Notísias husi rai oioin

Mundu tomak

Organização Mundial da Saúde fó sai katak kuandu ema horon beibeik suar husi karreta neʼebé uza solar, ida-neʼe bele hamosu kankru iha pulmaun no mamiik.

Rai-Antártida

Ai-funan nia uut (serbuk sari) neʼebé ema hetan iha tasi okos, hatudu katak uluk iha ai-hun barak neʼebé moris iha rai-Antártida. Tinan rihun ba rihun liubá rai-Antártida la iha jelu. Rai sira neʼebé ohin loron jelu taka, iha tempu neʼebá manas uitoan.

Rai-Irlanda

Iha tinan 2012, relatóriu husi Asosiasaun Padre Katólika iha rai-Irlanda (Irelandʼs Association of Catholic Priests) fó sai katak porsentu 87 husi ema katólika neʼebé hetan entrevista iha rai neʼe, sente katak padre sira bele kaben se sira hakarak. Porsentu 77 husi entrevista neʼe, sente katak feto sira mós bele sai naʼi-ulun iha igreja.

Rai-Áfrika no rai-Ásia

Kuandu ema matenek-naʼin estuda kona-ba ai-moruk ba moras malária, sira haree katak kualidade ba ai-moruk neʼe la diʼak ka forsa la toʼo. Tan neʼe ema moras nafatin. Iha parte súl iha rai-Ásia, husi ai-moruk hotu, porsentu 36 mak ai-moruk neʼebé falsu, no iha rai balu iha Áfrika, porsentu 20 mak falsu.

Rai-Elsalvadór

Iha fulan-Abríl iha tinan 2012, governu iha rai-Elsalvadór fó sai ho kontente katak iha tinan tolu nia laran, foin iha loron ida deʼit neʼebé ema la oho malu. Rai neʼe iha violénsia barak tanba ema barak uza droga. Iha tinan 2011, ema barak tebes mate tanba oho malu. Rai-Elsalvadór mak rai ida neʼebé perigu tebes kona-ba oho malu.