Tinan 400 liu ona husi tempu neʼebé moru Jeruzalein harii fali. Amlulik ida naran Zacarias no ninia feen Isabel hela besik sidade Jeruzalein. Sira kaben ona ba tinan barak, maibé seidauk iha oan. Loron ida, bainhira Zacarias sunu insensu iha fatin santu iha templu, anju Gabriel mosu ba nia. Zacarias sente taʼuk, maibé Gabriel dehan: ‘Keta taʼuk. Haʼu lori liafuan diʼak husi Jeová. Ó-nia feen Isabel sei tuur-ahi oan-mane ida no ó tenke hanaran nia João. Jeová hili ona João atu halo knaar espesiál ida.’ Zacarias dehan: ‘Oinsá haʼu bele fiar? Haʼu katuas ona no haʼu-nia feen mós ferik ona.’ Gabriel dehan: ‘Maromak haruka haʼu atu hatoʼo liafuan diʼak neʼe. Maibé tanba ó la fiar, ó sei sai monok toʼo bebé neʼe moris.’

Zacarias kleur loos iha fatin santu nia laran. Tan neʼe, bainhira nia sai ba liʼur, ema neʼebé hein iha liʼur hakarak hatene saida mak akontese. Zacarias halo sinál ho ninia liman deʼit tanba nia sai monok ona. Tuirmai sira rekoñese katak Zacarias simu lia-menon husi Maromak.

Ikusmai, Isabel sai isin-rua no tuur-ahi oan-mane ida hodi tuir duni buat neʼebé anju fó sai. Isabel nia belun no família sira mai atu haree bebé neʼe. Sira sente kontente tebes. Isabel dehan: ‘Ninia naran João.’ Maibé sira dehan: ‘La iha ema ida iha ó-nia família neʼebé naran João. Hanaran deʼit Zacarias, hanesan ninia aman.’ Maibé Zacarias hakerek: ‘Ninia naran mak João.’ Iha tempu neʼe kedas, Zacarias bele koʼalia fali! Ema hotu iha Judeia komesa rona kona-ba neʼe no sira hanoin: ‘Labarik neʼe sei sai ema hanesan saida?’

Tuirmai, Zacarias sai nakonu ho espíritu santu no dehan: ‘Fó hahiʼi ba Jeová neʼebé promete ba Abraão katak Nia sei haruka salvadór ida, katak Mesias, atu salva ita. João sei sai profeta ida, no nia sei prepara dalan ba Mesias.’

Buat espesiál ida mós akontese ba Isabel nia família ida naran Maria. Ita sei aprende kona-ba neʼe iha istória tuirmai.

Isabel iha família ida naran Maria. Maria hela iha sidade Nazaré iha Galileia no troka prenda ona ho badaen-ai ida naran José. Bainhira Isabel isin-rua ba fulan neen ona, anju Gabriel mosu ba Maria no dehan: ‘Maria, ó halo Jeová nia laran kontente.’ Maria la komprende tanbasá Gabriel koʼalia hanesan neʼe. Gabriel dehan ba Maria: ‘Ó sei sai isin-rua no tuur-ahi oan-mane ida, no ó tenke hanaran nia Jesus. Nia sei sai Liurai, no ninia Ukun sei iha ba nafatin.’

Maria dehan: ‘Haʼu seidauk hola mane. Oinsá haʼu bele iha oan?’ Gabriel hatán: ‘Ba Maromak buat hotu bele deʼit. Espíritu santu sei tun ba ó no ó sei sai isin-rua oan-mane ida. Ó-nia família Isabel mós isin-rua maski nia ferik ona.’ Maria dehan: ‘Haʼu mak Jeová nia atan-feto. Hein katak buat neʼebé Ita koʼalia sei sai loos.’

Maria bá vizita Isabel iha área foho. Bainhira Maria kumprimenta Isabel, bebé iha Isabel nia knotak book an makaʼas. Nakonu ho espíritu santu, Isabel dehan: ‘Maria, Jeová haraik ona bensaun ba ó. Haʼu kontente tanba Mesias nia inan mai vizita haʼu.’ Maria dehan: ‘Haʼu fó hahiʼi ba Jeová ho laran tomak.’ Maria hela ho Isabel durante fulan tolu no tuirmai nia fila fali ba Nazaré.

Bainhira José hatene katak Maria isin-rua, nia hakarak hakotu sira-nia relasaun. Maibé anju ida mosu ba José iha mehi no dehan: ‘Keta taʼuk atu kaben ho Maria. Nia la halo sala ida.’ Tan neʼe, José kaben ho Maria.