Maizumenus fulan-Abríl tinan 30 EC, Jesus bá Jeruzalein. Ema barak mós bá sidade neʼe atu selebra Páskua. Durante selebrasaun neʼe, sira hasaʼe animál nuʼudar sakrifísiu iha templu. Ema balu lori kedas animál, maibé ema balu sosa deʼit iha Jeruzalein.

Bainhira Jesus bá templu, nia haree ema faʼan animál sira iha neʼebá. Sira fila-liman iha fatin atu adora Jeová. Jesus sai hirus. Nia uza tali atu halo xikote hodi duni sai bibi no karau sira husi templu. Nia baku fila meza neʼebé ema uza atu troka osan no halo sira-nia osan-besi namkari ba rai. Jesus dehan ba ema sira neʼebé faʼan manu-pombu: ‘Lori sai tiha buat sira-neʼe! Keta halo haʼu-nia Aman nia uma sai fali fatin atu fila-liman!’

Ema iha templu admira ho buat neʼebé Jesus halo. Ninia dixípulu sira hanoin-hetan profesia kona-ba Mesias neʼebé dehan: ‘Haʼu sei hatudu laran-manas ba Jeová nia uma.’

Iha tinan 33 EC, dala ida tan Jesus duni sai ema neʼebé fila-liman iha templu. Nia lakohi ema ida atu la hatudu respeitu ba ninia Aman nia uma.

Liutiha tempu balu husi Festa Páskua, Jesus no ninia dixípulu sira halo viajen ba Galileia liuhusi Samaria. Jesus deskansa uitoan iha fatin neʼebé bolu nuʼudar Jacob nia bee-posu, besik sidade Sikar. Ninia dixípulu sira bá sidade atu sosa hahán.

Feto ida mai atu kuru bee. Jesus dehan ba nia: ‘Fó bee mai haʼu atu hemu.’ Feto neʼe hatete: ‘Tanbasá Ita koʼalia ho haʼu? Haʼu mak feto Samaria. Ema Judeu lakohi koʼalia ho ema Samaria.’ Jesus dehan: ‘Se ó hatene haʼu mak sé, ó sei husu bee mai haʼu no haʼu sei fó bee moris nian.’ Feto neʼe husu: ‘Neʼe katak sá? Ita la iha balde atu kuru bee.’ Jesus dehan: ‘Ema neʼebé hemu bee neʼebé haʼu fó sei nunka hamrook tan.’ Feto neʼe dehan: ‘Señór, fó bee neʼe mai haʼu.’

Jesus dehan ba feto neʼe: ‘Lori ó-nia laʼen mai.’ Feto neʼe hatán: ‘Haʼu la iha laʼen.’ Jesus dehan: ‘Ó koʼalia loos. Ó kaben dala lima ona, no agora ó moris hamutuk ho mane neʼebé laʼós ó-nia laʼen.’ Feto neʼe dehan: ‘Haʼu fiar Ita mak profeta ida. Ami fiar katak bele adora Maromak iha foho neʼe, maibé ema Judeu dehan ita bele adora Maromak só deʼit iha Jeruzalein. Haʼu fiar kuandu Mesias mai, nia sei hanorin ami kona-ba oinsá atu adora Maromak.’ Tuirmai Jesus fó sai ba feto neʼe buat neʼebé nia seidauk fó sai ba ema seluk: ‘Haʼu mak Mesias.’

Feto neʼe bá lalais sidade no fó-hatene ba ema Samaria: ‘Haʼu hanoin, haʼu hetan ona Mesias. Nia hatene buat hotu kona-ba haʼu. Mai ita bá hasoru nia!’ Sira laʼo tuir nia ba bee-posu no Jesus hanorin sira.

Ema Samaria konvida Jesus atu hela iha sira-nia sidade. Durante loron rua, nia hanorin sira, no ema barak tau fiar ba nia. Sira dehan ba feto Samaria neʼe: ‘Depois rona tiha ba mane neʼe, ami fiar katak nia mak sei salva mundu.’