Ita koñese Testemuña ba Jeová naʼin-hira? Karik ami balu mak Ita-nia viziñu, kolega serbisu, ka kolega eskola. Ka, karik ami koʼalia ona ho Ita kona-ba Bíblia. Entaun, Testemuña ba Jeová mak ema hanesan saida? Tanbasá mak ami haklaken kona-ba ami-nia fiar?

Ami ema baibain deʼit. Ami mai husi rai no língua oioin, no husi situasaun moris neʼebé la hanesan. Uluk, ami balu tuir ona relijiaun seluk, no balu la fiar ba Maromak. Maibé antes ami sai Testemuña ba Jeová, ami hotu uza tempu atu buka-hatene didiʼak Bíblia nia hanorin. (Apóstolu 17:11) Ikusmai, ami simu buat neʼebé ami aprende husi Bíblia, no ami rasik hili atu adora Maromak Jeová.

Ami hetan benefísiu hodi estuda Bíblia. Hanesan ema seluk, ami mós tenke luta hasoru problema sira no ami rasik nia fraku. Maibé hodi hakaʼas an atu halo tuir Bíblia nia matadalan iha ami-nia moris loroloron, ami haree katak ami-nia moris sai diʼak liu. (Salmo 128:1, 2) Neʼe mak razaun ida ami hakarak koʼalia ba ema seluk kona-ba buat diʼak neʼebé ami aprende ona husi Bíblia.

Ami moris tuir Maromak nia matadalan: Ami aprende matadalan sira-neʼe husi Bíblia, no ida-neʼe ajuda ami atu hatudu laran-moos, laran-diʼak, no respeitu ema seluk. Bíblia nia matadalan ajuda ami atu sai sidadaun neʼebé diʼak, iha morál neʼebé moos, no iha unidade iha família laran. Tanba ami fiar katak “Maromak la todan ba sorin”, ami la husik buat naran deʼit atu haketak ami, neʼe inklui ami-nia rasa ka buat polítiku. Ami hotu sai hanesan família ida iha mundu tomak no iha unidade tanba ami-nia fiar. Maski ami ida-idak ema baibain deʼit, maibé nuʼudar grupu, ami la hanesan ho povu seluk.​—Apóstolu 4:13; 10:34, 35.

• Iha dalan saida mak Testemuña ba Jeová hanesan ho ema seluk?

• Matadalan saida deʼit mak Testemuña aprende hodi estuda Bíblia?

Ema barak hanoin katak Testemuña ba Jeová mak relijiaun foun. Maibé, maizumenus tinan 2.700 liubá, Maromak bolu ninia atan sira nuʼudar ninia “testemuña”. (Isaias 43:10-12) Toʼo tinan 1931, ema koñese ami nuʼudar Estudante Bíblia. Maibé tanbasá mak ami troka naran ba Testemuña ba Jeová?

Naran neʼe hatudu sai kona-ba ami-nia Maromak. Iha Bíblia antigu sira, Maromak nia naran Jeová mosu maizumenus dala rihun hitu. Maibé tradusaun Bíblia barak troka fali Maromak nia naran ho títulu sira hanesan Naʼi ka Maromak. Maski nuneʼe, iha tempu uluk Maromak neʼebé loos fó sai ninia naran rasik ba Moisés, ninia naran mak Jeová. Nia hatete: “Neʼe mak haʼu-nia naran ba nafatin.” (Éxodo 3:15) Hodi halo nuneʼe, Maromak hatudu katak nia la hanesan duni ho maromak falsu sira. Ami sente orgullu atu lori Maromak nia naran neʼebé santu.

Naran neʼe hatudu sai kona-ba ami-nia knaar. Ema barak iha tempu uluk, komesa husi ema laran-loos naran Abel, fó sasin kona-ba sira-nia fiar ba Maromak Jeová. Durante tinan atus ba atus iha ema barak neʼebé sai testemuña, hanesan Noé, Abraão, Sara, Moisés, David, no ema seluk tan. (Ebreu 11:4–12:1) Hanesan ema ida neʼebé prontu atu sai testemuña iha tribunál atu defende ema neʼebé la halo sala, ami mós prontu atu fó sai lia-loos kona-ba ami-nia Maromak.

Ami banati-tuir Jesus. Bíblia bolu Jesus nuʼudar “testemuña neʼebé laran-metin no loos”. (Apokalipse 3:14) Jesus rasik dehan katak nia ‘fó sai tiha ona Maromak nia naran’ no sei kontinua ‘fó sasin ba lia-loos’ kona-ba Maromak. (João 17:26; 18:37) Entaun, Kristu nia dixípulu neʼebé loos tenke lori Maromak Jeová nia naran no fó sai naran neʼe ba ema seluk. Tan neʼe mak Testemuña ba Jeová hakaʼas an atu halo ida-neʼe.

• Tanbasá mak Estudante Bíblia troka naran ba Testemuña ba Jeová?

• Horibainhira mak Maromak Jeová iha testemuña sira iha rai?

• Sé mak Maromak Jeová nia Testemuña neʼebé boot liu?

Bíblia fó-hatene nanis katak depois Kristu mate, mestre falsu sira sei mosu iha ema Kristaun nia leet no habelar hanorin falsu. (Apóstolu 20:29, 30) Ikusmai, ida-neʼe akontese duni. Sira kahur Jesus nia hanorin ho hanorin husi relijiaun falsu sira, no komesa mosu ema Kristaun falsu neʼebé la halo tuir Kristu nia hanorin. (2 Timóteo 4:3, 4) Ohin loron, oinsá mak ita bele hatene katak buat neʼebé ita fiar mai duni husi Bíblia?

Tempu toʼo atu Maromak Jeová fó sai lia-loos. Maromak fó-hatene nanis katak durante ‘tempu nia rohan, koñesimentu neʼebé loos sei sai barak’. (Daniel 12:4) Iha tinan 1870, grupu kiʼik ida hakaʼas an atu buka lia-loos husi Bíblia. Sira rekoñese katak igreja barak nia hanorin la mai husi Bíblia. Tan neʼe, sira komesa buka-hatene Bíblia nia hanorin, no Maromak Jeová ajuda sira atu komprende eskritura sira.

Ema laran-moos balu estuda didiʼak Bíblia. Estudante Bíblia sira-neʼe badinas atu estuda Bíblia no toʼo ohin loron ami sei halo tuir sira-nia ezemplu kona-ba estuda Bíblia. Sira buka atu komprende hanorin ida-idak iha Bíblia laran. Bainhira sira hetan eskritura ida neʼebé susar atu komprende, sira buka eskritura seluk neʼebé esplika ida-neʼe. Kuandu sira komprende ona eskritura neʼe no haree oinsá eskritura neʼe liga malu ho eskritura sira seluk iha Bíblia laran, sira hakerek ida-neʼe. Tanba halo nuneʼe, sira hetan fali lia-loos kona-ba Maromak nia naran, ninia Ukun, ninia hakarak ba rai, ema mate nia kondisaun, no esperansa kona-ba moris-hiʼas. Tanba sira buka-hatene lia-loos, sira sai livre husi hanorin falsu no hahalok aat.​—João 8:31, 32.

Maizumenus iha tinan 1879, Estudante Bíblia sira komprende katak sira presiza habelar lia-loos iha mundu tomak. Tan neʼe husi tempu neʼebá, sira komesa fó sai revista neʼebé ami kontinua halo toʼo ohin loron, no revista neʼe iha lian Tetun mak Livru Haklaken Fó sai Maromak Jeová nia Ukun. Agora, ami haklaken lia-loos husi Bíblia ba ema iha rai hamutuk 240, no iha língua 900 liu. Loos duni, ohin loron koñesimentu neʼebé loos sai barak!

• Depois Kristu mate, saida mak akontese ba lia-loos husi Bíblia?

• Saida mak ajuda ami atu hetan fali lia-loos husi Maromak nia Liafuan?

Iha tempu uluk, Testemuña ba Jeová uza tradusaun Bíblia seluk. Maibé ikusmai ami haree katak presiza halo tradusaun foun ba Bíblia atu ajuda ema “hetan koñesimentu neʼebé loos kona-ba lia-loos”, tanba ida-neʼe mak Maromak nia hakarak. (1 Timóteo 2:3, 4) Nuneʼe, iha tinan 1950 ami komesa fó sai parte balu husi Bíblia Tradusaun Mundu Foun iha lian Inglés hodi uza liafuan neʼebé fasil atu komprende. Kuandu ami halo tradusaun Bíblia neʼe, ami hakaʼas an atu tradús tuir língua orijinál. Toʼo agora ami tradús ona Bíblia iha língua 160 liu.

Presiza tradusaun Bíblia neʼebé fasil atu komprende. Língua sira troka beibeik, no tradusaun Bíblia barak iha liafuan no fraze sira neʼebé susar atu komprende. No mós, foin lalais neʼe, matenek-naʼin sira hetan tan livru antigu, no ida-neʼe ajuda atu komprende klaru liután língua neʼebé ema uza atu hakerek Bíblia, hanesan lian Ebraiku, Aramaiku, no Gregu.

Presiza tradusaun Bíblia neʼebé tuir língua orijinál. Tuir loloos, ema sira neʼebé tradús Bíblia tenke tradús tuir língua orijinál, no sira labele hasai ka troka Maromak nia liafuan. Maski nuneʼe, iha tradusaun barak hasai tiha Maromak nia naran Jeová husi Eskritura Sagrada.

Presiza tradusaun Bíblia neʼebé fó hahiʼi ba Maromak. (2 Samuel 23:2) Iha Bíblia Tradusaun Mundu Foun, ita bele hetan Maromak nia naran maizumenus dala 7.000 iha fatin neʼebé naran neʼe mosu iha Bíblia orijinál, hanesan ezemplu iha kraik. (Salmo 83:18) Sira neʼebé halo Bíblia Tradusaun Mundu Foun uza tinan barak atu estuda ho didiʼak Bíblia iha língua orijinál, tan neʼe mak agora ita bele lee Bíblia neʼebé fó sai Maromak nia hanoin ho klaru. Maski Ita iha ka la iha Bíblia Tradusaun Mundu Foun iha Ita-nia língua rasik, ami hakarak anima Ita atu haburas toman diʼak hodi lee Maromak Jeová nia Liafuan loroloron.​—Josué 1:8; Salmo 1:2, 3.

• Tanbasá mak ami halo Bíblia Tradusaun Mundu Foun?

• Ema neʼebé hakarak hatene Maromak nia hakarak tenke haburas toman diʼak saida?