8 “Hades”, “Siol”—rate ema hotu nian
Gregu, ᾅδης (hades); latín, infernus; ebraiku, שאול (siol); síria, siul
Sala atu tradús “hades” ka “siol” nuʼudar “infernu”
Hades mosu dala sanulu iha eskritura sira
Hades karik iha arti katak “fatin neʼebé la bele haree”. Liafuan neʼe mosu dala sanulu iha Eskritura Lia-Gregu, hanesan tuirmai neʼe: Mateus 11:23; 16:18; Lucas 10:15; 16:23; Apóstolu 2:27, 31; Apokalipse 1:18; 6:8; 20:13, 14. Bíblia Tradusaun Mundu Foun iha lia-tetun hakerek liafuan hades iha nota-rodapé ba eskritura sira-neʼe.
Liafuan ebraiku neʼebé iha arti hanesan ho hades mak siol, no ida-neʼe mosu dala 66 iha Eskritura Lia-Ebraiku. Iha Apóstolu 2:27, Pedro temi fali eskritura husi Salmo 16:10 no hatudu katak hades iha arti hanesan ho siol, no arti husi liafuan rua neʼe mak rate ema hotu nian (liafuan sira-neʼe iha arti la hanesan ho lia-gregu tafos, katak rate atu hakoi ema ida). Liafuan latín neʼebé iha arti hanesan ho hades mak infernus (dala ruma dehan ínferus). Liafuan neʼe iha arti katak “buat neʼebé iha okos; fatin neʼebé iha kraik”. Nuneʼe iha latín orijinál liafuan infernus iha duni arti neʼebé hanesan ho lia-gregu hades no lia-ebraiku siol. Maibé ohin loron, iha língua barak liafuan infernu iha arti “fatin neʼebé ema hetan terus ho ahi”, nuneʼe mós ho lia-tetun.
Iha Eskritura, liafuan hades no siol koʼalia kona-ba mate no ema mate sira, laʼós kona-ba moris ka ema moris. (Apokalipse 20:13) Liafuan sira-neʼe rasik la fó arti ka ideia kona-ba sente ksolok ka sente moras.
Liafuan siol iha Eskritura Lia-Ebraiku
Ema fó ona ideia oioin atu esplika kona-ba liafuan ebraiku siol mai husi neʼebé. Maibé, karik liafuan neʼe mai husi verbu ebraiku nian שׁאל (shaál), katak “atu husu”. Neʼe hatudu katak siol mak fatin neʼebé husu beibeik hodi la fihir ema, nuʼudar nia simu ema hotu neʼebé mate. Fatin neʼe iha rai, no liafuan neʼe koʼalia kona-ba ema mate, no nia arti mak rate ema hotu nian, ka área ema mate nian iha rai, laʼós tasi. Maibé, liafuan ebraiku qever iha arti katak rate atu hakoi ema ida.—Gênesis 23:4, 6, 9, 20.