Ulun-naʼin relijiaun barak simu osan, maibé ami-nia organizasaun la hanesan neʼe. Hanesan kongregasaun Kristaun iha apóstolu sira-nia tempu, ohin loron mós mane sira neʼebé kumpre kritéria husi Bíblia simu knaar atu “tau matan ba Maromak nia kongregasaun nuʼudar bibi-atan”. (Apóstolu 20:28) Ami bolu mane sira-neʼe nuʼudar katuas kongregasaun. Katuas sira-neʼe iha relasaun metin ho Maromak. Sira dirije no tau matan ba kongregasaun “laʼós hodi obriga an, maibé ho hakarak rasik iha Maromak nia oin, laʼós tanba hakarak manán buat ruma ho laran-makerek, maibé ho laran tomak”. (1 Pedro 5:1-3) Saida mak sira halo atu ajuda ita?

Sira tau matan no proteje ita. Katuas sira fó matadalan no ajuda kongregasaun atu bele hakbesik nafatin ba Maromak Jeová. Maromak mak fó knaar importante neʼe ba sira, tan neʼe sira la domina kongregasaun, maibé ajuda kongregasaun atu sente kmaan no kontente. (2 Korinto 1:24) Hanesan bibi-atan neʼebé serbisu makaʼas atu tau matan ba bibi ida-idak, katuas sira mós hakaʼas an atu koñese irmaun-irmán sira hotu iha kongregasaun.​—Provérbios 27:23.

Sira hanorin ita atu halo tuir Maromak nia hakarak. Semana-semana, katuas sira dirije reuniaun sira neʼebé hametin ita-nia fiar. (Apóstolu 15:32) Katuas sira mós dirije serbisu haklaken, no haklaken hamutuk ho ita no mós hanorin ita atu haklaken iha dalan oioin.

Sira anima ita ida-idak. Atu ajuda hametin ita ida-idak nia relasaun ho Maromak Jeová, dala ruma katuas sira vizita ita iha uma ka koʼalia ho ita iha Reuniaun-Fatin hodi fahe informasaun husi Eskritura neʼebé fó kmaan mai ita.​—Tiago 5:14, 15.

Maski katuas sira iha knaar barak iha kongregasaun, maibé sira barak mós presiza serbisu hodi manán osan no halaʼo sira-nia responsabilidade iha família laran. Tanba sira serbisu makaʼas atu ajuda ita, importante atu respeitu sira.​—1 Tesalónika 5:12, 13.

• Katuas kongregasaun sira simu knaar saida deʼit?

• Iha dalan saida deʼit mak katuas sira hatudu interese ba ita?

Bíblia esplika kona-ba grupu rua neʼebé tau matan ba kongregasaun. Grupu rua neʼe mak “katuas no atan ba kongregasaun sira”. (Filipe 1:1) Baibain, kongregasaun ida-idak iha mane balu neʼebé serbí nuʼudar katuas no atan ba kongregasaun. Saida mak atan ba kongregasaun sira halo atu ajuda ita?

Sira ajuda grupu katuas nian. Atan ba kongregasaun sira iha relasaun neʼebé metin ho Maromak Jeová. Sira halaʼo didiʼak sira-nia knaar no ema bele tau fiar ba sira. Sira balu sei joven no balu idade ona. Sira tau matan ba serbisu oioin iha kongregasaun no iha Reuniaun-Fatin. Maski serbisu sira-neʼe baibain deʼit, maibé importante tebes. Ho ida-neʼe, katuas sira bele uza tempu barak liu atu halaʼo sira-nia knaar atu hanorin no tau matan ba kongregasaun.

Sira ajuda kongregasaun. Atan ba kongregasaun balu simu knaar atu sai asistente hodi fó benvindu ba ema neʼebé mai tuir reuniaun. Sira seluk tau matan ba mikrofone, livru sira, kongregasaun nia osan no mapa haklaken nian. Sira mós ajuda hamoos no tau matan ba Reuniaun-Fatin. Dala ruma katuas sira husu atan ba kongregasaun atu ajuda irmaun-irmán sira neʼebé idade ona. Sira prontu atu halo knaar naran deʼit neʼebé sira simu, no irmaun-irmán hotu iha kongregasaun hafolin sira-nia hakaʼas an.​—1 Timóteo 3:13.

Sira hatudu ezemplu diʼak. Atan ba kongregasaun sira simu knaar neʼe tanba sira hatudu hahalok diʼak nuʼudar ema Kristaun. Kuandu sira hatoʼo diskursu iha reuniaun, sira hametin ita-nia fiar. Sira-nia ezemplu diʼak iha serbisu haklaken book ita atu sai laran-manas iha serbisu neʼe. Tanba sira serbisu hamutuk ho katuas sira, kongregasaun iha unidade no kontente. (Éfeso 4:16) Ikusmai, karik sira mós bele serbí nuʼudar katuas kongregasaun nian.

• Atan ba kongregasaun iha hanoin no hahalok hanesan saida?

• Oinsá mak sira ajuda kongregasaun hodi buat hotu laʼo ho diʼak?

Eskritura Lian Gregu temi dala barak kona-ba apóstolu Paulo no Barnabé. Mane naʼin-rua neʼe mak katuas neʼebé vizita kongregasaun sira iha tempu uluk tanba sira hanoin tebes sira-nia maluk fiar-naʼin. Paulo hatete katak nia hakarak “bá fali hodi vizita maun-alin sira” atu haree sira-nia situasaun. Nia prontu atu laʼo dook tebes hodi bele hametin ninia maluk sira-nia fiar. (Apóstolu 15:36) Ohin loron, katuas sira neʼebé iha knaar atu vizita kongregasaun sira mós halo hanesan neʼe.

Sira vizita atu anima ita. Katuas área ida-idak tau matan ba área ida neʼebé iha kongregasaun maizumenus 20. Tinan ida dala rua, sira vizita kongregasaun ida-idak durante semana ida. Ita bele aprende barak husi katuas sira-neʼe no sira-nia feen. Katuas área no sira-nia feen hakaʼas an atu koñese ema hotu iha kongregasaun. Sira gosta atu haklaken hamutuk ho irmaun-irmán sira no tuir sira-nia estuda. Dala ruma, katuas área bá hamutuk ho katuas kongregasaun atu vizita irmaun-irmán balu hodi anima sira. Sira mós hametin ita-nia fiar liuhusi hatoʼo diskursu iha reuniaun no reuniaun boot sira.​—Apóstolu 15:35.

Sira hatudu interese ba ema hotu. Katuas área sira hakarak tebes atu hatene kona-ba ema iha kongregasaun ida-idak nia relasaun ho Maromak. Sira halo reuniaun ho katuas no atan ba kongregasaun atu buka-hatene oinsá kongregasaun laʼo ba oin, no fó matadalan kona-ba oinsá sira bele halaʼo sira-nia responsabilidade. Sira ajuda pioneiru sira atu hetan rezultadu diʼak iha serbisu haklaken. Sira mós hakaʼas an atu koñese ema foun no sira gosta atu hatene kona-ba oinsá sira laʼo ba oin iha lia-loos. Irmaun sira-neʼe prontu atu fó sira-nia an hodi halo ‘serbisu ba ita-nia diʼak’. (2 Korinto 8:23) Nuneʼe, diʼak atu ita banati-tuir sira-nia fiar, no sira-nia ezemplu diʼak kona-ba serbí Maromak.​—Ebreu 13:7.

• Saida mak objetivu husi katuas área nia vizita ba kongregasaun sira?

• Oinsá mak Ita bele hetan benefísiu husi sira-nia vizita?

Kuandu dezastre ruma mosu, Testemuña ba Jeová buka dalan kedas atu ajuda maluk sira neʼebé kona dezastre. Ami-nia hakaʼas an atu fó ajuda hatudu duni katak ami iha domin neʼebé loos ba malu. (João 13:34, 35; 1 João 3:17, 18) Iha dalan saida deʼit mak ami fó ajuda?

Hodi fó osan. Kuandu rai-hamlaha kona rai-Judeia, ema Kristaun iha Antiokia ajuda sira-nia maluk hodi haruka osan ba sira. (Apóstolu 11:27-30) Nuneʼe mós, kuandu ami rona katak ami-nia maluk sira iha fatin seluk hasoru susar, ami mós fó osan kontribuisaun liuhusi kongregasaun atu ajuda sira.​—2 Korinto 8:13-15.

Fó ajuda neʼebé sira presiza. Bainhira dezastre akontese, katuas kongregasaun sira sei buka-hatene irmaun-irmán hotu iha sira-nia kongregasaun hodi haree katak sira seguru. Iha tempu hanesan neʼe, grupu neʼebé fó ajuda iha tempu dezastre arranja atu fó ai-han, bee moos, roupa, hela-fatin, ai-moruk no mós tratamentu ba vítima sira. Testemuña barak neʼebé iha matenek oioin, sai voluntáriu hodi bá fatin sira-neʼe atu ajuda irmaun-irmán sira neʼebé sai vítima, ka atu ajuda hadiʼa uma no Reuniaun-Fatin sira. Ami-nia organizasaun serbisu ho unidade no ami iha ona esperiénsia barak kona-ba fó ajuda iha tempu susar. Tan neʼe ami bele haruka kedas ajuda kuandu dezastre mosu. Maski ami buka atu ajuda ami-nia “maluk fiar-naʼin”, maibé ami mós buka oportunidade atu ajuda ema seluk.​—Galásia 6:10.

Fó kmaan hodi uza eskritura. Baibain, vítima ba dezastre presiza atu hetan kmaan. Iha tempu susar hanesan neʼe, Maromak Jeová mak ida neʼebé bele fó forsa mai ita, tanba nia mak “Maromak neʼebé fó kmaan ba ema iha situasaun hotu”. (2 Korinto 1:3, 4) Ami kontente atu fahe Bíblia nia promesa ba sira neʼebé iha susar laran. Maromak promete katak lakleur tan ninia Ukun sei halakon dezastre hotu neʼebé halo ema terus.​—Apokalipse 21:4.

• Tanbasá mak Testemuña sira bele ajuda kedas sira-nia maluk neʼebé kona dezastre?

• Oinsá mak ami fó kmaan ba sira neʼebé kona dezastre?

Antes Jesus mate, nia koʼalia ho ninia dixípulu naʼin-haat, Pedro, Tiago, João, no André. Bainhira Jesus fó-hatene ba sira kona-ba sinál sira neʼebé sei hatudu katak nia toʼo ona mai durante loron ikus sira, nia husu sira pergunta ida neʼebé importante: “Sé loos mak atan laran-metin no matenek neʼebé ninia naʼi hili atu tau matan ba naʼi nia atan sira, atu fó ai-han ba sira iha tempu loloos?” (Mateus 24:3, 45; Marcos 13:3, 4) Ho liafuan sira-neʼe, Jesus ajuda ninia dixípulu sira fiar katak nia, nuʼudar sira-nia “naʼi”, sei hili ema atu fó ai-han espirituál ba ninia dixípulu sira durante mundu neʼe nia rohan. Sé mak atan neʼe neʼebé Jesus hili?

Atan neʼe mak grupu kiʼik ida husi Jesus nia dixípulu neʼebé Maromak hili ho espíritu santu. Ohin loron, “atan” neʼe mak sira neʼebé serbí nuʼudar Grupu Administradór husi Testemuña ba Jeová. Atan neʼe fó ai-han espirituál iha tempu loloos ba ema hotu neʼebé adora Jeová. Ita presiza duni atan neʼe atu fó ‘ai-han neʼebé ita presiza iha tempu loloos’.—Lucas 12:42.

Atan neʼe tau matan ba Maromak nia umakain. (1 Timóteo 3:15) Jesus fó responsabilidade boot ba atan neʼe atu tau matan ba serbisu neʼebé Jeová nia organizasaun parte rai nian halo. Neʼe inklui tau matan ba organizasaun nia osan, sasán, dirije serbisu haklaken, no hanorin ita liuhusi kongregasaun. Tan neʼe, atu fó buat neʼebé ita presiza iha tempu loloos, “atan laran-metin no matenek”, fó ai-han espirituál liuhusi livru sira neʼebé ita uza iha serbisu haklaken, no mós liuhusi informasaun neʼebé ita rona iha reuniaun no reuniaun boot sira.

Atan neʼe laran-metin ba lia-loos husi Bíblia no ba knaar atu haklaken liafuan diʼak, no mós matenek atu tau matan ba buat hotu neʼebé Kristu nian iha rai. (Apóstolu 10:42) Maromak Jeová haraik bensaun ba atan neʼe hodi halibur ema barak liután atu sai ninia testemuña sira, no ajuda atan neʼe atu fó ai-han espirituál barak.—Isaias 60:22; 65:13.

• Jesus hili sé atu fó ai-han espirituál ba ninia dixípulu sira?

• Iha dalan saida deʼit mak atan neʼe hatudu laran-metin no matenek?

Iha apóstolu sira-nia tempu, iha grupu kiʼik ida iha Jeruzalein, katak “apóstolu no katuas sira” neʼebé serbí nuʼudar grupu administradór hodi halo desizaun importante neʼebé lori benefísiu ba kongregasaun Kristaun neʼebé iha esperansa atu bá lalehan. (Apóstolu 15:2) Atu foti desizaun ho laran ida deʼit, ulukliu sira koʼalia hamutuk kona-ba saida mak Eskritura hatete no halo tuir matadalan husi espíritu santu. (Apóstolu 15:25) Ohin loron, Grupu Administradór mós halo hanesan neʼe.

Grupu Administradór halaʼo Maromak nia hakarak. Ohin loron, irmaun sira neʼebé serbí nuʼudar Grupu Administradór iha duni interese ba Maromak nia Liafuan no iha esperiénsia barak kona-ba oinsá atu dirije Maromak nia serbisu. Semana-semana, sira halo reuniaun atu koʼalia kona-ba Maromak nia povu nia presiza iha mundu tomak. Hanesan grupu administradór iha apóstolu sira-nia tempu, sira mós fó matadalan husi Bíblia liuhusi karta ka liuhusi katuas sira neʼebé bá vizita kongregasaun. Ida-neʼe ajuda Maromak nia povu iha mundu tomak atu iha hahalok no hanoin neʼebé hanesan. (Apóstolu 16:4, 5) Grupu Administradór tau matan ba serbisu atu prepara ai-han espirituál, no sira anima ita hotu atu haklaken ho badinas. Sira mós tau matan ba serbisu atu fó knaar ba irmaun sira neʼebé kumpre kritéria husi Bíblia.

Grupu Administradór halo tuir matadalan husi espíritu santu. Grupu Administradór buka matadalan husi Maromak Jeová, Ukun-Naʼin Boot Liu, no husi Jesus, kongregasaun nia Ulun. (1 Korinto 11:3; Éfeso 5:23) Irmaun sira neʼebé serbí nuʼudar Grupu Administradór la haree sira-nia an nuʼudar ulun ba Maromak nia povu. Sira, hamutuk ho ema Kristaun hotu neʼebé iha esperansa atu bá lalehan, “laʼo tuir Bibi-Oan [Jesus] ba fatin naran deʼit neʼebé nia bá”. (Apokalipse 14:4) Grupu Administradór agradese tebes kuandu ita temi sira iha ita-nia orasaun.

• Sé-sé deʼit mak serbí nuʼudar grupu administradór iha apóstolu sira-nia tempu?

• Ohin loron, oinsá mak Grupu Administradór buka Maromak nia matadalan?

Iha lian Ebraiku, naran Betel signifika “Maromak nia uma”. (Génesis 28:17, 19, nota-rodapé) Tan neʼe, Testemuña ba Jeová hanaran fatin neʼebé sira uza atu dirije no apoia serbisu haklaken nuʼudar Betel. Grupu Administradór serbí iha sede-jerál iha Novaiorke, Estadus Unidus, no sira tau matan ba serbisu iha sukursál sira iha rai oioin. Ema neʼebé serbí iha sede-jerál no iha sukursál sira, bolu nuʼudar família Betel. Hanesan família ida, sira hela, han, serbisu, no estuda Bíblia hamutuk ho unidade.​—Salmo 133:1.

Ema neʼebé serbí iha Betel prontu atu halo sakrifísiu. Iha Betel, irmaun no irmán sira prontu atu serbí Maromak tempu-tomak hodi halo ninia hakarak. (Mateus 6:33) Sira la simu saláriu maibé sira hetan hahán, hela-fatin, no osan natoon atu uza ba sira-nia presiza. Sira ida-idak simu knaar neʼebé la hanesan, balu simu knaar atu serbisu iha eskritóriu, iha dapur ka iha fatin atu han. Balu serbisu iha fatin atu halo livru, ka hamoos kuartu, fase roupa, tau matan ba buat oioin, ka halo serbisu seluk tan.

Serbisu hotu iha Betel apoia serbisu haklaken. Betel hotu nia objetivu mak atu ajuda habelar lia-loos husi Bíblia ba ema barak liután iha mundu. Oinsá mak sira neʼebé serbisu iha Betel halo ida-neʼe? Hanoin toʼok kona-ba broxura neʼebé ita lee daudaun. Grupu Administradór mak dirije sira neʼebé hakerek broxura ida-neʼe, no irmaun sira haruka informasaun neʼe liuhusi internét ba grupu tradutór atus ba atus iha rai oioin. Depois neʼe, sira neʼebé serbisu iha fatin atu halo livru, print broxura neʼe hodi uza mákina boot, no ikusmai haruka broxura neʼe ba maizumenus kongregasaun 120.000. Ho ida-neʼe, família Betel hola parte iha serbisu neʼebé importante liu, neʼe mak haklaken liafuan diʼak.​—Marcos 13:10.

• Sé-sé deʼit mak serbí iha Betel? Sira simu ajuda saida deʼit?

• Betel ida-idak apoia serbisu importante saida?

Irmaun-irmán iha sukursál halo serbisu iha departamentu oioin atu apoia serbisu haklaken iha rai sira neʼebé sukursál neʼe tau matan. Sira tradús livru sira, print no halo livru, rai livru sira, halo gravasaun ka vídeo, ka serbisu seluk tan.

Komisaun ba Sukursál mak tau matan ba serbisu iha sukursál. Iha sukursál ida-idak, Grupu Administradór fó knaar ba Komisaun ba Sukursál atu tau matan ba serbisu hotu neʼebé halaʼo iha sukursál. Baibain katuas naʼin-tolu ka liu neʼebé iha esperiénsia barak mak serbí nuʼudar Komisaun ba Sukursál. Komisaun neʼe fó-hatene ba Grupu Administradór kona-ba oinsá serbisu haklaken laʼo ba oin no mós kona-ba problema ruma neʼebé mosu iha rai neʼebé sukursál tau matan. Informasaun sira-neʼe ajuda Grupu Administradór atu deside kona-ba saida deʼit mak sei fó sai iha livru sira, reuniaun sira, no reuniaun boot sira. Dala ruma, Grupu Administradór haruka irmaun ida atu reprezenta sira hodi vizita sukursál. Baibain irmaun neʼe fó matadalan ba Komisaun ba Sukursál kona-ba oinsá sira bele halaʼo sira-nia knaar diʼak liután. (Provérbios 11:14) Iha semana neʼebé irmaun neʼe vizita sukursál, baibain nia halaʼo programa espesiál. Programa neʼe inklui mós diskursu neʼebé hametin irmaun-irmán sira iha rai neʼebé sukursál neʼe tau matan.

Sukursál ajuda kongregasaun sira. Irmaun balu iha sukursál simu responsabilidade atu fó lisensa hodi forma kongregasaun foun. Irmaun sira iha sukursál mós dirije serbisu neʼebé pioneiru, misionáriu no katuas área sira halaʼo iha rai neʼebé sukursál neʼe tau matan. Sira organiza reuniaun boot sira, serbisu atu harii Reuniaun-Fatin foun, no mós halo arranju atu kongregasaun ida-idak simu livru neʼebé sira presiza. Serbisu hotu neʼebé halaʼo iha sukursál sira, ajuda atu serbisu haklaken laʼo ho diʼak no la runguranga.​—1 Korinto 14:33, 40.

• Oinsá mak Komisaun ba Sukursál sira apoia Grupu Administradór?

• Sukursál sira tau matan ba serbisu importante saida deʼit?

Atu bele haklaken “liafuan diʼak” ba “nasaun, suku, língua no povu hotu”, ami halo ona livru sira iha língua 900 liu. (Apokalipse 14:6) Oinsá mak ami bele halo serbisu boot neʼe? Neʼe tanba ami iha hakerek-naʼin iha rai oioin no ami mós iha irmaun-irmán barak neʼebé halo serbisu atu tradús livru sira.

Ulukliu informasaun sira hakerek iha lian Inglés. Grupu Administradór tau matan ba serbisu neʼebé Departamentu Hakerek nian halo iha sede-jerál. Departamentu neʼe organiza serbisu ba hakerek-naʼin sira iha sede-jerál no mós iha sukursál balu. Tanba hakerek-naʼin sira mai husi rai oioin, ida-neʼe ajuda ami atu fó sai informasaun neʼebé diʼak ba ema hotu iha mundu tomak.

Haruka informasaun ba tradutór sira. Depois Departamentu Hakerek nian hadiʼa informasaun hotu no hetan lisensa, sira haruka ida-neʼe liuhusi internét ba grupu tradutór sira iha rai oioin. Grupu sira-neʼe hakaʼas an atu tradús ho loloos informasaun husi lian Inglés ba sira-nia língua rasik, hodi uza “liafuan neʼebé loos”.​—Eclesiastes 12:10.

Komputadór ajuda atu halo serbisu lalais liu. Komputadór sira labele halo ema nia serbisu atu hakerek no tradús. Maski nuneʼe, hodi uza programa oioin iha komputadór, ida-neʼe ajuda tradutór sira halo serbisu lalais liu. Testemuña ba Jeová halo programa komputadór ida naran MEPS (Multilanguage Electronic Publishing System). Bele hatama testu iha língua atus ba atus ba programa neʼe no tau testu neʼe hamutuk ho dezeñu hodi bele sai livru neʼebé prontu atu print.

Tanbasá mak ami-nia organizasaun hakaʼas an atu tradús livru sira ba língua oioin? Ami halo ida-neʼe tanba Maromak Jeová hakarak “ema hotu hetan salvasaun no hetan koñesimentu neʼebé loos kona-ba lia-loos”.​—1 Timóteo 2:3, 4.

• Serbisu atu hakerek ami-nia livru sira envolve saida deʼit?

• Tanbasá mak ami-nia organizasaun hakaʼas an atu tradús livru sira ba língua barak?

Tinan-tinan, ami-nia organizasaun halo no fahe Bíblia no publikasaun rihun ba rihun, no ami la husu ema atu selu. Ami harii no tau matan ba Reuniaun-Fatin no sukursál sira. Ami tau matan ema Betel rihun ba rihun, misionáriu sira, no mós fó ajuda kuandu dezastre mosu. Karik Ita hanoin: ‘Osan neʼebé Testemuña sira uza mai husi neʼebé?’

Ami nunka obriga ema atu fó osan. Maski ami presiza osan barak atu apoia ami-nia serbisu haklaken, maibé ami la husu ezmola. Maizumenus tinan atus ida liubá, iha edisaun segundu husi revista Watchtower, ami hatete katak ami fiar Maromak Jeová mak apoia ami no ami sei “nunka husu ezmola husi ema seluk atu apoia ami”. Liafuan sira-neʼe sai loos duni tanba toʼo agora ami la husu ezmola.​—Mateus 10:8.

Ami-nia serbisu hetan apoiu husi kontribuisaun neʼebé ema fó ho hakarak rasik. Ema barak hafolin ami-nia serbisu atu hanorin Bíblia, tan neʼe sira fó kontribuisaun. Testemuña sira kontente atu uza sira-nia tempu, forsa, osan, no buat seluk tan atu halaʼo Maromak nia hakarak iha mundu tomak. (1 Krónikas 29:9) Iha ami-nia Reuniaun-Fatin no fatin sira neʼebé ami uza atu halaʼo reuniaun boot, iha kaixa kontribuisaun ba sira neʼebé hakarak fó kontribuisaun. Ita mós bele fó kontribuisaun liuhusi sítiu jw.org^®. Osan neʼebé ami simu, barak liu mai husi ema neʼebé la riku, hanesan ho feto-faluk kiak neʼebé Jesus koʼalia. Jesus gaba feto-faluk neʼe tanba nia ho laran fó osan kiʼik rua neʼebé folin kiʼik tebes nuʼudar kontribuisaun ba templu. (Lucas 21:1-4) Nuneʼe, ema ida-idak bele “tau ketak” buat neʼebé nia “deside ona iha laran” atu fó ho hakarak rasik.​—1 Korinto 16:2; 2 Korinto 9:7.

Ami fiar katak Maromak Jeová sei kontinua book sira neʼebé hakarak ‘hahiʼi nia ho sira-nia sasán neʼebé folin-boot’ hodi apoia serbisu haklaken, atu nuneʼe Maromak nia hakarak sai loos.​—Provérbios 3:9.

• Tanbasá mak ami-nia organizasaun la hanesan ho relijiaun seluk?

• Oinsá mak ami uza kontribuisaun neʼebé ema fó ho hakarak rasik?

Kuandu Jesus haklaken iha rai, nia koʼalia liuliu kona-ba Maromak nia Ukun. Iha ami-nia Reuniaun-Fatin, ami mós aprende kona-ba Ukun neʼe no mós Bíblia nia hanorin seluk.​—Lucas 8:1.

Reuniaun-Fatin uza atu halaʼo adorasaun loos. Baibain Testemuña ba Jeová organiza serbisu haklaken iha Reuniaun-Fatin. (Mateus 24:14) Ami-nia Reuniaun-Fatin sira iha modelu oioin, no iha laran ho liʼur haree simples deʼit. Dala barak, kongregasaun ida ka liu uza Reuniaun-Fatin ida. Durante tinan hirak-neʼe, ami-nia organizasaun harii no hadiʼa ona Reuniaun-Fatin rihun ba rihun, neʼe katak maizumenus Reuniaun-Fatin 5 kada loron ida. Ami halo ida-neʼe tanba Testemuña ba Jeová iha mundu tomak sai barak ba beibeik. Maibé, oinsá mak ami bele harii Reuniaun-Fatin barak hanesan neʼe?​—Mateus 19:26.

Osan atu harii Reuniaun-Fatin mai husi kontribuisaun. Kontribuisaun sira-neʼe haruka ba sukursál hodi nuneʼe bele fó fali ba kongregasaun seluk neʼebé presiza harii ka hadiʼa sira-nia Reuniaun-Fatin.

Sira neʼebé harii Reuniaun-Fatin la manán osan. Iha rai barak, ami-nia organizasaun organiza Grupu sira neʼebé Harii Reuniaun-Fatin. Ema sira iha grupu sira-neʼe, muda husi fatin ida ba fatin seluk, inklui mós fatin sira neʼebé dook husi sidade atu ajuda kongregasaun sira harii Reuniaun-Fatin. Iha rai seluk, Testemuña sira neʼebé kumpre kritéria hetan knaar atu dirije serbisu atu hadiʼa ka harii Reuniaun-Fatin iha área neʼebé sira tau matan. Dala barak irmaun-irmán sira neʼebé iha esperiénsia nuʼudar badaen mai husi fatin seluk atu ajuda, maibé irmaun-irmán sira husi kongregasaun mós halo serbisu barak. Ema hotu neʼebé halo serbisu atu harii Reuniaun-Fatin la manán osan. Ami bele halo buat hotu neʼe tanba ajuda husi Jeová nia espíritu santu no ninia povu nia hakaʼas an.​—Salmo 127:1; Koloso 3:23.

• Tanbasá ami harii Reuniaun-Fatin?

• Oinsá mak ami-nia organizasaun bele harii Reuniaun-Fatin rihun ba rihun iha mundu tomak?

Reuniaun-Fatin ida-idak husi Testemuña ba Jeová lori Maromak nia naran neʼebé santu. Tan neʼe, ami hotu kontente hola parte atu hamoos, tau matan, no halo Reuniaun-Fatin haree kapás. Ami haree serbisu atu tau matan ba Reuniaun-Fatin nuʼudar parte importante ba ami-nia adorasaun. Ema hotu iha kongregasaun bele hola parte.

Ajuda hamoos depois reuniaun. Depois reuniaun ida-idak, irmaun no irmán sira kontente atu hamoos no haloot buat hotu iha Reuniaun-Fatin. Katuas ka atan ba kongregasaun mak dirije serbisu atu hamoos, no baibain sira uza lista kona-ba buat neʼebé sira presiza halo. Irmaun-irmán sira ajuda dasa rai, hamoos janela, hamoos hariis-fatin, hadiʼa kadeira sira, soe foʼer, ka hamoos Reuniaun-Fatin nia liʼur. Tinan ida dala ida, kongregasaun uza loron ida tomak atu hamoos didiʼak buat hotu iha Reuniaun-Fatin. Hodi husik labarik sira hola parte atu hamoos Reuniaun-Fatin, neʼe hanorin sira atu hafolin fatin neʼebé ami uza atu adora Maromak.​—Eclesiastes 5:1.

Ajuda hadiʼa buat neʼebé aat. Tinan-tinan, irmaun sira haree didiʼak buat hotu iha Reuniaun-Fatin nia laran no liʼur. Kuandu sira haree buat ruma aat maski ida-neʼe kiʼik deʼit, sira hadiʼa kedas. Hodi halo nuneʼe, Reuniaun-Fatin haree diʼak nafatin no ida-neʼe ajuda kongregasaun atu la gasta osan barak. (2 Krónikas 24:13; 34:10) Reuniaun-Fatin neʼebé moos no diʼak mak fatin neʼebé lori glória ba Maromak neʼebé loos. Kuandu ami hola parte atu tau matan ba Reuniaun-Fatin, ami hatudu katak ami hadomi Maromak Jeová no hafolin fatin neʼebé ami uza atu adora nia. (Salmo 122:1) Ida-neʼe mós bele fó sasin diʼak ba ema seluk.​—2 Korinto 6:3.

• Tanbasá mak ami presiza tau matan ba fatin neʼebé ami uza atu adora Maromak?

• Arranju saida deʼit mak ami halo atu Reuniaun-Fatin moos nafatin?

Ita hakarak buka informasaun atu bele aumenta Ita-nia koñesimentu kona-ba Bíblia ka lae? Ita hakarak atu hatene liután kona-ba eskritura, ema ka fatin neʼebé temi iha Bíblia laran ka lae? Ka Ita hakarak hatene oinsá Maromak nia Liafuan bele ajuda Ita bainhira hasoru problema ruma ka lae? Se nuneʼe, Ita bele uza biblioteka iha Reuniaun-Fatin.

Biblioteka iha livru oioin atu buka informasaun. Karik iha uma, Ita la iha livru hotu neʼebé Testemuña ba Jeová fó sai ona iha Ita-nia língua. Maibé biblioteka iha Reuniaun-Fatin iha livru barak husi ami-nia organizasaun. Karik iha mós tradusaun Bíblia balu, disionáriu, no livru sira seluk tan. Antes no depois reuniaun, Ita bele uza livru sira iha biblioteka. Se iha komputadór iha biblioteka laran, baibain komputadór neʼe iha programa Watchtower Library. Programa neʼe iha livru barak neʼebé ami-nia organizasaun halo husi tempu uluk toʼo agora. Fasil tebes atu uza programa neʼe, Ita bele buka informasaun kona-ba tópiku ida, liafuan ka eskritura ruma.

Livru sira iha biblioteka bele ajuda estudante prepara ba reuniaun Moris Kristaun no Haklaken. Ita bele uza biblioteka kuandu Ita prepara Ita-nia diskursu ka knaar ba reuniaun. Katuas ba reuniaun Moris Kristaun no Haklaken mak tau matan ba biblioteka. Nia iha responsabilidade atu tau livru foun sira iha biblioteka no haree katak livru hotu tau ho didiʼak. Katuas neʼe ka ema neʼebé estuda Bíblia ho Ita, bele ajuda Ita atu buka informasaun neʼebé Ita presiza. Maibé, labele lori livru sira-neʼe ba uma, no ita hotu hakarak uza livru sira ho kuidadu no la riska ka la hakerek buat ruma iha livru sira.

Bíblia esplika katak atu bele “hetan koñesimentu kona-ba Maromak”, ita presiza hakaʼas an atu buka ida-neʼe “hanesan buka rikusoin neʼebé subar hela”. (Provérbios 2:1-5) Biblioteka iha Reuniaun-Fatin bele ajuda Ita atu buka rikusoin neʼe.

• Ita bele hetan livru saida deʼit iha biblioteka iha Reuniaun-Fatin?

• Sé mak bele ajuda Ita atu uza biblioteka?

Jesus hatete ba ninia dixípulu sira: “Husik imi-nia naroman nabilan iha ema nia oin, atu sira bele haree imi-nia hahalok diʼak no fó hahiʼi ba imi-nia Aman neʼebé iha lalehan.” (Mateus 5:16) Atu halo ida-neʼe, ami uza teknolojia, inklui mós internét. Ami-nia sítiu ofisiál jw.org^® fó sai informasaun kona-ba ami-nia fiar no atividade sira. Saida deʼit mak Ita bele hetan iha sítiu neʼe?

Ita bele hetan Bíblia nia resposta ba pergunta neʼebé ema barak husu. Iha ami-nia sítiu, Ita bele hetan resposta ba pergunta importante sira. Porezemplu, Ita bele hetan panfletu sira ho títulu Terus hotu sei lakon ka lae? no Ema neʼebé mate ona bele moris fali ka lae? iha língua 800 liu. Ita mós bele hetan Bíblia Tradusaun Mundu Foun iha língua 160 liu, no livru sira seluk neʼebé ajuda ema atu komprende Bíblia, inklui mós livru Ita Bele Komprende Bíblia! no mós revista Matan-moris bá! no Livru Haklaken. Ita bele lee ka rona gravasaun ba publikasaun sira-neʼe iha ami-nia sítiu, ka bele download PDF, EPUB, ka MP3. Se Ita hasoru ema neʼebé interese ba Bíblia, Ita bele print informasaun ruma iha ninia língua rasik no fó ba nia. Iha sítiu neʼe, Ita mós bele hetan vídeo iha língua oioin ba ema tilun-diuk. Bele mós download múzika furak, no drama sira kona-ba Bíblia.

Informasaun loos kona-ba Testemuña ba Jeová. Iha ami-nia sítiu, Ita mós bele hetan notísias foun no vídeo badak sira kona-ba ami-nia serbisu iha mundu tomak, akontesimentu importante sira neʼebé kona Testemuña ba Jeová, no oinsá ami-nia organizasaun fó ajuda kuandu dezastre mosu. Ita mós bele hetan data no fatin ba reuniaun boot sira, no mós sukursál sira-nia diresaun no númeru kontaktu.

Liuhusi dalan sira-neʼe, ami halo lia-loos sai naroman iha mundu tomak. Ema husi rai oioin iha mundu, inklui mós sira neʼebé hela iha fatin neʼebé malirin no dook tebes hanesan iha Antártika, bele hatene lia-loos liuhusi ami-nia sítiu. Ami hein katak “Jeová nia liafuan nafatin habelar ho lalais” ba mundu tomak hodi fó glória ba nia.​—2 Tesalónika 3:1.

• Oinsá mak sítiu jw.org^® ajuda ema barak atu hatene lia-loos?

• Saida deʼit mak Ita hakarak haree iha ami-nia sítiu?