Ukun-naʼin Roma, César Augusto, haruka ema Judeu hotu atu fila fali ba sira ida-idak nia sidade atu tau naran. Tan neʼe, José no Maria fila ba José nia sidade Belein. Iha tempu neʼebá, Maria besik ona atu tuur-ahi.

Bainhira sira toʼo Belein, sira la hetan fatin atu hela, tan neʼe sira toba iha animál nia luhan. Iha neʼebá mak Maria tuur-ahi Jesus. Nia falun Jesus ho hena no hatoba iha animál nia han-fatin.

Iha kalan neʼebá, bibi-atan balu hein sira-nia bibi iha rai-luan besik Belein. Derrepente deʼit anju ida mosu ba sira, no Jeová nia glória nabilan haleʼu sira. Bibi-atan sira sai taʼuk, maibé anju dehan: ‘Keta taʼuk. Haʼu fó sai liafuan diʼak ba imi. Ohin Mesias moris ona iha Belein.’ Tuirmai, anju barak mosu iha lalehan no dehan: ‘Glória ba Maromak iha lalehan no dame iha rai.’ Tuirmai anju sira lakon. Saida mak bibi-atan sira sei halo?

Bibi-atan sira hatete ba malu: ‘Mai ita bá Belein.’ Sira bá kedas no hasoru José, Maria no mós sira-nia bebé iha animál nia luhan.

Kuandu bibi-atan sira konta fali buat neʼebé anju dehan, ema hotu neʼebé rona hakfodak. Maria hanoin didiʼak kona-ba anju nia liafuan no nunka haluha ida-neʼe. Bibi-atan sira fila fali atu tau matan ba sira-nia bibi. Sira fó agradese ba Jeová kona-ba buat neʼebé sira haree no rona.

Ema iha área Leste fiar katak fitun bele fó sinál. Kalan ida mane balu husi área Leste haree naroman hanesan fitun ida neʼebé muda an, no sira laʼo tuir fitun neʼe. “Fitun” neʼe lori sira bá Jeruzalein. Sira hatene labarik ida sei sai ema Judeu nia liurai. Entaun sira husu ema kona-ba labarik neʼe iha neʼebé, tanba sira hakarak hakruʼuk ba nia.

Bainhira Liurai Herodes neʼebé ukun Jeruzalein rona kona-ba liurai foun neʼe, nia hanoin barak. Nia husu amlulik sira: ‘Liurai neʼe moris iha neʼebé?’ Sira hatete: ‘Profeta sira dehan nia sei moris iha Belein.’ Tan neʼe Herodes bolu mane sira husi área Leste no hatete: ‘Bá Belein no buka labarik neʼe. No fó-hatene fali haʼu, nia iha neʼebé. Haʼu mós hakarak hakruʼuk ba nia.’ Maibé Herodes bosok.

“Fitun” neʼe komesa muda fali. Mane sira-neʼe laʼo tuir toʼo Belein. “Fitun” neʼe para iha uma ida nia leten, no mane sira-neʼe tama ba uma laran. Sira haree Jesus no ninia inan Maria. Sira hakneʼak no hakruʼuk ba labarik neʼe, no fó prezente osan-mean, olíbanu, no mirra. Jeová mak haruka mane sira-neʼe vizita Jesus ka lae? Lae.

Iha kalan neʼebá, Jeová koʼalia ba José liuhusi mehi ida: ‘Herodes hakarak oho Jesus. Lori ó-nia feen no ó-nia oan halai ba Ejitu. Hela iha neʼebá toʼo haʼu dehan ba ó katak situasaun seguru ona.’ José no ninia família bá kedas Ejitu.

Jeová dehan ba mane sira husi área Leste atu labele fila fali ba Herodes. Entaun sira la fila fali no neʼe halo Herodes hirus tebes. Tanba nia labele hetan Jesus, nia haruka ema atu oho labarik-mane hotu iha Belein neʼebé idade hanesan Jesus. Maibé Jesus seguru ona iha Ejitu.

Ikusmai Herodes mate. Jeová koʼalia ba José: ‘Agora imi bele fila fali.’ José, Maria, no Jesus fila fali ba Izraél no hela iha sidade Nazaré.