Tinan-tinan joven barak neʼebé sai boot ho inan-aman neʼebé Testemuña ba Jeová, hetan ona batizmu. Ita mós hanoin hela atu hetan batizmu ka lae? Se nuneʼe, importante ba Ita atu komprende uluk signifikadu neʼebé loos husi batizmu no dedikasaun.

• Batizmu katak sá?

• Dedikasaun katak sá?

• Tanbasá importante atu hetan batizmu?

• Ita-nia kolega hanoin saida

• Hanoin neʼebé sala no hanoin neʼebé loos

Batizmu katak sá?

Tuir Bíblia, batizmu katak hatama ema ida nia isin-lolon tomak ba bee laran, laʼós deʼit hisik bee. No batizmu reprezenta buat neʼebé importante tebes.

• Bainhira Ita-nia isin tama ba bee laran, Ita hatudu sai katak Ita sei la moris tan tuir deʼit Ita rasik nia hakarak.

• Bainhira Ita-nia isin saʼe husi bee laran, Ita hatudu katak husi momentu neʼe, Ita sei uza Ita-nia moris atu halo Maromak kontente.

Bainhira Ita hetan batizmu, Ita hatudu sai iha ema barak nia oin katak Ita rekoñese katak Jeová mak iha direitu atu deside kona-ba saida mak loos no sala. Ita mós hatudu sai katak Ita promete ona atu sempre halo tuir Maromak nia hakarak.

Hanoin toʼok: Tuir loloos, tanbasá mak Ita hakarak atu hetan batizmu? Haree 1 João 4:19 no Apokalipse 4:11.

Dedikasaun katak sá?

Antes Ita hetan batizmu, Ita presiza dedika Ita-nia moris ba Jeová. Oinsá atu halo ida-neʼe?

Halo orasaun mesamesak no promete ba Jeová katak Ita sei serbí nia ba nafatin no katak Ita prontu atu halo tuir ninia hakarak iha situasaun hotu no la depende ba ema seluk nia desizaun.

Kuandu Ita hetan batizmu, Ita hatudu sai iha ema barak nia oin katak Ita halo ona dedikasaun privadu ba Jeová. Ema seluk mós bele haree katak Ita la moris ona ba Ita-nia an rasik, maibé Ita moris ba Jeová.—Mateus 16:24.

Hanoin toʼok: Tanbasá mak Ita-nia moris sei sai diʼak liu kuandu Ita moris ba Jeová? Haree Isaias 48:17, 18 no Ebreu 11:6.

Tanbasá importante atu hetan batizmu?

Jesus haruka ninia dixípulu sira atu hetan batizmu. (Mateus 28:19, 20) Tan neʼe, toʼo ohin loron ema Kristaun mós tenke hetan batizmu. Tuir loloos, Bíblia hatete katak batizmu mak importante atu bele hetan salvasaun.—1 Pedro 3:21.

Maski nuneʼe, razaun importante liu atu Ita hetan batizmu mak tanba Ita hadomi Jeová no hafolin Ita-nia relasaun diʼak ho nia. Ita hakarak atu iha hanoin neʼebé hanesan ho ema neʼebé hakerek salmo tuirmai neʼe: “Saida mak haʼu sei fó hodi selu fali Jeová tanba buat diʼak hotu neʼebé nia halo ona ba haʼu? . . . Haʼu sei bolu Jeová nia naran. Haʼu sei kumpre haʼu-nia juramentu ba Jeová.”—Salmo 116:12-14.

Hanoin toʼok: Saida deʼit mak Jeová halo ona ba Ita, no oinsá mak Ita bele selu fali ida-neʼe? Haree Deuteronómio 10:12, 13 no Roma 12:1.

Se Ita moris tuir Bíblia nia matadalan sira no haburas daudaun Ita-nia relasaun diʼak ho Jeová, karik Ita hanoin atu hetan batizmu. Maibé oinsá Ita bele hatene katak Ita prontu duni atu hetan batizmu?a

Iha informasaun neʼe

• Haʼu presiza hatene buat hotu kona-ba Bíblia ka lae?

• Saida mak haʼu presiza halo?

• Ita-nia kolega hanoin saida

Haʼu presiza hatene buat hotu kona-ba Bíblia ka lae?

Prepara an atu hetan batizmu, la dehan katak ita presiza dekór informasaun hotu husi Bíblia hanesan ita dekór informasaun sira atu tuir ezame iha eskola. Maibé Ita sei presiza uza Ita-nia “kbiit atu hanoin” hodi hametin Ita-nia fiar katak buat neʼebé Bíblia hanorin mak lia-loos duni. (Roma 12:1) Porezemplu:

• Ita fiar ka lae katak Maromak iha duni no nia merese atu Ita adora?

  Bíblia hatete: “Ema neʼebé hakbesik ba Maromak tenke fiar katak Maromak iha duni, no mós fiar katak Maromak sei fó kolen ba sira neʼebé buka nia ho laran.”—Ebreu 11:6.

  Husu ba Ita-nia an: ‘Tanbasá mak haʼu fiar katak Maromak iha?’ (Ebreu 3:4) ‘Tanbasá mak nia merese atu haʼu adora?’—Apokalipse 4:11.

  Presiza ajuda? Lee “Penciptaan atau Evolusi?—Bagian 1: Mengapa Percaya kepada Allah?”

• Ita fiar ka lae, katak Bíblia mai husi Maromak?

  Bíblia hatete: “Eskritura hotu mai husi Maromak no neʼe diʼak atu hanorin, atu fó konsellu, atu halo loos buat hotu, no atu fó dixiplina tuir hahalok loos.”—2 Timóteo 3:16.

  Husu ba Ita-nia an: ‘Tanbasá mak haʼu fiar katak Bíblia laʼós livru baibain deʼit neʼebé ema mak hakerek?’—Isaias 46:10; 1 Tesalónika 2:13.

  Presiza ajuda? Lee “Oinsá mak Bíblia bele ajuda haʼu?—Parte 1: Deskobre Ita-nia Bíblia”

• Ita fiar ka lae, katak Jeová uza kongregasaun Kristaun atu kumpre ninia hakarak?

  Bíblia hatete: “[Maromak] merese simu glória liuhusi kongregasaun no mós liuhusi Kristu Jesus iha jerasaun hotu tinan ba tinan nafatin.”—Éfeso 3:21.

  Husu ba Ita-nia an: ‘Haʼu haree buat neʼebé haʼu aprende husi Bíblia iha reuniaun nuʼudar ema nia hanorin ka hanorin husi Jeová?’ (Mateus 24:45) ‘Haʼu nafatin tuir reuniaun maski haʼu-nia inan-aman la tuir ka lae (se sira husik Ita atu bá)?’—Ebreu 10:24, 25.

  Presiza ajuda? Lee “Tanbasá tuir reuniaun sira iha Reuniaun-Fatin?”

Saida mak haʼu presiza halo?

Ita la presiza sai ema perfeitu atu bele hetan batizmu. Maibé Ita presiza hatudu katak Ita hakarak duni atu “hasees an husi buat neʼebé aat no halo buat neʼebé diʼak”. (Salmo 34:14) Porezemplu:

• Ita moris tuir Jeová nia matadalan ka lae?

  Bíblia hatete: “Kontinua iha konxiénsia neʼebé diʼak.”—1 Pedro 3:16.

  Husu ba Ita-nia an: ‘Iha dalan saida deʼit mak haʼu hatudu katak haʼu-nia “kbiit atu tetu didiʼak” hetan ona treinu “atu hatene saida mak loos no saida mak sala”?’ (Ebreu 5:14) ‘Haʼu bele hanoin fali ka lae situasaun ruma neʼebé haʼu la monu ba sala, maski haʼu-nia maluk sira tenta haʼu? Haʼu-nia kolega sira ajuda haʼu atu halo buat neʼebé loos ka lae?’—Provérbios 13:20.

  Presiza ajuda? Lee “Oinsá haʼu bele treinu haʼu-nia konxiénsia?”

• Ita prontu atu hatán ba Jeová kona-ba Ita-nia hahalok ka lae?

  Bíblia hatete: “Ita ida-idak sei hatán ba Maromak kona-ba ita-nia hahalok rasik.”—Roma 14:12.

  Husu ba Ita-nia an: ‘Haʼu lohi haʼu-nia an ka lae? Haʼu hatudu laran-moos ba ema seluk ka lae?’ (Ebreu 13:18) ‘Se haʼu halo sala ruma, haʼu rekoñese haʼu-nia sala ka haʼu subar ida-neʼe no duun fali ema seluk?’—Provérbios 28:13.

  Presiza ajuda? Lee “Saida mak haʼu sei halo bainhira haʼu halo sala?”

• Ita nafatin hakbesik ba Jeová ka lae?

  Bíblia dehan: “Hakbesik ba Maromak, no nia sei hakbesik ba imi.”—Tiago 4:8.

  Husu ba Ita-nia an: ‘Saida deʼit mak haʼu halo atu hakbesik liután ba Jeová?’ Porezemplu: ‘Haʼu lee Bíblia beibeik ka lae?’ (Salmo 1:1, 2) ‘Haʼu halo orasaun beibeik ka lae?’ (1 Tesalónika 5:17) ‘Haʼu temi buat espesífiku iha haʼu-nia orasaun sira ka lae? Ema neʼebé haʼu habelun mak Jeová nia belun ka lae?’—Salmo 15:1, 4.

  Presiza ajuda? Lee “Oinsá mak Bíblia bele ajuda haʼu?—Parte 2: Dalan atu lee Bíblia ho kontente” no “Tanbasá haʼu presiza halo orasaun?”

SUJESTAUN: Lee toʼok kapítulu 37 husi livru Pergunta Husi Joven Sira—Resposta neʼebé bele ajuda, Volume 2 atu ajuda ita prepara an ba batizmu. Liuliu, haree didiʼak kaixa “Atividade ba joven sira”.

Ita sente laran-nakdedar atu dedika an ba Jeová no hetan batizmu ka lae? Se nuneʼe, informasaun neʼe sei ajuda Ita atu manán hasoru Ita-nia sentimentu taʼuk.

Iha informasaun neʼe

• Oinsá se haʼu halo sala sériu depois haʼu hetan batizmu?

• Oinsá se haʼu sente katak haʼu la prontu atu simu responsabilidade sira depois hetan batizmu?

• Oinsá se haʼu sente katak haʼu la merese atu serbí Jeová?

• Ita-nia kolega hanoin saida

Oinsá se haʼu halo sala sériu depois haʼu hetan batizmu?

Tanbasá Ita hanoin barak: Karik Ita koñese ema ruma neʼebé halo sala sériu no ikusmai hasai tiha husi kongregasaun. (1 Korinto 5:11-13) Karik Ita taʼuk katak ida-neʼe mós sei akontese ba Ita.

“Dala primeiru neʼebé haʼu hanoin atu hetan batizmu, haʼu taʼuk katak haʼu sei halo sala. Haʼu imajina kona-ba oinsá situasaun neʼe sei hamoe haʼu-nia inan-aman.”—Rebekah.

Eskritura importante: “Ema aat tenke husik ninia dalan . . . Husik nia fila fali ba Jeová, neʼebé sei hatudu laran-sadiʼa ba nia, fila fali ba ita-nia Maromak, tanba Maromak sei fó perdua ho laran-luak.”—Isaias 55:7.

Hanoin toʼok: Maski ema neʼebé halo sala no la arrepende an sei hasai duni husi kongregasaun, maibé Jeová sei hatudu laran-sadiʼa ba ema neʼebé ho haraik an arrepende sira-nia sala no prontu atu simu dixiplina.—Salmo 103:13, 14; 2 Korinto 7:11.

No mós realidade mak maski Ita la perfeitu, maibé Ita bele luta hasoru tentasaun sira ho Maromak nia ajuda. (1 Korinto 10:13) Ikusmai, sé mak sei deside kona-ba buat neʼebé Ita sei halo? Ita rasik? Ka ema seluk?

“Haʼu taʼuk katak haʼu sei halo sala sériu kuandu hetan ona batizmu, maibé ikusmai haʼu komprende katak dada an atu hetan batizmu mak desizaun sala. Haʼu rekoñese katak haʼu labele husik sentimentu taʼuk kona-ba buat neʼebé karik bele akontese iha futuru hanetik haʼu atu foti desizaun agora.”—Karen.

Buat neʼebé importante: Ita bele hadook an husi sala sériu se Ita hili atu halo nuneʼe. Loloos ema barak liu neʼebé serbí Jeová halo nuneʼe.—Filipe 2:12.

Presiza ajuda liután? Haree “Oinsá mak haʼu bele hadook an husi tentasaun?”

Oinsá se haʼu sente katak haʼu la prontu atu simu responsabilidade sira depois hetan batizmu?

Tanbasá Ita hanoin barak: Karik Ita koñese joven balu neʼebé muda ba fatin dook husi família no kolega hodi bele serbí Jeová liután. Ita taʼuk katak ema seluk hein Ita atu halo nuneʼe.

“Ema Kristaun neʼebé hetan ona batizmu iha oportunidade barak atu serbí Jeová liután, maibé ema balu seidauk prontu atu halo nuneʼe ka sira-nia situasaun hanetik sira.”—Marie.

Eskritura importante: “Ema ida-idak tenke buka-hatene ninia hahalok rasik, no tuirmai nia sei iha razaun atu haksolok kona-ba ninia an rasik, laʼós hodi kompara nia an ho ema seluk.”—Galásia 6:4.

Hanoin toʼok: Duké kompara Ita-nia an ho ema seluk, tau fokus ba liafuan iha Marcos 12:30: “Imi tenke hadomi Jeová imi-nia Maromak, ho imi-nia laran tomak.”

Ita tenke hadomi Jeová ho Ita-nia laran tomak, laʼós ho ema seluk nia laran tomak. Se Ita hadomi duni Jeová, Ita sei hetan dalan atu serbí nia tuir Ita-nia abilidade sira.

“Maski batizmu mak desizaun neʼebé sériu, maibé hetan batizmu laʼós naha neʼebé todan. Se ita habelun ho ema sira neʼebé diʼak, sira sei prontu atu ajuda ita. Tuir loloos, se ita aumenta ita-nia responsabilidade sira neineik-neineik, ita bele sai kontente liután. Dada an atu hetan batizmu, sei lori susar ba ita-nia an rasik.”—Julia.

Buat neʼebé importante: Haburas agradese ba domin neʼebé Jeová hatudu ba Ita. Neʼe sei anima Ita atu serbí Jeová ho didiʼak.—1 João 4:19.

Presiza ajuda liután? Haree “Apakah Aku Orangnya Bertanggung Jawab?”

Oinsá se haʼu sente katak haʼu la merese atu serbí Jeová?

Tanbasá Ita hanoin barak: Jeová mak Ukun-Naʼin Boot Liu. Se kompara Ita-nia an ho nia, Ita la iha folin duni. Karik Ita duvida kona-ba Jeová haree duni Ita.

“Haʼu-nia inan-aman mak Testemuña ba Jeová, no haʼu sente taʼuk katak haʼu iha relasaun diʼak ho Jeová tanba deʼit sira, no taʼuk katak Jeová rasik la dada haʼu ba nia.”—Natalie.

Eskritura importante: “Ema ida labele hakbesik haʼu se Aman neʼebé haruka haʼu mai la dada nia.”—João 6:44.

Hanoin toʼok: Tanba Ita hanoin kona-ba hetan batizmu, neʼe hatudu katak Jeová mak dada hela Ita atu hakbesik liután ba nia. Ita hakarak atu simu ninia konvite neʼe ka lae?

Hanoin-hetan mós katak Jeová mak hili rasik ema neʼebé nia hakarak atu dada besik. Laʼós Ita ka ema seluk mak deside. No ninia Liafuan fó konfiansa ba Ita katak se Ita ‘hakbesik ba Maromak, nia sei hakbesik ba Ita’.—Tiago 4:8.

“Ita hatene ona kona-ba Jeová no sai besik ona ho nia, neʼe hatudu katak nia hadomi Ita. Entaun se Ita hanoin hela katak Ita la merese atu serbí nia, fó-hanoin ba Ita-nia an katak loloos nia la konkorda ho Ita. No Jeová sempre loos.”—Selina.

Buat neʼebé importante: Se Ita kumpre ona Bíblia nia kritéria atu hetan batizmu, neʼe katak Ita merese duni atu adora Jeová. No liután neʼe, nia merese atu simu Ita-nia adorasaun.—Apokalipse 4:11.

Presiza ajuda liután? Haree “Tanbasá haʼu presiza halo orasaun?”