Depois haklaken tiha ba tinan ida ho balu, Jesus presiza halo desizaun importante ida. Nia sei hili sé atu serbisu hamutuk ho nia? Nia sei treinu sé atu dirije kongregasaun Kristaun? Antes halo desizaun neʼe, Jesus husu Jeová nia matadalan. Jesus saʼe ba foho ida atu mesamesak no halo orasaun durante kalan tomak. Iha dadeer-saan, Jesus halibur ninia dixípulu balu no hili apóstolu naʼin-12. Ó hatene sira-nia naran ka lae? Sira-nia naran mak Pedro, André, Tiago, João, Filipe, Bartolomeu, Tomé, Mateus, Alfeu nia oan-mane Tiago, Tadeu, Simão, no Judas Iscariotes.

Apóstolu naʼin-12 neʼe halo viajen hamutuk ho Jesus. Depois nia treinu tiha sira, nia haruka sira bá haklaken. Jeová fó ba sira kbiit atu duni sai anju aat no kura ema moras.

Jesus haree sira naʼin-12 nuʼudar ninia belun no tau fiar ba sira. Ema Farizeu hanoin katak apóstolu sira mak ema baibain deʼit neʼebé la eskola. Maibé Jesus fó treinu ba sira atu kumpre sira-nia knaar. Sira hamutuk ho Jesus iha tempu neʼebé importante liu, hanesan antes Jesus mate no depois Jesus moris hiʼas. Hanesan Jesus, apóstolu barak mai husi Galileia, no sira balu mak kaben-naʼin.

Apóstolu sira mós la perfeitu no halo sala. Dala ruma sira koʼalia antes hanoin uluk, halo desizaun neʼebé la diʼak, no la hatudu pasiénsia. Sira mós diskute malu kona-ba sé mak boot liu. Maski nuneʼe, sira mak ema diʼak neʼebé hadomi Jeová. Depois Jesus saʼe ba lalehan, sira sai ema primeiru neʼebé forma kongregasaun Kristaun.

Depois hili tiha apóstolu naʼin-12, Jesus laʼo ba fatin neʼebé ema barak halibur iha foho ida. Ema sira-neʼe husi Galileia, Judeia, Tiro, Sidon, Síria, no Mota Jordaun nia sorin seluk. Sira lori ema neʼebé moras no ema neʼebé hetan terus husi anju aat. Jesus kura sira hotu. Tuirmai nia tuur no komesa hanorin sira. Nia esplika kona-ba buat neʼebé ita tenke halo atu sai Maromak nia belun. Ita tenke hanoin-hetan katak ita presiza Jeová nia matadalan no aprende atu hadomi nia. Maibé ita labele hadomi Maromak se ita la hadomi ema seluk. Ita tenke hatudu laran-diʼak no justisa ba ema hotu, inklui ema neʼebé la gosta ita.

Jesus dehan: ‘Labele hadomi deʼit ó-nia kolega. Ó mós presiza hadomi ema neʼebé la gosta ó no fó perdua ba ema seluk ho laran. Se ema ruma hirus ó, bá hasoru kedas nia no husu deskulpa. Halo ba ema seluk buat neʼebé ó hakarak sira halo ba ó.’

Jesus mós fó konsellu diʼak kona-ba sasán no rikusoin. Nia hatete: ‘Sai Jeová nia belun mak importante liu duké iha osan barak. Ema bele naʼok ó-nia osan, maibé labele naʼok ó-nia relasaun diʼak ho Jeová. Keta hanoin barak kona-ba buat neʼebé ó sei han, hemu, ka hatais. Haree toʼok ba manu sira. Maromak sempre fó hahán ba sira atu han. Hanoin barak labele hanaruk ó-nia moris. Hanoin-hetan, Jeová hatene buat neʼebé ó presiza.’

Ema sira-neʼe kontente rona buat neʼebé Jesus hanorin tanba la iha ema seluk neʼebé hanorin hanesan nia. Tanbasá Jesus mak mestre neʼebé diʼak? Tanba ninia hanorin mai husi Jeová.