Respeitu moris

TANBASÁ IMPORTANTE ATU RESPEITU MORIS?

Bainhira Ita halo buat neʼebé perigu ba Ita-nia saúde no ba ema seluk, neʼe hatudu katak Ita la respeitu Ita-nia moris no ema seluk nia moris.

Fuma sigarru hamosu moras-kankru no halo ema nia isin susar atu luta moras neʼe. Maioria ema neʼebé mate tanba moras kankru pulmaun, hetan moras neʼe tanba sira rasik fuma ka besik ema neʼebé fuma.
Tinan-tinan, ema barak hetan trauma tanba akontese masakre ho kilat. Relatóriu ida husi Universidade Stanford iha Estadus Unidus hatete: “Peskiza hatudu katak vítima neʼebé moris liu masakre iha eskola, iha problema mentál durante tinan barak.”
Bainhira ema neʼebé lori transporte hemu tua ka uza droga, neʼe sei lori perigu ba ema seluk iha estrada no ema neʼebé laʼo iha trotoar. Bainhira ema la hatudu respeitu ba moris, baibain ema inosente mak sai vítima.

ITA BELE HALO SAIDA?

Tau matan Ita-nia saúde. Ita bele duni hapara toman la diʼak hanesan fuma sigarru, fuma vape, hemu lanu, ka uza droga. Toman sira-neʼe estraga Ita-nia moris no hatudu katak Ita la respeitu ema seluk nia moris, inklui Ita-nia família.

“Mai ita hamoos ita-nia an husi buat hotu neʼebé hafoʼer isin.”—2 Korinto 7:1.

Hakaʼas an atu nafatin seguru. Atu prevene asidente, Ita presiza nafatin tau matan Ita-nia uma atu la sai aat. Lori transporte ho seguru, no halo manutensaun beibeik ba Ita-nia transporte. Keta rona ba ema neʼebé koko obriga Ita atu halo buat neʼebé perigu.

“Se imi harii uma foun, imi mós tenke halo moru badak iha ninia kakuluk, atu nuneʼe ema la monu husi uma-leten no imi-nia umakain la hetan sala kona-ba ema nia raan.”—Deuteronómio 22:8.a

Hatudu laran-diʼak ba ema seluk. Se ita respeitu moris, ita sei hatudu laran-diʼak ba ema husi rasa, nasaun, no situasaun moris oioin. Tuir loloos, hahalok diskriminasaun no odi mak hun ba violénsia no funu neʼebé akontese iha mundu.

“Hasai tiha husi imi-nia an hahalok odi malu, hirus, laran-nakali, hakilar malu, koʼalia aat, no mós buat hotu neʼebé hakanek malu. Maibé hatudu laran-diʼak ba malu.”—Éfeso 4:31, 32.

SAIDA MAK TESTEMUÑA BA JEOVÁ HALO?

Ami ajuda ema atu moris ho saudavel no balansu. Ami-nia kursu Bíblia ajuda ona ema oioin atu manán sira-nia toman aat sira.

Ami aplika matadalan kona-ba serbisu ho seguru iha projetu konstrusaun. Bainhira harii fatin adorasaun no edifísiu sira, ami-nia serbisu-naʼin voluntáriu hetan treinu atu prevene asidente. Ami halo inspesaun beibeik ba ami-nia edifísiu sira atu seguru nafatin tuir lei lokál.

Ami fó ajuda umanitária. Porezemplu, iha tinan 2022, ami fó ajuda durante dezastre hamutuk 200 neʼebé mosu iha mundu tomak, no ami uza osan kontribuisaun hamutuk dolar millaun 12 atu ajuda vítima sira.

Bainhira ema barak mate tanba moras Ebola iha Áfrika Oeste iha tinan 2014 no iha Repúblika Demokrátika Kongu iha tinan 2018, ami hanorin ema oinsá atu prevene moras neʼe atu la hadaʼet. Ami haruka ami-nia reprezentante sira atu koʼalia ba ema kona-ba tópiku “Halo tuir hodi salva moris”. Ami prepara fatin atu fase liman iha ami-nia fatin adorasaun ida-idak, no esplika tanbasá importante atu fase liman no halo buat seluk tan atu prevene moras neʼe atu la hadaʼet.

Iha rai-Serra Leoa, estasaun rádiu ida gaba ami tanba ajuda ami-nia maluk sira no ema seluk iha komunidade atu proteje sira-nia an husi moras Ebola.

Testemuña ba Jeová hein ho pasiénsia atu fase liman antes tama ba Reuniaun-Fatin. — Fase liman fatin iha Reuniaun-Fatin iha rai-Libéria durante tempu moras Ebola iha tinan 2014

a Ukun-fuan neʼe hatudu katak importante tebes atu família no ema seluk seguru nafatin kuandu iha uma.