Pastór ida hetan resposta

Loron ida irmán Eliso, neʼebé mak Testemuña ba Jeová, vizita feto ida hodi estuda Bíblia ho nia iha ninia uma laran. Derrepente deʼit feto neʼe iha bainaka rua neʼebé mai vizita nia. Pastór ida ho ninia feen mak mai. Eliso rona ona katak feen-laʼen neʼe nia oan-mane mesak foin mate.

Kuandu Eliso hatete katak nia hanoin sira no sente kasian ba sira, pastór neʼe no ninia feen komesa tanis makaʼas. Depois pastór neʼe hatete ho hirus: “Haʼu la komprende tanbasá Maromak husik susar neʼe! Tanbasá nia foti haʼu-nia oan-mane mesak deʼit? Haʼu serbí Maromak ba tinan 28 ona, haʼu halo buat barak neʼebé diʼak, no nia selu fali haʼu ho ida-neʼe! Tanbasá Maromak oho haʼu-nia oan-mane?”

Eliso esplika ba sira katak Maromak la foti sira-nia oan. Eliso mós koʼalia kona-ba Jesus nia sakrifísiu, moris-hiʼas, no tanbasá Maromak husik buat aat akontese. Pastór no ninia feen fó-hatene Eliso katak ninia liafuan mak resposta ba sira-nia orasaun.

Semana tuirmai pastór no ninia feen fila fali ba uma neʼe hodi sira mós bele estuda Bíblia hamutuk ho Eliso no ninia estudante. Eliso no feto neʼe estuda hela kapítulu kona-ba “Esperansa ba ema neʼebé mate ona” husi livru Tuir Loloos, Saida mak Bíblia Hanorin? Pastór neʼe no ninia feen gosta tebes estuda kona-ba neʼe.

Depois neʼe, sira naʼin-rua tuir Testemuña ba Jeová nia reuniaun boot espesiál iha Tbilisi, rai-Jeórjia. Domin no unidade neʼebé sira haree book sira-nia laran tanba ba tempu kleur ona sira hakaʼas an ajuda membru husi sira-nia igreja atu hatudu hahalok neʼe, maibé la konsege.