Iha morál neʼebé diʼak

SAIDA MAK MORÁL NEʼEBÉ DIʼAK?

Ema neʼebé iha morál diʼak komprende kona-ba buat neʼebé loos no sala. Sira kaer metin ba morál diʼak iha tempu hotu. Sira uza prinsípiu sira atu foti desizaun neʼebé diʼak, maski ema la haree buat neʼebé sira halo.

TANBASÁ IMPORTANTE ATU IHA MORÁL NEʼEBÉ DIʼAK?

Oan sira sempre rona buat oioin kona-ba saida mak loos no sala, karik husi eskola, múzika neʼebé sira rona, ka filme no programa neʼebé sira haree. Buat sira-neʼe bele halo susar ba sira atu hatene didiʼak saida mak loos no saida mak sala.

Neʼe mak problema boot ida liuliu durante tempu joven. Livru ida (Beyond the Big Talk) hatete katak iha tempu neʼe, sira “tenke komprende katak ema balu sei obriga sira halo hahalok balu hodi ema gosta sira. Maibé sira presiza aprende atu halo buat neʼebé loos maski neʼe halo sira-nia kolega la kontente”. Klaru katak inan-aman presiza treinu sira-nia oan kona-ba buat sira-neʼe antes sira sai joven.

OINSÁ ATU HANORIN KONA-BA MORÁL NEʼEBÉ DIʼAK

Hanorin ho klaru saida mak loos no sala.

BÍBLIA NIA PRINSÍPIU: “Ema maduru, . . . treinu ona sira-nia kbiit neʼe atu hatene saida mak loos no saida mak sala.”​—Ebreu 5:14.

• Uza liafuan sira atu hanorin saida mak loos no sala. Uza situasaun sira neʼebé akontese loroloron atu hanorin: “Neʼe loos; neʼe la loos.” “Neʼe laran-metin; neʼe la laran-metin.” “Neʼe diʼak; neʼe la diʼak.” Neʼe sei ajuda oan komprende saida mak diʼak no bele halo, no saida mak la diʼak no labele halo.

• Esplika tanbasá ida-neʼe loos ka sala. Porezemplu, husu pergunta hanesan: Tanbasá diʼak atu la bosok? Oinsá mak bosok bele estraga relasaun ho ema seluk? Tanbasá sala atu naʼok? Uza razaun neʼebé diʼak atu ajuda oan komprende kona-ba saida mak loos no sala.

• Fó-hatene tanbasá diʼak atu iha morál neʼebé diʼak. Ita bele hatete: “Se ó koʼalia ho loloos, ema seluk sei tau fiar ba ó” ka “Se ó hatudu laran-diʼak, ema sei kontente hakbesik ba ó.”

Hakaʼas an atu família hotu hatudu morál neʼebé diʼak.

BÍBLIA NIA PRINSÍPIU: “Kontinua haree didiʼak imi ema oinsá.”​—2 Korinto 13:5.

• Morál neʼebé diʼak tenke sai lei iha Ita-nia família, atu nuneʼe Ita bele ho laran-moos hatete:

  • “Iha ami-nia família ami la koʼalia bosok.”

  • “Ami la baku ema ka hakilar ema seluk.”

  • “Ami la hakanek ema ho ami-nia liafuan ka hatete aat ema.”

Oan sei haree katak morál neʼebé diʼak laʼós deʼit lei neʼebé tenke halo tuir, maibé neʼe sai nuʼudar identidade ba família.

• Koʼalia beibeik kona-ba morál neʼebé diʼak ho Ita-nia oan. Uza situasaun loroloron nian nuʼudar lisaun. Ita bele kompara Ita-nia morál ho buat neʼebé fó sai iha televizaun ka iha eskola. Husu ba Ita-nia oan: “Saida mak ó sei halo iha situasaun hanesan neʼe?” “Oinsá mak ita-nia família bele rezolve ida-neʼe?”

Ajuda sira hakaʼas an halo buat neʼebé loos.

BÍBLIA NIA PRINSÍPIU: “Kontinua iha konxiénsia neʼebé diʼak.”​—1 Pedro 3:16.

• Gaba hahalok neʼebé diʼak. Kuandu oan hatudu morál neʼebé diʼak, gaba nia no esplika tanbasá Ita halo nuneʼe. Porezemplu, Ita bele hatete: “Haʼu gaba tebes ó tanba hatudu laran-moos.” Se Ita-nia oan fó-hatene sala neʼebé nia halo ona, antes atu korrije nia, gaba nia ho laran tanba nia koʼalia ho loloos.

• Korrije buat neʼebé la loos. Ajuda oan atu hatudu responsabilidade ba ninia sala. Oan presiza hatene sala saida mak sira halo no oinsá sira-nia hahalok la hanesan baibain família halo. Inan-aman balu la fó-hatene kona-ba oan nia sala, tanba lakohi halo oan sente laran-kraik, maibé hodi koʼalia hamutuk kona-ba buat sira-neʼe ho oan sei ajuda sira atu iha konxiénsia neʼebé diʼak kona-ba buat neʼebé loos no la loos.