José no Maria hela iha Nazaré hamutuk ho Jesus no sira-nia oan-mane no oan-feto seluk. José serbisu nuʼudar badaen-ai atu tau matan ba ninia família, no nia hanorin sira kona-ba Jeová no Jeová nia Ukun-Fuan. Sira bá beibeik sinagoga atu adora Maromak, no tinan-tinan sira bá Jeruzalein atu tuir Festa Páskua.

Bainhira Jesus tinan 12, nia ho ninia família halo viajen ba Jeruzalein tuir sira-nia toman. Sidade neʼe rame tebes tanba ema barak mak bá atu selebra Festa Páskua. Depois festa neʼe, José no Maria halo viajen atu fila ba Nazaré, no sira hanoin katak Jesus mós hamutuk ho sira. Maibé kuandu sira buka nia, sira la hetan.

Sira fila fali ba Jeruzalein no buka Jesus durante loron tolu. Ikusmai, sira bá templu. Sira haree katak Jesus tuur hamutuk ho mestre sira hodi rona didiʼak no husu pergunta oioin. Mestre sira-neʼe hakfodak tebes ho Jesus nia matenek, no sira komesa husu pergunta ba nia. Bainhira sira rona Jesus nia resposta, sira admira tanba Jesus komprende didiʼak Jeová nia Ukun-Fuan.

José no Maria hanoin barak tebes. Maria dehan: ‘Oan, ami buka ó iha fatin hotu. Ó bá deʼit neʼebé?’ Jesus hatán: ‘Apá no amá la hatene ka? Haʼu iha haʼu-nia Aman nia uma.’

Tuirmai sira fila fali ba Nazaré. José hanorin Jesus kona-ba oinsá atu halo serbisu nuʼudar badaen-ai. Tuir ó-nia hanoin, Jesus mak labarik hanesan saida? Nuʼudar Jesus sai boot, nia sai matenek liután no halo kontente Maromak no ema.

Zacarias no Isabel nia oan João sai profeta ida. Jeová uza João atu hanorin povu katak Mesias sei mosu mai. João la hanorin ema iha sinagoga ka iha sidade sira, maibé nia hanorin iha rai-fuik. Ema barak husi Jeruzalein no Judeia mak bá atu aprende husi nia. Nia hanorin katak se sira hakarak halo Maromak kontente, sira presiza husik tiha hahalok neʼebé aat. Ema barak arrepende sira-nia sala, no João fó batizmu ba sira iha Mota Jordaun.

João moris simples. Ninia roupa halo husi kuda-kamelu nia fulun, no nia han gafañotu no bani-been. Ema hakarak hatene kona-ba nia. Ema Farizeu no ema Saduseu sira neʼebé foti an mós bá atu hasoru nia. João dehan ba sira: ‘Imi tenke troka imi-nia hahalok no arrepende an. Keta hanoin katak imi mak ema neʼebé espesiál liu tan deʼit imi Abraão nia bei-oan. Neʼe la dehan katak imi mak Maromak nia oan.’

Ema barak husu ba João: ‘Ami presiza halo saida atu halo Maromak kontente?’ João hatán: ‘Se imi iha roupa tahan rua, fó ida ba ema neʼebé presiza.’ Ó hatene tanbasá João koʼalia hanesan neʼe? Nia hakarak sira hatene katak atu halo Maromak kontente, sira tenke hadomi ema seluk.

João hatete ba kobradór impostu sira: ‘Hatudu laran-loos no keta lohi ema.’ Nia hatete ba soldadu sira: ‘Keta halo aat ema ida, no keta koʼalia lia-bosok.’

Amlulik no ema Levi sira mós husu ba João: ‘Ó neʼe sé? Ema hotu hakarak hatene.’ João hatán: ‘Haʼu mak lian iha rai-fuik neʼebé ajuda povu atu fila fali ba Jeová, hanesan profeta Isaias fó sai nanis ona.’

Ema barak gosta buat neʼebé João hanorin. Sira hanoin katak João mak Mesias. Maibé nia dehan ba sira: ‘Ida neʼebé boot liu haʼu sei mai. Haʼu la merese atu kore ninia sandálias talin. Haʼu fó batizmu ho bee, maibé nia sei fó batizmu ho espíritu santu.’