Prevene moras neʼebé bele hadaʼet

Loron-loron, ita-nia isin luta hasoru virus no mikróbiu sira hanesan baktéria no parazita neʼebé ataka ita-nia saúde no ameasa ita-nia moris.a Karik ita la nota saida mak akontese iha ita-nia isin tanba ita-nia isin rasik mak manán hasoru inimigu sira-neʼe antes ita sente moras. Maibé dala ruma, inimigu sira mak sai forte liu, no ita presiza hetan ajuda husi ai-moruk ka tratamentu sira.

Durante tinan rihun ba rihun, ema la hatene katak mikróbiu balu perigu ba ita-nia saúde. Maibé husi tinan 200 liubá, sientista sira komesa deskobre katak mikróbiu no virus sira bele lori moras. No neineik-neineik doutór sira hatene oinsá atu prevene moras oioin, no mós konsege halakon ka hamenus moras balu neʼebé daʼet ba ema, hanesan varíola no mós póliu. Maibé iha mós moras balu neʼebé aumenta ba beibeik, hanesan moras dengue no demam kuning. Tanbasá? Haree toʼok razaun balu tuirmai neʼe:

• Tinan-tinan ema rihun ba rihun halo viajen ba rai seluk, no lori virus ka mikróbiu oioin. Jornál ida (Clinical Infectious Diseases) dehan katak, ohin loron, liuhusi ema neʼebé halo viajen bá-mai, moras aat naran deʼit neʼebé bele daʼet iha posibilidade atu kona fali ema neʼebé hela iha rai seluk.

• Baktéria balu sai forte liután toʼo antibiótiku sira mós la bele ona atu halakon. Organizasaun Saúde Mundiál (WHO) dehan: ‘Lakleur tan, ai-moruk antibiótiku sei la vale ona no infesaun neʼebé baibain deʼit mós bele halo ema mate, hanesan ho tempu uluk bainhira antibiótiku seidauk iha.

• Krize no kiak halo susar ba governu atu hapara moras oioin neʼebé bele hadaʼet.

• Ema barak ladún hatene oinsá atu prevene moras.

Maski nuneʼe, iha buat barak neʼebé ita bele halo atu proteje ita-nia an no ita-nia família. Informasaun tuirmai sei hatudu dalan oioin neʼebé ita hotu bele hakaʼas an atu halo hodi bele prevene moras.