Notísias husi rai oioin

Rai-Estadus Unidus

Relatóriu husi jornál New York Times hatete: “Serbisu-naʼin neʼebé fuma halo ninia patraun . . . lakon osan $5.816 kada tinan se kompara ho serbisu-naʼin neʼebé la fuma.” Tuir relatóriu husi universidade ida (Ohio State University) dehan katak kuandu serbisu-naʼin fuma, nia hamenus tempu neʼebé nia uza atu serbisu, nia falta serbisu tanba moras, no presiza hetan tratamentu. Buat hotu neʼe halo ninia patraun lakon osan. Liután neʼe, ema neʼebé fuma la bele halaʼo ninia serbisu ho didiʼak.

Rai-Itália

Amu-papa Francis hatete: “Ohin loron, ulun-naʼin relijiaun sira no fiar-naʼin sira la halo tuir sira-nia liafuan. Tanba ida-neʼe agora ema barak la tau fiar tan ba igreja.”

Rai-Malázia

Polísia sira iha rai-Malázia hetan iha ponte-kais elefante nia nehan hamutuk 1.000 ho todan tonelada 24, neʼebé ema koko atu haruka ilegál ba rai seluk. Sira subar nehan sira-neʼe iha ai-kabelak nia leet. Ida-neʼe mak primeiravés neʼebé polísia sira hetan barak hanesan neʼe. Elefante nia nehan sira-neʼe mai husi rai-Togu no atu lori ba rai-Xina.

Rai-Áfrika

Tuir relatóriu husi Organização Mundial da Saúde iha tinan 2012, porsentu 63 husi ema hotu neʼebé mate, sira mate tanba kona moras neʼebé bele hadaʼet hanesan HIV/ AIDS, diarreia, malária, meʼar-raan, no moras sira neʼebé ema hetan kuandu sei kiʼik.

Rai-Austrália

Ohin loron, labarik barak halimar programa sira (apps/applications) iha telefone no sasán eletróniku seluk kona-ba joga osan. Kuandu sira halimar programa sira-neʼe balu, neʼe hanesan sira joga osan neʼebé tebes maibé fasil liu atu manán. Relatóriu ida fó avizu katak se labarik sira halimar joga osan hanesan neʼe, neʼe bele sai buat neʼebé baibain deʼit ba sira no karik neʼe “sei halo labarik sira sai toman atu joga osan kuandu sira sai boot”.