Notísias husi rai oioin

Rai-Estadus Unidus

Loron-loron, ema naʼin-20 liu neʼebé uluk serbisu iha tropa Estadus Unidus mak oho an. Fulan-fulan, husi veteranu sira neʼebé hetan ajuda husi Departamentu Veteranu nian iha Estadus Unidus, maizumenus naʼin-950 mak koko atu oho an.

Rai-Xina

Jornál China Daily hatete: “Husi feto ho tinan 30 ba kraik neʼebé husik ninia rai atu bá serbisu iha fatin seluk, besik porsentu 50 mak sai isin-rua antes kaben, no problema neʼe aumenta barak liu se kompara ho jerasaun uluk.” Jornál neʼe mós hatete: “Ohin loron, komunidade Xina nian simu deʼit feto ho mane neʼebé hela hamutuk maski seidauk kaben.”

Rai-Grésia

Moras-malária mosu fali maski moras neʼe halakon tiha ona husi rai neʼe iha tinan 1974. Ida-neʼe halo ema fó-sala ba ekonomia neʼebé aat no estadu neʼebé hamenus osan atu uza hodi tau matan ba povu nia saúde.

Rai-Índia

Tuir relatóriu ida, maski situasaun iha rai neʼe sai modernu liu, porsentu 74 husi ema neʼebé hatán ba peskiza hatete katak sira apoia liu kaben ho ema neʼebé família mak hili ona duké kaben ho ema neʼebé sira rasik hili ho “domin”. Porsentu 89 hatán katak sira hakarak liu atu hela hamutuk nuʼudar família boot duké halaʼo moris nuʼudar kaben-naʼin ho oan deʼit.

Rai-Itália

Igreja nia ulun-naʼin ida naran Carlo Maria Martini hatete: “Igreja [Katólika] sai fraku iha Europa no Amérika neʼebé riku. Ita-nia kultura sai tuan, ita-nia igreja sira mak boot, ita-nia konventu sai mamuk, no administrasaun la laʼo diʼak, ita-nia rituál no batina sira mak furak deʼit. . . . Igreja neʼe atrazadu ka tuan demais hanesan tinan 200 liubá.”—Jornál Corriere della Sera.