Maizumenus tinan 70 liu ona husi tempu neʼebé ema Izraél fila fali ba Jeruzalein, sei iha ema Izraél balu neʼebé nafatin hela iha área oioin iha Pérsia. Ema ida mak amlulik Ezras neʼebé hanorin Jeová nia Ukun-Fuan. Bainhira Ezras rona katak povu iha Jeruzalein la halo tuir Ukun-Fuan, nia hakarak bá atu ajuda sira. Liurai Pérsia naran Artaxerxes dehan ba nia: ‘Maromak fó ona matenek ba ó atu hanorin ninia Ukun-Fuan. Tan neʼe, bá Jeruzalein hamutuk ho ema neʼebé hakarak bá ho ó.’ Ezras halibur ema hotu neʼebé hakarak atu fila fali ba Jeruzalein. Sira halo orasaun ba Jeová atu tau matan ba sira durante sira-nia viajen neʼebé naruk. Tuirmai sira bá.

Fulan haat liu tiha, sira toʼo iha Jeruzalein. Ulun-naʼin sira iha Jeruzalein dehan ba Ezras: ‘Ema Izraél sira la halo tuir Jeová no kaben ho feto sira neʼebé adora maromak falsu.’ Ezras halo saida? Iha povu nia oin, Ezras hakneʼak no halo orasaun: ‘Jeová, Ita halo ona buat barak mai ami, maibé ami halo sala hasoru Ita.’ Povu mós arrepende sira-nia sala, maibé sira presiza ajuda atu bele halo buat neʼebé loos. Ezras hili katuas no juís sira atu ajuda povu. Durante fulan tolu, ema Izraél haruka sai ema neʼebé la adora Jeová.

Tinan 12 liu tiha, moru neʼebé haleʼu Jeruzalein harii fali ona. Tan neʼe, Ezras halibur povu iha fatin públiku atu nia bele lee Maromak nia Ukun-Fuan ba sira. Bainhira Ezras loke livru Ukun-Fuan, povu hotu hamriik. Ezras fó hahiʼi ba Jeová no sira foti saʼe sira-nia liman atu hatudu katak sira apoia. Ezras lee no esplika Maromak nia Ukun-Fuan no povu rona ho didiʼak. Sira hatene katak sira halo ona sala hasoru Jeová no sira tanis. Iha loron tuirmai, Ezras lee tan Ukun-Fuan ba sira. Sira aprende katak lakleur tan sira presiza selebra Festa Barraka. Tan neʼe sira komesa prepara ba festa neʼe.

Durante loron hitu iha festa neʼe, povu haksolok no fó agradese ba Jeová tanba haraik bensaun ba sira-nia toʼos. Husi Josué nia tempu, ema seidauk halaʼo Festa Barraka iha dalan neʼebé furak hanesan neʼe. Depois festa neʼe, povu halibur hamutuk no halo orasaun: ‘Oh Jeová, Ita-Boot salva ami husi moris nuʼudar atan, Ita fó hahán mai ami iha rai-fuik maran, no mós fó rai neʼebé diʼak. Maibé ami kontra beibeik Ita. Ita haruka profeta sira atu fó avizu ba ami, maibé ami la rona. Maski nuneʼe, Ita pasiénsia nafatin. Ita la haluha Ita-nia promesa ba Abraão. Agora ami promete atu halo tuir Ita.’ Sira hakerek sira-nia promesa, no ulun-naʼin, ema Levi, no amlulik sira tau sira-nia selus ba ida-neʼe.

Durante Ezras nia tempu, iha mane Izraél ida naran Neemias neʼebé hela iha sidade Susan iha rai-Pérsia no serbí Liurai Artaxerxes. Neemias nia maun mai husi Judá no lori informasaun la diʼak ba nia: ‘Povu iha Jeruzalein la seguru. Sidade nia moru no portaun sira neʼebé uluk ema Babilónia harahun seidauk harii fali.’ Neemias sente triste tebes. Nia hakarak bá Jeruzalein atu ajuda, tan neʼe nia halo orasaun atu liurai bele fó lisensa ba nia.

Loron ida, liurai nota katak Neemias triste. Liurai dehan: ‘Haʼu nunka haree ó triste hanesan neʼe. Tanbasá ó triste?’ Neemias dehan: ‘Haʼu triste tanba sidade Jeruzalein rahun hela.’ Liurai husu: ‘Entaun, ó hakarak saida?’ Neemias halo kedas orasaun iha laran. Tuirmai nia dehan: ‘Favór ida, husik haʼu bá Jeruzalein atu harii sidade nia moru sira.’ Liurai Artaxerxes fó lisensa ba Neemias no mós halo arranju atu Neemias bele toʼo iha Jeruzalein ho seguru. Nia mós hili Neemias nuʼudar governadór ba Judá no fó ai ba Neemias atu halo portaun.

Bainhira Neemias toʼo iha Jeruzalein, nia haree didiʼak moru sira. Tuirmai, nia bolu amlulik no ukun-naʼin sira no dehan: ‘Situasaun iha Jeruzalein aat tebes. Ita presiza hadiʼa fali.’ Ema hotu apoia no komesa harii fali moru.

Maibé inimigu sira goza ema Izraél no dehan: ‘Asu-fuik deʼit mós bele halo monu moru neʼebé imi harii daudaun.’ Serbisu-naʼin sira kontinua harii moru maski ema goza. Moru aumenta aas no sai metin liután.

Tuirmai inimigu sira buka dalan seluk atu fó susar ba ema Izraél. Sira planu atu ataka Jeruzalein. Bainhira ema Izraél rona kona-ba planu neʼe, sira sai taʼuk. Maibé Neemias dehan: ‘Keta taʼuk. Jeová hamutuk ho ita.’ Neemias hili guarda sira atu proteje serbisu-naʼin, no inimigu sira labele ataka sira.

Ema Izraél harii hotu moru no portaun sira durante loron 52 deʼit. Neemias bolu ema Levi hotu bá Jeruzalein atu selebra ida-neʼe. Nia organiza sira ba grupu rua atu kanta. Grupu rua neʼe saʼe ba moru leten, no tuirmai laʼo fahe malu hodi haleʼu sidade neʼe. Sira huu trombeta, toka simbala, arpa, no kanta ba Jeová. Ezras laʼo ho grupu ida no Neemias laʼo ho grupu seluk toʼo sira hasoru malu iha templu. Ema hotu, mane, feto, no labarik, hasaʼe sakrifísiu ba Jeová no halo selebrasaun. Ema husi fatin dook bele rona sira-nia lian haksolok.