Relasaun umanu

Rai-Índia

Tuir peskiza ida neʼebé halaʼo iha tinan 2014, husi joven sira ho tinan 18 toʼo 25, porsentu 61 mak hanoin katak “iha rai-Índia, la problema ba mane no feto toba hamutuk antes kaben”. Doutór ida hatete ba jornál Hindustan Times: “Ba joven sira, relasaun seksuál laʼós katak sira planu atu kaben. Sira toba hamutuk deʼit ka hela hamutuk deʼit, hodi la hanoin kona-ba laran-metin ba malu.”

HANOIN TOʼOK: Se ita halo relasaun seksuál maski seidauk kaben, neʼe aumenta posibilidade atu hetan moras neʼebé hadaʼet husi relasaun seksuál no mós bele halo ita-nia laran la hakmatek.—1 Korinto 6:18.

Rai-Dinamarka

Bainhira ema istori malu beibeik ho família, neʼe bele aumenta posibilidade ba dala rua atu mate antes toʼo tinan 50. Tuir peskiza neʼebé Universidade Copenhagen halo durante tinan 11 nia laran ba ema maizumenus naʼin-10.000 ho idade 35 toʼo 50, rezultadu mak ema neʼebé sempre istori malu ho família iha posibilidade duni atu mate sedu. Profesora ida neʼebé halaʼo peskiza neʼe hatete katak hodi kontrola ita-nia laran-susar no hadiʼa problema iha uma laran, “neʼe mak dalan importante ida atubele moris naruk”.

BÍBLIA DEHAN: “Ema neʼebé iha koñesimentu kuidadu kona-ba ninia liafuan, no ema neʼebé hatene tetu didiʼak sei kalma nafatin.”—Provérbios (Amsal) 17:27.

Estadus Unidus

Peskiza ida neʼebé halaʼo ba feen-laʼen pár 564 neʼebé foin kaben iha Louisiana hatudu katak, mane no feto neʼebé tuir malu, para, depois komesa fali durante tempu namora, sira barak deside atu haketak malu ba tempu uitoan bainhira sira kaben seidauk liu tinan lima. Sira mós istori malu beibeik no la kontente ho sira-nia moris kaben nian.

BÍBLIA DEHAN: “Buat neʼebé Maromak tau hamutuk [nuʼudar feen-laʼen], ema keta haketak.”—Mateus 19:6.