Domin ajuda ita manán sentimentu taʼuk

1. Situasaun saida deʼit mak halo ema sente taʼuk?

HANOIN toʼok situasaun balu neʼebé irmaun-irmán balu hasoru. Irmaun Nestor no ninia feen María hakarak serbí iha fatin neʼebé presiza liután haklaken-naʼin.b Atu bele halo nuneʼe, sira presiza aprende atu moris ho osan uitoan deʼit. Maibé sira taʼuk katak sira labele sente kontente se sira iha osan uitoan deʼit. Bainhira Biniam sai Testemuña ba Jeová iha rai neʼebé governu bandu ita-nia atividade, nia rekoñese katak nuʼudar Maromak nia povu, ema mós sei fó-terus ba nia. Neʼe halo nia sente taʼuk. Maibé nia sente taʼuk liután bainhira hanoin kona-ba ninia família nia sentimentu tanba nia troka relijiaun. Doutór sira fó-hatene irmán Valérie katak nia iha moras-kankru neʼebé aat tebes. Susar ba Valérie atu hetan doutór neʼebé hakarak atu opera nia hodi la uza raan. Tan neʼe nia taʼuk katak nia sei mate.

2. Tanbasá ita presiza hakaʼas an atu manán ita-nia sentimentu taʼuk?

² Ita rasik hasoru ona situasaun sira neʼebé halo ita sente taʼuk ka lae? Ita barak sente ona hanesan neʼe. Se ita la hakaʼas an atu kontrola ita-nia sentimentu taʼuk, karik ita sei halo desizaun la diʼak neʼebé bele estraga ita-nia relasaun diʼak ho Jeová. Neʼe mak buat neʼebé Satanás hakarak. Nia mós koko aproveita ita-nia sentimentu taʼuk atu book ita la halo tuir tan Jeová nia ukun-fuan, inklui mandamentu atu haklaken liafuan diʼak. (Apok 12:17) Satanás mak laran-aat, la hatudu laran-sadiʼa no iha kbiit. Maibé Ita bele proteje Ita-nia an husi nia. Oinsá?

3. Saida mak bele ajuda ita atu manán sentimentu taʼuk?

³ Bainhira ita iha konfiansa katak Jeová hamutuk ho ita no hadomi ita, ita sei la taʼuk ba Satanás. (Sal 118:6) Porezemplu, ema neʼebé hakerek Salmo 118 hasoru situasaun susar balu. Nia iha inimigu barak, inklui ulun-naʼin sira (versíkulu 9, 10). Dala ruma nia sente presaun makaʼas (versíkulu 13). Jeová fó dixiplina makaʼas ba nia (versíkulu 18). Maski nuneʼe, nia hatete: “Haʼu sei nunka taʼuk.” Tanbasá nia sente seguru? Nia hatene katak maski Jeová fó dixiplina ba nia, maibé Jeová hadomi tebes nia. Nia mós fiar katak maski nia hasoru situasaun neʼebé susar, Maromak neʼebé hadomi nia sempre prontu atu ajuda nia.​—Sal 118:29.

4. Situasaun saida deʼit mak bele halo ita sente taʼuk?

⁴ Ita presiza fiar metin katak Jeová hadomi ita ida-idak. Neʼe sei ajuda ita atu la sente taʼuk iha situasaun tolu: (1) taʼuk katak labele sustenta ita-nia família, (2) taʼuk ba ema, no (3) taʼuk mate. Irmaun-irmán sira neʼebé temi ona iha parágrafu primeiru konsege manán sira-nia sentimentu taʼuk tanba sira fiar metin katak Maromak hadomi sira.

TAʼUK KATAK LABELE SUSTENTA ITA-NIA FAMÍLIA

5. Situasaun saida deʼit mak halo ulun ba família sira hanoin barak? (Haree foto iha livru oin.)

⁵ Ulun ba família presiza kaer didiʼak sira-nia responsabilidade atu tau matan ba família. (1 Tim 5:8) Se Ita mak ulun ba família, karik Ita hanoin barak katak Ita sei lakon Ita-nia serbisu durante tempu pandemia neʼe. Karik Ita hanoin barak katak Ita labele sosa hahán no mós selu aluga. Karik Ita mós hanoin barak katak se Ita lakon Ita-nia serbisu, Ita labele hetan fali serbisu seluk. Ka hanesan irmaun Nestor no irmán María neʼebé temi ohin, karik Ita hanoin katak Ita sei nunka bele moris ho osan uitoan deʼit. Satanás konsege hapara ema barak atu serbí Jeová tanba taʼuk.

6. Satanás koko atu halo ita fiar saida?

⁶ Satanás koko atu halo ita fiar katak Jeová la hadomi ita no Jeová sei la ajuda ita atu tau matan ba ita-nia família. Tan neʼe, karik ita hanoin katak ita presiza halo buat naran deʼit atu la lakon serbisu. Karik neʼe inklui halo buat neʼebé kontra Bíblia nia prinsípiu sira.

7. Jesus hatete saida?

⁷ Jesus hatene ninia Aman diʼak liu fali ema seluk no nia hatete katak Maromak “hatene saida mak [ita] presiza antes [ita] husu ba nia”. (Mt 6:8) Jesus hatene katak Jeová prontu atu tau matan ba ita-nia presiza. Nuʼudar ema Kristaun, ita mak parte ba Maromak nia família. Ita bele fiar katak Jeová nuʼudar família nia Ulun sei halo tuir prinsípiu iha 1 Timóteo 5:8 neʼebé nia dirije ema atu hakerek.

8. (a) Saida mak bele ajuda ita manán sentimentu taʼuk kona-ba sustenta família? (Mateus 6:31-33) (b) Tuir foto, oinsá ita bele banati-tuir ezemplu husi feen-laʼen neʼebé fahe ai-han ba irmán ida?

⁸ Bainhira ita fiar katak Jeová hadomi ita no ita-nia família, neʼe sei ajuda ita fiar katak ita sei hetan buat neʼebé ita presiza. (Lee Mateus 6:31-33.) Jeová hakarak atu sustenta ita no nia halo ida-neʼe ho domin no laran-luak. Bainhira nia kria mundu, nia mós kria buat sira neʼebé halo ita kontente, laʼós deʼit buat neʼebé ita presiza. (Gén 2:9) Ita presiza hanoin-hetan katak maski dala ruma ita iha deʼit buat neʼebé ita presiza atu kontinua moris, maibé ita iha ida-neʼe tanba Jeová mak tau matan ba ita. (Mt 6:11) Ita presiza hanoin-hetan katak buat neʼebé Jeová sei fó ba ita mak folin-boot liu fali sakrifísiu hotu neʼebé ita halo agora, no iha futuru ita sei hetan moris rohan-laek. Irmaun Nestor no irmán María rekoñese duni ida-neʼe.​—Isa 65:21, 22.

9. Ita aprende saida husi irmaun Nestor no irmán María nia esperiénsia?

⁹ Irmaun Nestor no irmán María iha uma diʼak no serbisu diʼak ho saláriu boot iha rai-Kolómbia. Sira hatete: “Ami hanoin atu halaʼo moris neʼebé simples no aumenta ami-nia serbisu ba Jeová. Maibé ami taʼuk katak ami sei la sente kontente se ami iha osan uitoan deʼit.” Saida mak ajuda sira manán sentimentu taʼuk? Sira hanoin kona-ba dalan oioin neʼebé Jeová hatudu domin ba sira. Sira fiar metin katak Jeová sei sempre tau matan ba sira, tan neʼe sira rezigna an husi sira-nia serbisu. Sira mós faʼan sira-nia uma no muda ba área seluk iha rai-Kolómbia neʼebé presiza liután haklaken-naʼin. Sira sente oinsá kona-ba sira-nia desizaun? Irmaun Nestor hatete: “Ami haree rasik oinsá liafuan iha Mateus 6:33 mak loos. Ami nunka falta osan no sasán neʼebé ami presiza. Agora ami sente kontente liu.”

TAʼUK BA EMA

10. Tanbasá mak ema ida taʼuk ba ema seluk?

¹⁰ Husi tempu neʼebé Adão no Eva kontra Jeová, ema sempre lori susar deʼit ba ema seluk. (Ecle 8:9) Porezemplu, ema uza sala sira-nia podér, kriminozu sira halo violénsia, labarik iha eskola trata aat malu no ameasa malu no ema balu mós halo violénsia doméstika. Tan neʼe mak ita la hakfodak kuandu ema ida taʼuk ema seluk. Oinsá mak Satanás aproveita ema nia sentimentu taʼuk ba ema seluk?

11-12. Oinsá Satanás aproveita sentimentu taʼuk ba ema?

¹¹ Satanás koko halo ita taʼuk ba ema atu ita para haklaken no la halo tuir tan Jeová nia matadalan sira. Satanás fó influénsia ba governu sira, tan neʼe sira bandu ita-nia atividade no mós kontra ita. (Lc 21:12; Apok 2:10) Iha Satanás nia mundu, ema barak habelar informasaun falsu no lia-bosok oioin kona-ba Testemuña ba Jeová. Ema sira neʼebé fiar ba lia-bosok sira-neʼe karik goza ka ataka ita. (Mt 10:36) Ita la hakfodak ho buat sira-neʼe. Satanás halo nuneʼe iha apóstolu sira-nia tempu.​—Após 5:27, 28, 40.

¹² Satanás la aproveita deʼit ita-nia sentimentu taʼuk ba governu. Ema balu taʼuk liu ba buat neʼebé sira-nia família sei hanoin bainhira sira sai Testemuña duké hetan baku. Sira hadomi no hakarak sira-nia família atu koñese no hadomi Jeová. Sira sente triste bainhira sira-nia família koʼalia aat Maromak neʼebé loos no ninia atan sira. Iha situasaun balu família neʼebé uluk kontra, ikusmai simu lia-loos. Maibé oinsá se ita-nia família lakohi liga tan ita tanba ita-nia fiar foun? Saida mak ita sei halo?

13. Oinsá mak fiar katak Jeová hadomi ita bele ajuda ita tahan bainhira família kontra ita? (Salmo 27:10)

¹³ Lia-loos furak iha Salmo 27:10 bele fó kmaan ba ita. (Lee.) Bainhira ita hanoin-hetan katak Jeová hadomi tebes ita, ita sei la hanoin barak kona-ba saida mak sei akontese kuandu ema fó-terus mai ita. Ita fiar katak Jeová sei fó kolen ba ita kuandu ita tahan. Jeová sei tau matan ba ita-nia presiza fíziku, emosaun no espirituál iha dalan neʼebé diʼak liu. Irmaun Biniam neʼebé temi ohin sente rasik ida-neʼe.

14. Ita aprende saida husi Biniam nia esperiénsia?

¹⁴ Biniam sai Testemuña, maski nia hatene katak governu iha ninia rai kontra makaʼas Testemuña sira. Nia hatene katak Jeová hadomi nia no neʼe ajuda nia atu la taʼuk ba ema. Nia hatete: “Ema fó-terus makaʼas ba haʼu no neʼe aat liu fali buat neʼebé haʼu imajina. Maibé haʼu taʼuk liu ba haʼu-nia família duké ba governu. Haʼu taʼuk katak haʼu-nia desizaun atu sai Testemuña sei halo haʼu-nia apá triste no haʼu-nia família sei la respeitu tan haʼu.” Maibé irmaun Biniam fiar katak Jeová sempre tau matan ba ema neʼebé nia hadomi. Biniam esplika: “Haʼu hanoin kleʼan kona-ba oinsá Jeová ajuda ona ema seluk atu tahan problema ekonomia, situasaun la justisa no mós violénsia. Haʼu hatene katak se haʼu laran-metin ba Jeová, nia sei haraik bensaun mai haʼu. Iha tempu ida-idak neʼebé polísia kaer haʼu no fó-terus makaʼas ba haʼu, haʼu bele haree oinsá Jeová ajuda ninia atan sira se sira kontinua laran-metin.” Jeová sai hanesan Aman ida ba Biniam no ninia povu sai hanesan família ba Biniam.

TAʼUK MATE

15. Tanbasá la sala se ita taʼuk mate?

¹⁵ Bíblia hatete katak mate mak hanesan inimigu ida. (1 Kor 15:25, 26) Karik ita sente laran-taridu bainhira hanoin kona-ba mate, liuliu se ita ka ema neʼebé ita hadomi moras todan. Tanbasá ita taʼuk mate? Tanba Jeová kria ita ho hakarak atu moris ba nafatin. (Ecle 3:11) La sala se ita taʼuk mate tanba neʼe bele proteje ita-nia moris. Porezemplu, neʼe book ita atu halo desizaun diʼak kona-ba han hahán neʼebé saudavel no halo ezersísiu, konsulta ba doutór no hemu ai-moruk bainhira presiza no mós hasees an husi situasaun neʼebé perigu.

16. Oinsá mak Satanás aproveita ita-nia sentimentu taʼuk mate?

¹⁶ Satanás hatene katak ita hafolin moris. Nia duun katak ita prontu atu husik buat naran deʼit, inklui ita-nia relasaun diʼak ho Jeová atu bele kontinua moris. (Job 2:4, 5) Maibé Satanás sala boot! Maski nuneʼe, Satanás “iha kbiit atu halo mate” no nia koko atu aproveita ita-nia sentimentu taʼuk mate atu book ita hadook an husi Jeová. (Ebr 2:14, 15) Dala ruma, ema sira neʼebé Satanás kontrola ameasa atu oho Jeová nia atan sira se sira la nega sira-nia fiar. Dala ruma Satanás aproveita emerjénsia médiku atu halo ita la kaer metin ba ita-nia fiar. Karik doutór ka família neʼebé laʼós Testemuña obriga ita atu simu transfuzaun raan neʼebé kontra Maromak nia ukun-fuan. Ka karik ema ruma obriga ita atu simu tratamentu ruma neʼebé kontra Bíblia nia prinsípiu sira.

17. Tuir Roma 8:37-39, tanbasá ita la presiza taʼuk mate?

¹⁷ Klaru katak ita lakohi mate, maibé ita hatene katak Jeová sei kontinua hadomi ita maski ita mate. (Lee Roma 8:37-39.) Bainhira Jeová nia belun sira mate, nia kontinua hanoin-hetan sira hanesan sira sei moris hela. (Lc 20:37, 38) Nia hakarak tebes atu halo sira moris fali. (Job 14:15) Jeová selu ona folin neʼebé karun atu nuneʼe ita bele “hetan moris rohan-laek”. (João 3:16) Ita hatene katak Jeová hadomi tebes ita no hanoin tebes ita. Tan neʼe, duké husik Jeová bainhira ita moras ka atu besik mate, diʼak liu atu sadere ba Jeová atu hetan kmaan, matenek no kbiit. Irmán Valérie no ninia laʼen halo nuneʼe duni.​—Sal 41:3.

18. Ita aprende saida husi irmán Valérie nia esperiénsia?

¹⁸ Bainhira irmán Valérie tinan 35, doutór sira dehan katak nia hetan moras-kankru neʼebé aat loos no úniku. Maibé domin ajuda nia atu manán ninia sentimentu taʼuk mate. Nia esplika: “Bainhira haʼu rona katak haʼu hetan kankru, haʼu no haʼu-nia laʼen hakfodak tebes. Haʼu presiza hetan operasaun boot atu bele kontinua moris. Haʼu konsulta ho doutór barak, maibé sira hotu lakohi opera haʼu se la uza raan. Haʼu sente taʼuk, maibé tanba hakarak atu halo tuir Maromak nia ukun-fuan, haʼu lakohi simu transfuzaun raan. Iha haʼu-nia moris tomak, Jeová hatudu ona katak nia hadomi tebes haʼu. Agora haʼu iha oportunidade atu hatudu katak haʼu hadomi nia. Tempu ida-idak neʼebé haʼu rona buat neʼebé la diʼak husi doutór sira, neʼe halo haʼu deside metin liután atu halo Jeová nia laran kontente no la husik Satanás manán. Ikusmai haʼu hetan operasaun neʼebé la uza raan. Maski haʼu kontinua iha problema saúde, maibé Jeová sempre fó buat neʼebé ami presiza. Porezemplu, iha findesemana antes doutór dehan katak haʼu hetan moras-kankru, ami tuir reuniaun no estuda lisaun husi Livru Haklaken ho títulu ‘Tahan hasoru susar oioin ho aten-brani’.c Lisaun neʼe fó kmaan mai ami. Ami lee ida-neʼe fila-fila. Informasaun hanesan neʼe no mós kontinua halo atividade espirituál ajuda haʼu no haʼu-nia laʼen atu sente kalma nafatin no halo desizaun neʼebé diʼak.”

MANÁN ITA-NIA SENTIMENTU TAʼUK

19. Lakleur tan saida mak sei akontese?

¹⁹ Ho Jeová nia ajuda, irmaun-irmán sira iha mundu tomak konsege tahan hasoru situasaun susar oioin no hetan susesu atu kontra hasoru Diabu. (1 Ped 5:8, 9) Ita mós bele halo nuneʼe. Lakleur tan Jeová sei haruka Jesus no sira neʼebé ukun hamutuk ho Jesus atu “harahun Diabu nia serbisu hotu”. (1 João 3:8) Depois neʼe, Maromak nia povu neʼebé serbí nia iha rai ‘sei la taʼuk buat ida no la iha buat ida mak halo sira nakdedar’. (Isa 54:14; Miq 4:4) Maibé antes neʼe, ita presiza hakaʼas an atu manán ita-nia sentimentu taʼuk.

20. Saida mak bele ajuda ita atu manán sentimentu taʼuk?

²⁰ Ita presiza kontinua hametin ita-nia fiar katak Jeová hadomi no proteje ninia atan sira. Bainhira ita hanoin kleʼan no koʼalia ba ema seluk kona-ba oinsá Jeová proteje ona ninia atan sira iha tempu uluk, neʼe bele ajuda ita. Ita mós bele hanoin kona-ba oinsá Jeová ajuda ona ita iha situasaun neʼebé susar. Ho Jeová nia ajuda, ita bele manán sentimentu taʼuk.​—Sal 34:4.