Sira uza triángulu kór-violeta
Feto ida naran Maud hela iha rai-Fransa. Nia serbisu iha eskola ida atu ajuda labarik sira neʼebé defisiente. Loron ida, alunu sira aprende kona-ba tempu Holocaust no Nazi nia kampu konsentrasaun. Prizioneiru sira presiza uza farda neʼebé iha sinál ida. Sinál nia kór no modelu mak hatudu sai tanbasá ema neʼe tama ba kampu konsentrasaun.
Bainhira mestre koʼalia kona-ba sira neʼebé uza farda ho sinál triángulu kór-violeta, mestre dehan: “Tuir haʼu-nia hanoin, sira uza sinál neʼe tanba sira mak omoseksuál.” Kuandu klase remata, Maud koʼalia ba mestre neʼe, no esplika katak Nazi sira uza triángulu kór-violeta atu hatudu sé mak Testemuña ba Jeová.a Maud husu se nia bele lori informasaun kona-ba tópiku neʼe. Mestre fó lisensa ba nia no mós konvida Maud atu fahe informasaun ba alunu sira.
Mestre seluk neʼebé koʼalia kona-ba tópiku hanesan, uza dezeñu ida hodi bele hatudu sinál oioin neʼebé prizioneiru sira uza. Dezeñu neʼe hatudu ho klaru katak sinál triángulu kór-violeta uza atu refere ba Testemuña ba Jeová. Bainhira klase neʼe remata, Maud husu atu bele fahe informasaun tan ba mestra neʼe. Mestra kontente ho ida-neʼe, no halo arranju hodi Maud bele fahe informasaun neʼe ba alunu sira seluk.
Maud kaer hela publikasaun sira neʼebé nia uza
Maud prepara atu hatoʼo aprezentasaun ba minutu 15 ba klase primeiru, maibé bainhira tempu toʼo ona ba Maud atu hatoʼo, mestre hatete ba nia: “Ita bele hatoʼo ba oras ida.” Maud hahú halo aprezentasaun no hatudu vídeo kona-ba oinsá Nazi haterus Testemuña ba Jeová. Bainhira vídeo neʼe esplika katak Nazi hadau labarik sira hamutuk naʼin-800 husi sira-nia inan-aman, Maud pauza vídeo no lee esperiénsia sira husi labarik naʼin-3 neʼebé Nazi hadau. Kuandu vídeo hotu, Maud lee karta despedida husi joven ida tinan 19 naran Gerhard Steinacher, neʼebé hakerek karta neʼe ba ninia inan-aman iha tinan 1940, antes nia simu kastigu-mate husi Nazi.b
Maud fahe informasaun neʼebé hanesan ba klase seluk. Tanba Maud nia aten-brani, agora mestre naʼin-rua neʼe hakaʼas an atu esplika ho klaru kona-ba oinsá Testemuña ba Jeová hetan terus iha Nazi nia kampu konsentrasaun.
a Durante Funu Mundiál Segundu, Testemuña ba Jeová iha rai-Alemaña neʼebé ema koñese nuʼudar Bibelforscher (Estudante Bíblia sira), sai prizioneiru tanba sira lakohi apoia governu Nazi.
b Gerhard Steinacher hetan kastigu-mate tanba nia lakohi sai tropa Alemaña nian. Iha Gerhard nia karta ikus, nia hakerek: “Haʼu sei joven hela. Só deʼit se Maromak fó kbiit mai haʼu mak haʼu bele hamriik metin, no neʼe mak buat neʼebé haʼu husu husi nia.” Loron tuirmai iha dadeer-saan, nia simu duni kastigu-mate. Iha ninia rate leten hakerek ho liafuan: “Nia mate hodi fó glória ba Maromak.”