Sai santu katak sá?

Bíblia nia resposta

Sai santu refere ba haketak husi buat neʼebé foʼer. Liafuan Ebraiku neʼebé tradús nuʼudar “santu” mai husi fraze neʼebé signifika “haketak”. Entaun, buat neʼebé santu haketak tiha husi buat neʼebé baibain, ka haree nuʼudar buat sagradu no espesiál tanba neʼe mak moos no la iha foʼer.

Maromak mak santu liu hotu. Bíblia dehan: “La iha ida neʼebé santu hanesan Jeová.”a (1 Samuel 2:2) Tan neʼe, Maromak iha direitu atu deside prinsípiu kona-ba saida mak santu.

Liafuan “santu” bele uza hodi refere ba buat naran deʼit neʼebé iha ligasaun ho Maromak, liuliu buat neʼebé haketak tiha hodi uza iha adorasaun ba Maromak. Porezemplu, Bíblia koʼalia kona-ba:

• Fatin neʼebé santu: Maromak koʼalia ba Moisés besik ai-hun tarak, hodi dehan: “Rai neʼebé ó hamriik daudaun mak fatin santu.”​—Éxodo 3:2-5.

• Eventu neʼebé santu: Ema Izraél antigu adora Jeová hodi halo festa relijiaun nian sira neʼebé bolu “reuniaun boot santu”.​—Levítico 23:37.

• Sasán neʼebé santu: Sasán neʼebé uza hodi adora Maromak iha templu iha Jeruzalein bolu “sasán santu”. (1 Reis 8:4) Ema tenke hatudu respeitu ba sasán santu sira-neʼe, maski sira la adora sasán sira-neʼe.b

Ema neʼebé la perfeitu mós bele sai santu ka lae?

Sin. Maromak haruka ema Kristaun: “Imi tenkesér santu, tanba haʼu santu.” (1 Pedro 1:16) Klaru katak, ema neʼebé la perfeitu nunka bele halo tuir Maromak nia prinsípiu kona-ba santu ho perfeitu. Maski nuneʼe, ema neʼebé halo tuir Maromak nia ukun-fuan neʼebé loos bele sai “santu no Maromak simu” sira. (Roma 12:1) Ema neʼebé hakaʼas an atu sai santu hatudu ida-neʼe liuhusi sira-nia liafuan no hahalok. Porezemplu, ema neʼe halo tuir Bíblia nia konsellu hodi “sai santu no hasees an husi sala seksuál” no atu hatudu ‘hahalok santu’.​—1 Tesalónika 4:3; 1 Pedro 1:15.

Oinsá mak Maromak la haree tan ema ida nuʼudar ema santu?

Se ema ida la halo tuir tan Maromak nia prinsípiu kona-ba hahalok diʼak, Maromak sei la haree tan ema neʼe nuʼudar santu. Porezemplu, livru Ebreu iha Bíblia hakerek ba “maun-alin santu sira”, maibé livru neʼe mós fó avizu katak se sira la kuidadu sira bele “haburas laran-aat no la iha fiar tanba hadook an husi Maromak neʼebé moris”.​—Ebreu 3:1, 12.

Hanoin neʼebé sala kona-ba sai santu

Hanoin neʼebé sala: Ema bele sai santu hodi la kaben.

Hanoin neʼebé loos: Maski ema Kristaun ida bele hili atu la kaben, maibé neʼe deʼit la halo ema ida sai santu iha Maromak nia oin. Maski loos katak ema sira neʼebé la kaben bele tau atensaun tomak hodi adora Maromak. (1 Korinto 7:​32-​34) Maibé, Bíblia hatudu katak ema neʼebé kaben mós bele sai santu. Tuir loloos, karik Jesus nia apóstolu ida naran Pedro mak kaben-naʼin.​—Mateus 8:​14; 1 Korinto 9:5.