼebé hakarak bá ajuda, bele bá.’ Tan neʼe, liutiha tinan 70 depois Jeruzalein naksobu, ema Judeu barak fila fali ba sira-nia rai hanesan Jeová promete nanis ona. Ciro mós fó fali kopu osan-mean no osan-mutin, no sasán oioin neʼebé Nabukodonozór foti husi templu. Jeová uza Ciro atu ajuda Ninia povu.