1, 2. Katuas área sira nota saida iha kongregasaun laran?

ENKONTRU entre katuas área nian ho grupu katuas besik ona atu remata. Katuas área nian hateke ba katuas kongregasaun sira-nia oin, no nia sente hadomi tebes sira. Balu haree hanesan katuas liu ona. Maibé, iha buat importante ida mak preokupa hela ninia neon, tan neʼe nia husu ba sira, “Irmaun sira, imi halo tiha ona saida hodi treinu ema seluk atu kaer responsabilidade sira iha kongregasaun laran?” Irmaun sira-neʼe sei hanoin-hetan uluk, bainhira katuas área nian neʼe mai vizita sira, nia anima sira atu gasta tempu uitoan hodi fó treinu ba irmaun seluk. Ikusmai katuas ida mak hatán, “Tuir loloos, ami seidauk halo.” Katuas sira seluk mós doko ulun akordu ho nia.

² Se Ita-Boot mak katuas kongregasaun nian ida, karik Ita mós sei konkorda ho sira. Tanba iha mundu tomak, katuas área sira nota katak katuas kongregasaun presiza gasta tan tempu uitoan hodi fó treinu ba irmaun sira iha kongregasaun laran, biar nia sei joven ka katuas ona mós diʼak, sira presiza simu treinu hodi bele ajuda tau matan ba kongregasaun. Maibé, neʼe fasil atu koʼalia deʼit. Tanbasá?

3. (a) Oinsá mak Bíblia hatudu katak importante tebes atu fó treinu ba ema seluk? (b) Tanbasá mak ita hotu presiza fó atensaun ba informasaun neʼe? (Haree nota.) (c) Tanbasá mak katuas balu sente susar atu fó treinu ba ema seluk?

³ Nuʼudar katuas ida, karik Ita hatene katak importante duni atu gasta tempu uitoan hodi bele fó treinu ba irmaun seluk.a (Haree nota iha kraik.) Ita hatene katak atu kongregasaun bele forte nafatin iha dalan espirituál ka atu bele harii kongregasaun foun iha futuru, ita presiza tan irmaun barak. (Lee Isaías [Yesaya] 60:22.b) Ita mós hatene katak Bíblia haruka ita atu “hanorin ema seluk”. (Lee 2 Timóteo 2:2.) Karik ita sente susar atu halo buat hirak-neʼe. Tanba ita presiza tau matan ba Ita rasik nia família, ba serbisu, iha responsabilidade barak iha kongregasaun laran, ka Ita presiza halo uluk buat seluk neʼebé la bele demora tempu. Buat sira-neʼe halo Ita sente Ita-nia tempu la toʼo atu fó treinu ba ema seluk iha kongregasaun laran. Se hanesan neʼe, mai ita koʼalia kona-ba tansá mak importante tebes atu buka tempu hodi fó treinu ba ema seluk.

FÓ PRIORIDADE BA TREINU

4. Ho razaun saida mak katuas balu demora atu lakohi fó treinu ba irmaun seluk?

⁴ Razaun saida tan mak bele halo katuas sira hanoin katak sira la iha tempu atu fó treinu ba irmaun seluk iha kongregasaun laran? Karik katuas balu hanoin hanesan neʼe: ‘Treinu irmaun seluk, neʼe importante. Maibé, neʼe la importante liu fali knaar urjente seluk neʼebé la bele demora atu halo iha kongregasaun laran. Demora uitoan atu treinu irmaun seluk, neʼe la iha buat ida, importante mak kongregasaun laʼo ho diʼak nafatin.’ Hanoin hanesan neʼe loos ka lae? Iha duni buat barak neʼebé urjente iha kongregasaun laran mak presiza halo kedas. Maibé, se la fó treinu agora kedas ba irmaun seluk, neʼe sei lori perigu ba kongregasaun.

5, 6. Oinsá mak fó treinu ba ema seluk iha kongregasaun laran hanesan ho tau matan didiʼak ba karreta ida?

⁵ Ida-neʼe hanesan ho kondutór ida. Nia hatene katak atu tau matan didiʼak ba karreta ida, nia presiza troka beibeik karreta nia oli. Maibé, nia bele hanoin katak troka oli bele hein uitoan, urjente liu mak atu enxe mina. Tanba, se mina mak maran, karreta mós la bele laʼo tan. Karik ninia razaun mak: ‘Se haʼu la troka oli mós karreta sei bele aguenta ba tempu uitoan.’ Maibé, hanoin hanesan neʼe perigozu tebes. Tanba, se xofér neʼe demora beibeik hodi la troka karreta nia oli, loron ida karreta neʼe mós sei gripa tiha. Ikusmai nia mak tenke hasai osan barak ka uza tempu barak hodi hadiʼa fali karreta neʼe. Ita bele aprende saida husi neʼe?

⁶ Importante duni ba katuas sira atu la bele dada tempu hodi halo knaar importante seluk iha kongregasaun laran, selae, bele lori susar ba kongregasaun. Katuas sira tenkesér duni hanesan kondutór neʼebé enxe mina beibeik hodi hatudu katak sira “buka-hatene loloos buat sira neʼebé importante liu”. (Filipe 1:10) Maibé, katuas balu preokupa liu ba knaar importante sira-neʼe toʼo sira haluha tiha atu fó treinu ba ema seluk. Buat ida karik, neʼe hanesan sira haluha tiha atu troka karreta nia oli. Kuandu katuas sira mak demora beibeik atu fó treinu ba irmaun sira, loron ida, se kongregasaun mak presiza irmaun sira-neʼe, sira la bele ajuda, tanba sira seidauk hetan treinu atu hatene oinsá bele tau matan ba kongregasaun.

7. Ita sente oinsá kona-ba katuas sira neʼebé hakarak gasta tempu hodi fó treinu ba ema seluk?

⁷ Tan neʼe, nunka bele hanoin katak la importante atu fó treinu ba ema seluk. Katuas kongregasaun sira neʼebé hanoin kona-ba kongregasaun nia futuru no gasta tempu hodi fó treinu ba irmaun seluk, katuas sira-neʼe hanesan atan neʼebé diʼak no sai bensaun ida ba kongregasaun tomak. (Lee 1 Pedro 4:10.) Iha dalan saida mak neʼe diʼak ba kongregasaun?

PREPARA BA FUTURU

8. (a) Ho razaun saida mak katuas sira hakarak fó treinu ba ema seluk? (b) Katuas sira neʼebé muda ba rai seluk hodi fó ajuda iha responsabilidade urjente saida? (Haree kaixa “Knaar urjente.”)

⁸ Maski iha ona esperiénsia barak mós katuas sira tenke haraik an atu rekoñese katak idade bele aumenta ba beibeik toʼo loron ida sira la bele halo tan buat balu neʼebé uluk sira halo. (Miquéias [Mikha] 6:8) Sira mós tenke komprende katak “tempu no akontesimentu neʼebé mosu derrepente deʼit” bele troka sira-nia moris no hanetik sira halaʼo sira-nia responsabilidade iha kongregasaun. (Eclesiastes [Pengkhotbah] 9:11, 12; Tiago 4:13, 14) Tanba iha domin ba Jeová nia bibi, katuas sira neʼebé hanoin ba futuru hakarak hakaʼas an atu uza sira-nia esperiénsia hodi hanorin fali irmaun joven sira.—Lee Salmo (Mazmur) 71:17, 18.c

9. Buat saida mak atu akontese iha futuru neʼebé halo katuas sira tenkesér komesa atu fó treinu ona ba irmaun seluk?

⁹ Razaun saida tan mak katuas sira neʼebé fó treinu ba ema seluk sai hanesan bensaun ida ba Jeová nia bibi? Tanba hodi halo hanesan neʼe mak sira hametin kongregasaun. Treinu neʼebé sira fó ba irmaun seluk bele halo irmaun sira-neʼe prontu atu ajuda kongregasaun ohin loron hodi mantein unidade no serbí Jeová ho laran-metin. Liuliu durante tempu susar neʼebé atu mosu mai iha tempu terus boot nian. (Ezequiel [Yehezkiel] 38:10-12; Miquéias [Mikha] 5:5, 6) Tan neʼe, irmaun katuas doben sira, ami husu ba imi komesa agora ona atu gasta tempu hodi fó treinu ba ema seluk.

10. Atu bele iha tempu hodi fó treinu ba ema seluk, karik katuas ida presiza halo saida?

¹⁰ Ami komprende katak imi-nia oráriu nakonu ona ho atividade importante sira husi kongregasaun. Karik imi presiza fahe uitoan tempu husi halaʼo atividade importante sira-neʼe hodi uza fali ba treinu ema seluk. (Eclesiastes [Pengkhotbah] 3:1) Fó treinu ba ema seluk hanesan deʼit ho rai osan iha banku, no treinu neʼe sei sai buat diʼak ida ba kongregasaun tomak iha futuru.

PREPARA ALUNU NIA LARAN

11. (a) Sujestaun husi katuas sira husi rai oioin hatudu saida mai ita? (b) Tuir Provérbios (Amsal) 15:22, tanbasá mak ita hakarak koʼalia kona-ba sujestaun husi katuas sira seluk?

¹¹ Foin lalais, ami husu ba katuas balu neʼebé iha susesu ona oinsá sira fó treinu ba irmaun seluk hodi ajuda sira laʼo ba oin iha lia-loos.d (Haree nota iha kraik.) Maski sira ida-idak nia situasaun la hanesan, maibé kuaze sira hotu fó sujestaun neʼebé hanesan deʼit. Neʼe hatudu saida mai ita? Neʼe hatudu katak maski “iha fatin oioin iha kongregasaun hotu”, treinu neʼebé bazeia ba Bíblia sempre diʼak ba ema neʼebé simu treinu. (1 Korinto 4:17) Tan neʼe mak lisaun ida-neʼe ho ida seluk tuirmai, ita sei koʼalia kona-ba sujestaun balu neʼebé katuas sira-neʼe fó. (Provérbios [Amsal] 15:22) Atu halo fasil ba ita, lisaun rua neʼe sei bolu ema neʼebé fó treinu nuʼudar mestre, no ema neʼebé simu treinu nuʼudar alunu.

12. Mestre ida presiza halo saida, no tanbasá?

¹² Atu bele fó treinu ho didiʼak, mestre presiza prepara alunu nia laran. Tanbasá mak neʼe importante? Se jardineiru ida atu kuda fini ruma, nia presiza fila uluk rai, depois mak foin kuda fini. Hanesan neʼe mós ho mestre ida. Se nia hakarak hanorin ninia alunu kona-ba buat foun ida, nia mós presiza halo mamar uluk ka prepara uluk alunu nia laran hodi bele hanorin nia. Oinsá mak mestre bele halo nuneʼe? Nia bele halo tuir mestre diʼak antigu ida, mestre neʼe mak profeta Samuel.

13-15. (a) Profeta Samuel simu knaar saida? (b) Oinsá mak Samuel halaʼo ninia knaar neʼe? (Haree dezeñu iha pájina 3.) (c) Tanbasá mak istória neʼe diʼak ba katuas kongregasaun sira ohin loron?

¹³ Loron ida, iha tinan 3.000 liubá, Jeová hatete ba profeta Samuel neʼebé idade ona: “Aban oras hanesan neʼe haʼu sei haruka mane ida husi rai Benjamin ba ó. Ó tenke fui mina ba nia hodi nia sai ulun ba haʼu-nia povu Izraél.” (1 Samuel 9:15, 16) Samuel komprende katak tempu toʼo ona ba nia atu la serbí tan nuʼudar ulun tanba Jeová hakarak nia atu bá fui mina ba lideransa foun ida. Karik Samuel hanoin: ‘Oinsá mak haʼu bele prepara ema neʼe ba knaar neʼe?’ Nia presiza halo planu uluk.

¹⁴ Loron tuirmai, bainhira Samuel hasoru malu ho Saul, Jeová hatete ba profeta Samuel: “Ema neʼe mak neʼe.” Samuel halo kedas buat neʼebé nia planu diʼak tiha ona. Nia buka oportunidade diʼak ida hodi nia bele koʼalia ho Saul. Nia konvida Saul ho ninia atan bá han hamutuk. Nia fó sira tuur iha fatin diʼak liu hotu no fó sira han naan neʼebé diʼak liu hotu. Samuel hatete ba nia: “Han bá, tanba sira prepara tiha ona ida-neʼe ba Ita ba momentu diʼak neʼe.” Han hotu tiha, Samuel konvida Saul ba uma. Nuʼudar sira laʼo, sira mós koʼalia ba malu. Samuel hakarak aproveita momentu diʼak neʼe hodi koʼalia ba Saul. Toʼo tiha Samuel nia uma, nia konvida Saul saʼe ba kakuluk leten. Iha kalan anin mós fresku, Samuel “kontinua koʼalia ho Saul iha uma leten” toʼo sira naʼin-rua toba dukur tiha. Loron tuirmai, Samuel fui mina ba Saul, reʼi nia, no fó tan matadalan balu ba Saul. Hotu tiha, Saul mós fila, prepara diʼak ona ba ninia knaar foun neʼe.—1 Samuel 9:17-27; 10:1.

¹⁵ Maski atu treinu irmaun ida hodi sai katuas ka atan ba kongregasaun la hanesan ho fui mina ba ema ida atu sai lideransa ba nasaun ida, katuas sira bele nafatin aprende pontu importante barak husi dalan neʼebé Samuel prepara Saul nia laran ba ninia knaar foun. Mai ita koʼalia kona-ba pontu rua husi dalan sira-neʼe.

SAI BELUN NO HANORIN HO LARAN

16. (a) Samuel sente oinsá bainhira ema Izraél husu atu iha liurai ida? (b) Samuel hatudu hahalok saida iha tempu Jeová haruka nia bá ordena Saul?

¹⁶ Hanorin ho laran. Bainhira Samuel rona katak ema Izraél sira hakarak atu iha ema ida sai sira-nia liurai, nia sente laran-triste tebes tanba nia sente ema sira-neʼe lakohi tan nia ona. (1 Samuel 8:4-8) Ema sira-neʼe husu ba nia atu buka liurai ida, maibé Samuel lakohi rona sira toʼo Jeová mak haruka nia dala tolu atu rona ba ema sira-neʼe. (1 Samuel 8:7, 9, 22) Maski Samuel nia laran sente triste maibé nia la laran-moras ka odi fali ema neʼebé mak atu troka nia sai lideransa foun neʼe. Bainhira Jeová haruka Samuel bá ordena Saul hodi fui mina ba nia, nia halo tuir kedas, nia la sente laran-todan ka la hanoin katak neʼe ninia serbisu entaun tenke halo deʼit. Samuel halo tuir ho laran tanba nia hadomi Jeová.

17. (a) Oinsá mak katuas sira halo tuir Samuel nia ezemplu ohin loron? (b) Katuas sira kontente atu haree saida?

¹⁷ Ohin loron, iha mós katuas ho esperiénsia tinan barak neʼebé halo tuir Samuel nia ezemplu hodi fó treinu ho laran-diʼak ba ema seluk. (1 Pedro 5:2) Katuas sira-neʼe la hanoin katak fó tiha treinu ba ema seluk, bele halakon fali sira-nia knaar iha kongregasaun. Mestre diʼak ida la haree ninia alunu nuʼudar ema neʼebé mak atu hadau ninia knaar, maibé haree sira hanesan “maluk serbisu-naʼin”, prezente furak husi Maromak atu ajuda tau matan ba kongregasaun. (2 Korinto 1:24; Ebreu 13:16) Irmaun katuas sira kontente tebes bainhira haree alunu uza sira-nia matenek atu ajuda fali kongregasaun tomak!—Apóstolu 20:35.

18, 19. Oinsá mak katuas ida bele ajuda alunu hodi prepara didiʼak ninia laran? Tanbasá mak halo hanesan neʼe importante?

¹⁸ Sai belun ida, laʼós deʼit mestre. Bainhira Samuel hasoru Saul, tuir loloos nia bele hasai kedas ninia botir hodi fui mina ba Saul, no ordena nia sai liurai foun ida. Maibé neʼe la ajuda Saul atu prepara oinsá atu tau matan ba Maromak nia povu. Samuel gasta duni tempu uitoan hodi ajuda Saul prepara ninia laran ba knaar foun neʼe. Antes atu ordena Saul, sira han hamutuk, laʼo halimar, koʼalia, no toba deskansa uitoan. Samuel hein toʼo momentu diʼak mai mak nia foin fui mina ba Saul.

¹⁹ Hanesan neʼe mós ohin loron. Antes fó treinu ba ema ida, mestre presiza buka uluk momentu neʼebé diʼak no haburas uluk relasaun diʼak ida ho alunu. Karik iha rai ida-idak iha kostume ka kultura neʼebé la hanesan. Neʼe bele hanetik mestre ho alunu atu haburas relasaun neʼebé besik ba malu hanesan belun. Maski nuneʼe, se katuas ida mak uza ninia tempu hodi ajuda ninia alunu, alunu mós bele sente katak Ita hafolin tebes nia. (Lee Roma 12:10.) Alunu sira sei sente agradese tebes ba ajuda ka treinu neʼebé katuas fó ba sira.

20, 21. (a) Mestre neʼebé susesu mak mestre hanesan saida? (b) Iha lisaun tuirmai ita sei koʼalia kona-ba saida?

²⁰ Mestre neʼebé susesu mak mestre neʼebé gosta atu fó treinu ema seluk. Maibé nia mós tenke hadomi ema neʼebé nia fó treinu daudaun. (Kompara ho João 5:20.) Tanba se alunu mak hatene ka sente katak ita hadomi ka hafolin nia, neʼe fasil ba nia atu aprende ho lalais. Entaun irmaun katuas doben sira, nuʼudar imi fó treinu ba ema seluk, hakaʼas an laʼós atu sai mestre deʼit, maibé mós sai belun diʼak ho ema sira-neʼe.—Provérbios (Amsal) 17:17; João 15:15.

²¹ Bainhira ajuda alunu prepara diʼak ona ninia laran, katuas presiza hanorin matenek ba nia. Dalan saida deʼit mak diʼak ba katuas sira atu uza? Lisaun tuirmai sei koʼalia kona-ba ida-neʼe.

1. (a) Tanbasá mak hetan treinu importante tebes iha tempu uluk no mós ohin loron? (b) Iha lisaun neʼe liuliu koʼalia kona-ba saida?

MAROMAK nia povu husi uluk kedas hatene katak treinu mak bele halo ema ida sai susesu. Porezemplu, Abrão “lori ema neʼebé hetan treinu ona” hodi salva Lot husi ninia inimigu sira. (Gênesis [Kejadian] 14:14-16) Iha Liurai David nia tempu, kantadór sira “hetan treinu” oinsá atu kanta knananuk hodi hahiʼi Jeová. (1 Crônicas [Tawarikh] 25:7) Ohin loron mós hanesan, ita presiza funu hasoru Satanás ho ninia mundu. (Éfeso 6:11-13) Ita mós hakaʼas an atu hahiʼi Jeová nia naran liuhusi haklaken ba ema. (Ebreu 13:15, 16) Atu hetan susesu hodi bele halo buat sira-neʼe, ita presiza hetan treinu hanesan Maromak nia povu iha tempu uluk. Iha kongregasaun laran, Jeová fó knaar ba katuas sira atu treinu ema. (2 Timóteo 2:2) Katuas sira neʼebé iha ona esperiénsia uza dalan saida hodi fó treinu ba irmaun sira hodi sira bele kaer responsabilidade atu tau matan ba Maromak nia bibi?

HAMETIN ALUNU NIA DOMIN BA JEOVÁ

2. Antes atu hanorin matenek ruma ba alunu ida, karik katuas tenke halo uluk saida, tanbasá?

² Katuas sira hanesan ho jardineiru ida. Antes atu kuda fini, karik jardineiru presiza tau uluk adubu ba rai atu rai neʼe bele sai bokur liután. Hanesan neʼe mós ho treinu irmaun sira neʼebé seidauk iha esperiénsia kona-ba matenek balu. Karik katuas ida presiza fahe uluk ai-han espirituál ruma ka Bíblia nia matadalan ho irmaun neʼe. Atu nuneʼe, irmaun neʼe bele loke ninia laran hodi simu treinu neʼe ho diʼak.—1 Timóteo 4:6.

3. (a) Oinsá mak ita bele uza Jesus nia liafuan iha Marcos 12:29, 30 atu koʼalia ho alunu? (b) Oinsá mak katuas nia orasaun bele book ninia alunu?

³ Atu bele hatene oinsá mak lia-loos book alunu ida nia hanoin ka moris, karik Ita bele husu ba nia hanesan neʼe, ‘Iha dalan saida mak Ita-nia dedikasaun ba Jeová troka ona Ita-nia moris?’ Pergunta hanesan neʼe bele fó oportunidade ba Ita atu koʼalia kona-ba oinsá mak ita bele serbí Jeová ho laran tomak. (Lee Marcos 12:29, 30.) Koʼalia tiha ho nia, karik Ita bele halo orasaun hamutuk ho nia atu husu Jeová fó espíritu santu ba nia hodi nia bele simu treinu ho didiʼak. Bainhira Ita-nia alunu rona Ita halo orasaun ba Jeová kona-ba nia, karik neʼe bele book nia hakaʼas an liután atu halo ninia knaar sira.

4. (a) Fó toʼok ezemplu kona-ba Bíblia nia istória sira neʼebé ajuda alunu laʼo ba oin lalais iha dalan espirituál nian. (b) Bainhira fó treinu, katuas sira tenke hanoin kona-ba objetivu saida?

⁴ Bainhira fó treinu, diʼak atu hanoin kona-ba ezemplu husi Bíblia sira neʼebé bele ajuda alunu iha hahalok hanesan haraik-an, prontu atu fó ajuda no halo buat ida ho laran rasik. (1 Reis [Raja-Raja] 19:19-21; Neemias 7:2; 13:13; Apóstolu 18:24-26) Hahalok sira-neʼe importante ba alunu hanesan adubu ba rai. Neʼe bele ajuda alunu sai buras lalais iha dalan espirituál nian. Katuas ida husi rai-Fransa naran Jean-Claude hatete: “Bainhira fó treinu ema, haʼu-nia objetivu mak ajuda alunu atu uza Bíblia nia matadalan sira hodi halo desizaun. Haʼu sempre buka oportunidade diʼak hodi lee eskritura ida atu loke alunu nia matan ba ‘buat furak’ sira husi Maromak nia Liafuan.” (Salmo [Mazmur] 119:18) Dalan saida tan mak bele ajuda hametin alunu ida?

FÓ SUJESTAUN NO ESPLIKA RAZAUN SIRA

5. (a) Tanbasá mak importante atu koʼalia ho alunu kona-ba planu espirituál nian? (b) Tanbasá mak katuas sira tenkesér treinu irmaun sira husi sedu kedas iha sira-nia moris? (Haree nota.)

⁵ Husu ba alunu, ‘Ita-nia planu espirituál mak saida deʼit?’ Se nia seidauk hatene saida mak nia atu halo, ajuda nia halo planu ida neʼebé fasil ba nia atu kumpre. Ho laran-manas konta uluk ba nia Ita rasik halo ona planu espirituál saida, neʼebé halo Ita kontente tebes bainhira Ita kumpre tiha planu neʼe. Dalan neʼe karik rona hanesan simples deʼit, maibé ninia objetivu iha. Katuas pioneiru ida husi Áfrika hatete: “Bainhira haʼu sei joven, katuas ida husu haʼu kona-ba haʼu-nia planu espirituál sira. Ninia pergunta neʼe ajuda haʼu tuur hodi hanoin didiʼak kona-ba haʼu-nia serbisu haklaken.” Katuas ho esperiénsia sira mós hatete katak importante tebes atu treinu irmaun sira sedu kedas iha sira-nia moris. Fó knaar tuir sira-nia idade ba sira hodi halo iha kongregasaun. Fó treinu husi sedu kedas bele proteje irmaun joven sira-neʼe husi mundu nia tentasaun no ajuda sira tau fokus ba sira-nia planu espirituál nian.a (Haree nota iha kraik.)—Lee Salmo (Mazmur) 71:5, 17.b

6. Jesus uza dalan importante saida hodi fó treinu ema seluk?

⁶ Atu bele book alunu nia laran hodi serbí Jeová ho ninia kongregasaun, la toʼo atu hatete deʼit ba alunu hodi halo buat ruma. Ita tenkesér mós esplika ba nia tansá mak importante atu halo buat neʼe. Jesus, Mestre Boot liu hotu mós halo hanesan neʼe. Nia sempre esplika razaun ba ninia apóstolu sira. Porezemplu, antes haruka ninia apóstolu sira sai bá haklaken, Jesus esplika razaun ba sira tansá mak sira tenkesér halo tuir nia. Nia dehan ba sira: “Kbiit tomak iha lalehan no rai fó tiha ona mai haʼu.” Depois mak nia haruka sira: “Neʼe duni, laʼo bá no hanorin ema husi nasaun hotu atu sai haʼu-nia dixípulu.” (Mateus 28:18, 19) Oinsá mak ita bele halo tuir Jesus nia dalan fó treinu neʼe?

7, 8. (a) Oinsá mak katuas sira ohin loron bele halo tuir Jesus nia dalan hodi fó treinu ema? (b) Tanbasá mak importante atu gaba irmaun joven sira? (c) Sujestaun saida tan mak bele ajuda irmaun katuas sira hodi fó treinu ba ema seluk? (Haree kaixa “Oinsá atu fó treinu ba ema seluk.”)

⁷ Bainhira husu irmaun ida atu halo buat ruma, uza eskritura hodi esplika razaun tanbasá mak importante atu halo knaar neʼe. Hanesan neʼe bele ajuda nia hanoin tuir Bíblia nia matadalan bainhira atu halo buat ruma, laʼós tanba lei ruma mak nia hakarak halo knaar neʼe. Porezemplu, se Ita husu irmaun ida atu hamoos varanda tama ba Reuniaun-Fatin hodi haree moos no ema la bele monu, karik Ita bele uza eskritura husi Tito 2:10 hodi esplika ba nia katak ninia knaar neʼe “bele lori hahiʼi ba hanorin neʼebé mai husi Maromak, ita-nia Salvadór”. Ita mós bele husu nia hodi hanoin kona-ba oinsá mak ninia knaar neʼe bele ajuda irmaun-irmán idade boot sira husi ita-nia kongregasaun. Koʼalia hanesan neʼe ba alunu bele ajuda nia hanoin kona-ba ema, laʼós lei sira. Bainhira nia rasik haree katak ninia knaar neʼe lori diʼak ba irmaun-irmán sira iha kongregasaun laran, nia rasik mós sei sente haksolok ho ninia knaar neʼe.

⁸ Keta haluha mós atu gaba nia kona-ba ninia hakaʼas-an hodi halo tuir Ita-nia sujestaun sira. Tanbasá mak neʼe importante? Liafuan gaba neʼebé Ita koʼalia husi laran hanesan ho rega bee ba ai, neʼe sei halo nia laʼo ba oin hodi serbí Jeová.—Kompara ho Mateus 3:17.

PROBLEMA KATUAS SIRA HASORU

9. (a) Katuas husi rai barak hasoru susar saida kona-ba fó treinu? (b) Tanbasá mak lia-loos nunka sai buat importante ida ba irmaun joven balu nia moris?

⁹ Katuas husi rai barak sente katak susar tebes atu anima irmaun joven sira hodi bele envolve an iha kongregasaun nia atividade sira. Ami husu katuas ho esperiénsia husi rai 20 hodi fó-hatene ami kona-ba tansá mak sira sente irmaun joven sira-neʼe lakohi laʼo ba oin hodi serbí iha kongregasaun. Kuaze sira hotu hatán hanesan neʼe: Bainhira irmaun sira-neʼe foin-saʼe, sira-nia inan-aman la anima sira hodi halo planu espirituál nian. Se kuandu sira-nia oan mak iha hakarak atu halo planu espirituál nian karik, sira dudu fali sira-nia oan bá buka edukasaun boot ka buka serbisu boot iha mundu! Tan neʼe mak lia-loos nunka sai buat importante ida iha irmaun joven sira-neʼe nia moris.—Mateus 10:24.

10, 11. (a) Oinsá mak katuas ida bele ajuda irmaun neʼebé la iha interese serbí iha kongregasaun? (b) Katuas bele uza eskritura hanesan saida deʼit atu book irmaun ida nia laran, no tanbasá? (Haree nota.)

¹⁰ Se irmaun ida mak la iha interese atu serbí iha kongregasaun, neʼe presiza duni hakaʼas an ho pasiénsia boot atu troka ninia hanoin, maibé bele. Hanesan ho ai ida neʼebé moris kleʼuk uitoan, atu halo kain neʼe loos fali, jardineiru presiza silu neineik-neineik hodi ai neʼe bele ikusmai moris loos fali. Ita mós bele ho pasiénsia ajuda irmaun neʼe hodi neineik-neineik nia bele troka ninia hanoin no atitude atu halaʼo priviléjiu sira iha kongregasaun. Maibé oinsá mak ita bele ajuda nia?

¹¹ Gasta tempu uitoan atu sai ninia belun. Fó-hatene nia katak kongregasaun presiza nia. Depois, liu tiha tempu uitoan mak bolu nia tuur hamutuk no koʼalia kona-ba razaun husi eskritura balu hodi ajuda nia hanoin fali ninia dedikasaun ba Jeová. (Eclesiastes [Pengkhotbah] 5:4; Isaías [Yesaya] 6:8; Mateus 6:24, 33; Lucas 9:57-62; 1 Korinto 15:58; 2 Korinto 5:15; 13:5) Husu nia, ‘Saida mak Ita promete ba Jeová bainhira Ita dedika Ita-nia an ba Nia? Jeová sente oinsá bainhira Ita hetan batizmu?’ (Provérbios [Amsal] 27:11) ‘Satanás sente oinsá bainhira Ita hetan batizmu?’ (1 Pedro 5:8) Keta hanoin eskritura sira-neʼe la vale, tanba eskritura sira-neʼe iha forsa tebes atu book ninia laran.—Lee Ebreu 4:12.c (Haree nota iha kraik.)

HALAʼO KNAAR HO DIDIʼAK

12, 13. (a) Eliseu hatudu hahalok saida nuʼudar alunu ida? (b) Tanba Eliseu nia laran-metin, Jeová fó bensaun saida ba nia?

¹² Irmaun joven sira, kongregasaun presiza tebes imi atu ajuda. Hahalok ka atitude saida mak bele ajuda imi atu serbí Jeová ho susesu? Atu hatene, mai ita haree istória antigu husi Bíblia ida kona-ba alunu ida naran Eliseu.

¹³ Maizumenus tinan 3.000 liubá, joven Eliseu simu konvite ida mai husi profeta Elias hodi sai ninia ajudante. Eliseu simu kedas konvite neʼe no serbí Elias ho laran-metin hodi halo serbisu simples. (2 Reis [Raja-Raja] 3:11) Eliseu simu treinu husi Elias ba tinan neen. Tanba Elias nia serbisu iha Izraél besik remata ona, nia mós husu Eliseu para ona hodi lalika tuir tan nia atu sai ninia ajudante. Maibé Eliseu hatete dala tolu ba Elias: “Haʼu sei la husik Ita.” Eliseu hakarak tebes hamutuk ho ninia mestre. Tanba Eliseu nia laran-metin neʼe, Jeová fó bensaun ida ba nia hodi nia haree milagre ida oinsá Jeová foti Elias liuhusi kalohan ba fali fatin seluk.—2 Reis (Raja-Raja) 2:1-12.

14. (a) Oinsá mak irmaun joven sira ohin loron bele halo tuir Eliseu nia ezemplu? (b) Tanbasá mak tenke halaʼo didiʼak knaar sira?

¹⁴ Nuʼudar alunu, oinsá mak Ita bele halo tuir Eliseu nia ezemplu? Simu deʼit knaar neʼebé sira fó ba Ita, maski knaar mak simples. Haree Ita-nia mestre nuʼudar belun ida. Hatudu agradese ba ajuda sira neʼebé nia fó ba Ita. Liután neʼe, halaʼo knaar sira ho didiʼak. Tanbasá mak halo hanesan neʼe importante? Tanba se Ita hatudu katak Ita mak ema neʼebé laran-metin no sempre kumpre hotu Ita-nia knaar sira, katuas sira mós bele haree katak Jeová hakarak uza duni Ita hodi fó tan responsabilidade seluk ba Ita iha kongregasaun laran.—Salmo (Mazmur) 101:6; lee 2 Timóteo 2:2.

HATUDU RESPEITU BA KATUAS SIRA

15, 16. (a) Iha dalan saida mak Eliseu hatudu respeitu ba ninia mestre? (Haree dezeñu iha pájina 9.) (b) Tanbasá mak profeta seluk hatudu fiar ba Eliseu?

¹⁵ Oinsá mak irmaun sira ohin loron bele halo tuir Eliseu nia ezemplu hodi hatudu respeitu ba katuas sira? Bainhira Elias ho Eliseu vizita tiha profeta grupu ida iha Jerikó, sira naʼin-rua laʼo ba mota Jordaun. Toʼo tiha neʼebá, “Elias foti ninia unuk no lulun tiha, depois baku bee neʼe, tuirmai bee neʼe fahe ba rua”. Laʼo hakur tiha mota maran neʼe toʼo sorin, sira naʼin-rua laʼo nafatin no koʼalia ba malu. Eliseu aproveita hodi rona didiʼak nafatin ba Elias no aprende nafatin husi nia. Eliseu nunka sente katak ninia matenek toʼo ona, la presiza aprende tan. Toʼo iha momentu Elias fahe malu ho nia mós, nia rona nafatin liafuan ida-idak husi ninia mestre. Depois, Elias saʼe ba kalohan leten. Ikusmai Eliseu fila fali ba mota Jordaun. Nia uza Elias nia unuk baku fali bee neʼe hodi hakilar: “Elias nia Maromak Jeová iha neʼebé?” Dala ida tan bee neʼe fahe ba rua.—2 Reis (Raja-Raja) 2:8-14.

¹⁶ Ita nota ka lae, milagre neʼebé Eliseu halo hanesan deʼit ho milagre neʼebé Elias uluk halo? Ita bele aprende saida husi neʼe? Eliseu la hanoin katak agora buat hotu iha ninia liman ona, no katak nia la presiza tan atu halo buat sira-neʼe tuir Elias nia toman. Lae, nia uza nafatin dalan neʼebé Elias uza hodi halaʼo ninia serbisu. Tanba Eliseu hatudu respeitu hanesan neʼe ba ninia mestre, profeta seluk mós hatudu fiar ba Eliseu. (2 Reis [Raja-Raja] 2:15) Eliseu serbí nuʼudar profeta hamutuk tinan 60, no Jeová uza nia hodi halo milagre barak liu fali Elias. Ita nuʼudar alunu bele aprende saida husi neʼe?

17. (a) Eliseu nia hahalok saida mak diʼak ba irmaun joven sira atu halo tuir? (b) Se irmaun joven sira mak hatudu laran-metin, karik Jeová sei uza sira halo saida iha futuru?

¹⁷ Keta hanoin katak agora Ita simu ona responsabilidade iha kongregasaun, Ita presiza implementa dalan seluk atu halaʼo Ita-nia knaar sira. Tuir loloos, atu troka dalan ita halaʼo knaar iha kongregasaun laran laʼós tuir Ita rasik nia hakarak mak troka, maibé tuir kongregasaun nia presiza no tuir matadalan neʼebé ita simu husi Jeová nia organizasaun. Eliseu nia hahalok halo profeta seluk tau fiar ba nia, no hodi halo tuir Elias nia dalan, nia hatudu respeitu ba nia. Ita mós bele halo irmaun-irmán sira tau fiar ba Ita no hatudu ba katuas sira katak Ita respeitu sira hodi kontinua uza dalan husi Bíblia neʼebé sira uza kleur ona atu halaʼo Ita-nia knaar. (Lee 1 Korinto 4:17.) Maibé, se neineik-neineik mak Ita mós hetan ona esperiénsia barak, Ita bele ajuda kongregasaun atu implementa mudansa sira neʼebé tuir Jeová nia organizasaun. Tanba Jeová nia organizasaun sempre laʼo ba oin. Hanesan ho Eliseu, se Ita mak hatudu laran-metin, karik Jeová mós sei uza Ita atu halo buat barak liu fali Ita-nia mestre sira.—João 14:12.

18. Tanbasá mak fó treinu ba irmaun sira iha kongregasaun laran importante tebes?

¹⁸ Ami hein katak sujestaun sira husi lisaun neʼe ho ida uluk nian bele book katuas sira atu gasta tempu hodi fó treinu ba ema seluk. Ami husu mós irmaun sira iha kongregasaun atu simu treinu sira-neʼe ho laran no uza treinu neʼebé imi simu atu ajuda fali Jeová nia bibi. Halo buat hirak-neʼe bele hametin kongregasaun hotu iha mundu tomak no sei ajuda ita ida-idak hodi laran-metin nafatin durante tempu urjente sira iha futuru.