Ema barak la asiste tan relijiaun nia adorasaun, tanba sira la hetan kmaan no la hetan resposta ba sira-nia pergunta importante kona-ba moris. Se nuneʼe, tanbasá mak diʼak atu Ita tuir reuniaun sira husi Testemuña ba Jeová? Saida deʼit mak Ita bele hetan bainhira tuir reuniaun sira-neʼe?

Ita bele hetan ksolok tanba hamutuk ho ema neʼebé hadomi malu. Iha apóstolu sira-nia tempu, ema Kristaun sira halibur hamutuk nuʼudar kongregasaun, no sira halaʼo reuniaun sira atu adora Maromak, atu estuda Eskritura sira, no atu fó laran-manas ba malu. (Ebreu 10:24, 25) Tanba sira halibur hamutuk ho sira-nia maluk Kristaun neʼebé hadomi malu, sira sente hanesan sira hamutuk ho belun neʼebé loos. (2 Tesalónika 1:3; 3 João 14) Ohin loron, ami halo tuir sira-nia ezemplu, no ami mós hetan ksolok.

Ita sei aprende oinsá atu moris tuir Bíblia nia matadalan. Iha ami-nia reuniaun sira, mane, feto no mós labarik sira halibur hamutuk, hanesan ema halo iha fiar-naʼin sira-nia tempu. Ema balu neʼebé kumpre ona kritéria atu hanorin, ajuda ita atu aplika Bíblia nia matadalan iha ita-nia moris loroloron. (Deuteronómio 31:12; Neemias 8:8) Ema hotu iha oportunidade atu fó sai sira-nia esperansa hodi fó komentáriu no kanta knananuk sira.​—Ebreu 10:23.

Ita-nia fiar ba Maromak sai metin liután. Apóstolu Paulo fó-hatene ba kongregasaun ida: “Haʼu hakarak tebes atu hasoru imi, . . . atu ita bele anima no hametin malu liuhusi ita-nia fiar, imi-nia fiar no mós haʼu-nian.” (Roma 1:11, 12) Iha reuniaun sira, ita hasoru beibeik maluk Kristaun sira, ida-neʼe hametin ita-nia fiar no fó aten-brani ba ita atu moris tuir Bíblia nia matadalan.

Ami konvida Ita atu tuir ami-nia reuniaun sira hodi Ita mós bele hetan benefísiu sira neʼebé temi iha leten. Ami sei kontente atu simu Ita. Ita la presiza selu atu tuir reuniaun sira, no ami mós la husu ezmola.

• Ami halaʼo reuniaun sira hodi tuir sé-nia ezemplu?

• Benefísiu saida deʼit mak Ita bele hetan hodi tuir ami-nia reuniaun sira?

Ami hakaʼas an atu tuir beibeik reuniaun Kristaun sira, maski ami balu presiza laʼo liuhusi ai-laran ka maski udan-boot. Ami mós hasoru susar oioin no sente kole bainhira ami halo tiha serbisu ba loron tomak. Maibé tanbasá mak ami hakaʼas an nafatin atu halibur an ho maluk fiar-naʼin sira?

Reuniaun ajuda ami atu tahan susar sira. Apóstolu Paulo anima kongregasaun atu “hanoin malu”. (Ebreu 10:24) Liafuan sira-neʼe fó ideia katak ema Kristaun tenke koñese didiʼak ninia maluk sira. Hodi koñese didiʼak irmaun no irmán sira iha kongregasaun, ami aprende katak sira balu tahan hasoru susar neʼebé ami mós hasoru, no sira-nia ezemplu bele ajuda ami atu tahan hasoru susar sira-neʼe.

Reuniaun ajuda ami atu hetan belun neʼebé diʼak. Iha reuniaun sira, ami halibur hamutuk ho ami-nia belun sira. Dala ruma, ami mós uza tempu atu ransu hamutuk. Neʼe lori benefísiu saida? Ami aprende atu hafolin malu liután, no ida-neʼe hametin ami-nia domin ba malu. Rezultadu mak kuandu ami-nia maluk sira hasoru problema, ami prontu atu ajuda sira tanba ami iha ona relasaun neʼebé metin nuʼudar belun. (Provérbios 17:17) Hodi ransu ho ema ida-idak iha kongregasaun, ami hatudu katak ami “hanoin malu”.​—1 Korinto 12:25, 26.

Ami anima Ita atu hili belun neʼebé halo tuir Maromak nia hakarak. Ita sei hetan belun diʼak hanesan neʼe iha Testemuña ba Jeová sira-nia leet. Favór ida, labele husik buat ida hapara Ita atu ransu ho ami.

• Oinsá mak halibur hamutuk iha reuniaun sira ajuda ami?

• Ita bele buka tempu atu tuir ami-nia reuniaun sira ka lae?

Reuniaun iha ema Kristaun nia tempu inklui kanta knananuk, halo orasaun, lee no koʼalia hamutuk kona-ba eskritura sira. (1 Korinto 14:26) Ohin loron ami mós halaʼo ami-nia reuniaun iha dalan neʼebé hanesan.

Hanorin sira bazeia ba Bíblia no lori benefísiu. Iha findesemana, kongregasaun ida-idak halibur hamutuk hodi rona Diskursu kona-ba Bíblia ba minutu 30. Diskursu neʼe esplika oinsá eskritura sira kona ita-nia moris rasik no mós situasaun ohin loron. Ema hotu neʼebé tuir reuniaun bele akompaña hodi uza sira-nia Bíblia rasik. Depois diskursu, ami halaʼo Estudu “Livru Haklaken” ba oras ida. Iha estudu neʼe, ema hotu bele hola parte hodi fó komentáriu. Lisaun ida-idak ajuda ita atu aplika Bíblia nia matadalan iha ita-nia moris. Semana-semana, maizumenus kongregasaun hamutuk 120.000 iha mundu tomak estuda lisaun neʼebé hanesan.

Ami hetan ajuda atu aumenta ami-nia matenek atu hanorin. Ami mós halibur hamutuk dala ida iha loron baileet hodi halaʼo reuniaun Moris Kristaun no Haklaken neʼebé iha parte tolu. Informasaun iha reuniaun neʼe bazeia ba livru Moris Kristaun no Haklaken Programa no nota. Parte primeiru mak Rikusoin husi Bíblia, neʼe ajuda ami atu hatene didiʼak parte balu husi Bíblia neʼebé ami lee nanis ona. Parte tuirmai mak Treinu kona-ba Haklaken neʼebé inklui drama kiʼik kona-ba oinsá atu fahe mensajen husi Bíblia ba ema. Aprezentadór sei haree didiʼak hodi fó sujestaun ba ami kona-ba oinsá bele hadiʼa dalan neʼebé ami lee no koʼalia. (1 Timóteo 4:13) Parte ikus mak Moris nuʼudar Ema Kristaun. Parte neʼe koʼalia kona-ba oinsá aplika Bíblia nia matadalan iha moris loroloron nian. Neʼe mós inklui diskursu ho pergunta no resposta atu aumenta ami-nia matenek kona-ba Bíblia.

Kuandu Ita tuir ami-nia reuniaun, Ita mós bele aprende hanorin folin-boot husi Bíblia.​—Isaias 54:13.

• Saida deʼit mak Ita bele aprende husi ami-nia reuniaun sira?

• Reuniaun ida-neʼebé mak Ita hakarak tuir?

Se Ita haree foto sira iha broxura neʼe, Ita bele haree katak Testemuña ba Jeová hatais ho respeitu kuandu tuir reuniaun sira. Tanbasá dalan neʼebé ami hatais no hadiʼa an mak importante tebes?

Atu hatudu respeitu ba ami-nia Maromak. Buat neʼebé importante liu ba Maromak mak ema nia laran, laʼós buat neʼebé bele haree husi liʼur. (1 Samuel 16:7) Maski nuneʼe, kuandu ami halibur an hodi adora Maromak, ami hakarak atu hatudu respeitu ba nia no ba ami-nia maluk fiar-naʼin sira. Se ita atu bá hasoru liurai ka prezidente, ita sei hatais ho respeitu tanba ita hakarak hatudu respeitu ba liurai ka prezidente neʼe no ba ninia pozisaun. Nuneʼe mós, dalan neʼebé ami hatais kuandu tuir reuniaun sira hatudu katak ami respeita duni “Liurai rohan-laek” Maromak Jeová, no ami mós hatudu respeitu ba fatin neʼebé ami uza atu adora nia.​—1 Timóteo 1:17.

Atu hatudu katak ami moris tuir Bíblia nia matadalan sira. Bíblia anima ema Kristaun sira atu hatais “ho respeitu no ho hanoin neʼebé loos”. (1 Timóteo 2:9, 10) Hatais “ho respeitu” katak la hatais roupa neʼebé dada atensaun, aperta liu ka hatudu isin. “Hanoin neʼebé loos” ajuda ami atu hili roupa neʼebé diʼak no kabeer. Maibé neʼe la dehan katak ami la iha liberdade atu hili roupa neʼebé ami hakarak. Ami-nia hatais neʼebé hatudu respeitu “fó hahiʼi ba hanorin husi ita-nia Salvadór, Maromak”. (Tito 2:10; 1 Pedro 2:12) Hodi hatais ho respeitu bainhira tuir reuniaun sira, ida-neʼe bele book ema seluk atu iha hanoin diʼak kona-ba ami-nia adorasaun ba Maromak Jeová.

Ita bele tuir ami-nia reuniaun sira, maski ita la iha roupa neʼebé karun ka foun. Importante mak roupa neʼe moos, kabeer no hatudu respeitu.

• Tanbasá mak ami hatais ho respeitu kuandu tuir reuniaun sira?

• Bíblia nia matadalan saida deʼit mak ajuda ami kuandu hili roupa?

Se Ita estuda Bíblia ho Testemuña ba Jeová, karik Ita toman ona atu prepara nanis informasaun ba estuda ida-idak. Ita mós bele prepara nanis antes tuir reuniaun, neʼe sei lori benefísiu boot. Entaun diʼak atu haburas toman hodi prepara ba reuniaun sira.

Deside fatin no tempu atu estuda. Bainhira mak tempu diʼak ba Ita atu estuda? Ita bele estuda iha dadeer-saan antes halo Ita-nia serbisu ka iha kalan kuandu labarik sira toba ona. Se Ita ladún iha tempu, deside tempu hira mak Ita bele uza atu estuda no hakaʼas an atu la husik buat ida atu hanetik Ita. Buka fatin neʼebé hakmatek no labele husik buat ruma hanesan rádiu, televizaun, no telemovel atu atrapalla Ita. Se Ita loke Ita-nia estuda ho orasaun, neʼe sei ajuda Ita atu la hanoin resin kona-ba buat neʼebé akontese iha loron neʼe, no sei ajuda Ita atu tau atensaun ba Maromak nia Liafuan.​—Filipe 4:6, 7.

Riska informasaun, no prepara atu fó komentáriu. Ita bele komesa hodi buka atu komprende informasaun neʼe kona-ba saida. Hanoin kona-ba lisaun ka kapítulu nia tema, no oinsá subtítulu sira liga malu ho tema. Haree didiʼak dezeñu sira no hanoin kona-ba pergunta revizaun neʼebé fó sai pontu importante. Tuirmai, lee parágrafu ida-idak, no buka resposta ba pergunta sira. Lee eskritura sira, no hanoin oinsá neʼe liga malu ho informasaun. (Apóstolu 17:11) Se Ita hetan resposta, riska liafuan balu neʼebé sei ajuda Ita atu hanoin-hetan resposta. Depois neʼe, kuandu Ita tuir reuniaun, se Ita hakarak Ita bele foti liman no fó komentáriu badak ho Ita-nia liafuan rasik.

Bainhira Ita prepara nanis informasaun oioin neʼebé sei estuda iha reuniaun sira semana-semana, Ita sei aumenta liután Ita-nia matenek husi Bíblia neʼebé hanesan “rikusoin”.​—Mateus 13:51, 52.

• Ita bele haburas toman diʼak saida kona-ba prepara ba reuniaun sira?

• Oinsá mak Ita bele prepara an atu fó komentáriu iha reuniaun?

Husi tempu uluk kedas, Maromak Jeová hakarak família ida-idak atu uza tempu hamutuk hodi hametin sira-nia relasaun ho nia no mós ba malu. (Deuteronómio 6:6, 7) Tan neʼe, Testemuña ba Jeová uza tempu semana-semana atu halaʼo adorasaun família hamutuk iha dalan la formál. Sira koʼalia hamutuk kona-ba informasaun husi Bíblia neʼebé tuir família nia presiza. Maski Ita mesak, maibé Ita bele uza tempu neʼe atu estuda liután informasaun ruma neʼebé Ita hakarak hatene husi Bíblia no neʼe sei ajuda Ita atu hakbesik ba Maromak.

Ajuda ita atu hakbesik liután ba Jeová. Bíblia hatete: “Hakbesik ba Maromak, no nia sei hakbesik ba imi.” (Tiago 4:8) Hodi estuda Maromak nia Liafuan Bíblia, neʼe ajuda Ita atu hatene diʼak liután Maromak Jeová nia hahalok sira. Ita bele komesa adorasaun família nian hodi uza tempu atu lee Bíblia hamutuk nuʼudar família, karik bele lee tuir programa lee Bíblia nian husi reuniaun Moris Kristaun no Haklaken. Bele mós fahe kapítulu sira-neʼe ba ema ida-idak iha família laran hodi sira bele lee nanis, no tuirmai koʼalia hamutuk saida mak família aprende husi eskritura sira-neʼe.

Ajuda família atu hakbesik malu liután. Kuandu estuda Bíblia hamutuk, relasaun entre feen-laʼen, inan-aman no oan sira sai metin liután. Diʼak atu halaʼo adorasaun família nian iha dalan neʼebé halo família sente kontente no hakmatek, no halo família hein namanas ba adorasaun família nian tuirmai. Inan-aman sira bele hili informasaun oioin neʼebé diʼak tuir oan sira-nia idade, karik husi revista Matan-moris bá! no Livru Haklaken ka husi sítiu jw.org^®. Família sira mós bele koʼalia hamutuk kona-ba problema ruma neʼebé oan sira hasoru iha eskola no oinsá mak sira bele tahan hasoru problema neʼe. Ideia ida tan mak haree no koʼalia hamutuk kona-ba programa husi JW Broadcasting^® (tv.jw.org). Ka Ita mós bele treinu knananuk sira neʼebé sei kanta iha reuniaun tuirmai. Depois estuda, karik Ita bele han-hemu uitoan.

Hodi uza tempu atu adora Maromak Jeová hamutuk semana-semana, neʼe sei ajuda ema hotu iha família laran atu gosta estuda Maromak nia Liafuan. Kuandu halo nuneʼe, Maromak sei haraik bensaun ba Ita-nia hakaʼas an.​—Salmo 1:1-3.

• Tanbasá mak ami uza tempu atu halaʼo adorasaun família nian?

• Oinsá mak inan-aman bele halaʼo adorasaun família nian iha dalan neʼebé família hotu gosta atu tuir?

Tanbasá ema iha foto sira-neʼe kontente? Tanba sira tuir ami-nia reuniaun boot sira. Hanesan Maromak nia atan sira iha tempu uluk halibur hamutuk dala tolu tinan ida, ami mós hein namanas atu tuir reuniaun boot sira. (Deuteronómio 16:16) Tinan-tinan ami halaʼo reuniaun boot ba dala tolu. Reuniaun boot ba loron ida halaʼo dala rua, no reuniaun boot ba loron tolu halaʼo dala ida. Oinsá mak ami hetan benefísiu husi reuniaun boot sira-neʼe?

Hametin ami-nia relasaun nuʼudar irmaun-irmán. Hanesan ema Izraél sira haksolok hodi hahiʼi Maromak Jeová “iha kongregasaun boot nia leet”, ami mós haksolok atu adora Maromak hamutuk iha reuniaun boot sira. (Salmo 26:12; 111:1) Reuniaun boot sira fó oportunidade ba ami atu ransu ho ami-nia maluk Testemuña sira husi kongregasaun, distritu ka rai seluk. Família ida-idak hetan anima atu lori ai-han, hodi nuneʼe ami bele han hamutuk iha tempu deskansa, ida-neʼe mós halo ami kontente. (Apóstolu 2:42) Iha reuniaun boot sira, ami bele haree ho matan rasik domin no unidade entre “maluk fiar-naʼin hotu” iha mundu tomak.​—1 Pedro 2:17.

Ajuda ami atu sai maduru iha lia-loos. Ema Izraél sira iha tempu uluk hetan benefísiu bainhira sira “komprende ona liafuan” husi Eskritura neʼebé esplika ba sira. (Neemias 8:8, 12) Ami mós hafolin hanorin husi Bíblia neʼebé ami rona iha reuniaun boot sira. Baibain, tema ba reuniaun boot sira bazeia ba eskritura ida. Liuhusi diskursu no drama kiʼik sira, ami aprende oinsá atu halo tuir Maromak nia hakarak iha ami-nia moris. Ami sai laran-manas liután kuandu ami rona ami-nia maluk sira-nia esperiénsia, no oinsá sira tahan hasoru susar oioin iha sira-nia moris. Iha reuniaun boot ba loron tolu, baibain iha filme kona-ba istória ida husi Bíblia, no buat neʼebé ami aprende husi filme neʼe bele ajuda ami iha ami-nia moris loroloron nian. Iha reuniaun boot sira, ema neʼebé dedika an ona ba Maromak sei hetan batizmu.

• Tanbasá reuniaun boot sira mak tempu neʼebé kontente?

• Ita bele hetan benefísiu saida hodi tuir reuniaun boot sira?

Antes Jesus mate, nia hatete: “Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.” (Mateus 24:14) Oinsá mak ema bele kumpre serbisu haklaken neʼe iha mundu tomak? Hodi halo tuir ezemplu neʼebé Jesus hatudu kuandu nia iha mundu.—Lucas 8:1.

Ami bá vizita ema iha sira-nia uma. Jesus treinu ninia dixípulu sira oinsá atu haklaken husi uma ba uma. (Mateus 10:11-13; Apóstolu 5:42; 20:20) Nia fó área balu ba dixípulu sira atu haklaken. (Mateus 10:5, 6) Ohin loron, ami-nia serbisu haklaken mós organiza ho didiʼak, no kongregasaun ida-idak iha área neʼebé sira haklaken. Hodi halo nuneʼe, ami bele halo tuir Jesus nia liafuan atu “haklaken ba ema no fó sasin ho didiʼak”.​—Apóstolu 10:42.

Ami hakaʼas an atu haklaken iha fatin hotu. Jesus mós fó ezemplu diʼak hodi haklaken iha fatin públiku, hanesan iha tasi-ibun ka besik bee-posu. (Marcos 4:1; João 4:5-15) Ami mós koʼalia ba ema kona-ba Bíblia iha fatin oioin, hanesan iha dalan, iha ema nia serbisu-fatin, iha jardín, ka liuhusi telefone. Ami mós buka oportunidade atu haklaken ba ami-nia viziñu, kolega serbisu, kolega eskola, no família sira. Hodi haklaken iha dalan sira-neʼe, ema rihun ba rihun iha mundu tomak rona ona “liafuan diʼak kona-ba salvasaun”.​—Salmo 96:2.

Klaru katak Ita gosta tebes buat neʼebé Ita aprende kona-ba Maromak nia Ukun. Entaun, diʼak atu Ita mós fahe neʼe ba Ita-nia kolega no família sira. Hanoin-hetan, liafuan diʼak neʼe mós bele kona sira-nia moris.

• Saida mak “liafuan diʼak” neʼebé presiza haklaken ba mundu tomak?

• Oinsá mak Testemuña ba Jeová halo tuir Jesus nia ezemplu kona-ba haklaken?

Liafuan “pioneiru” bele signifika ema primeiru neʼebé tama iha área foun ida no loke dalan ba ema seluk atu tama ba área neʼe. Jesus mak hanesan pioneiru ida tanba husi lalehan nia tun mai mundu atu halo serbisu importante no loke dalan ba ema atu hetan salvasaun. (Mateus 20:28) Ohin loron, Jesus nia dixípulu sira halo tuir nia hodi uza sira-nia tempu atu “hanorin” ema atu sai ninia dixípulu. (Mateus 28:19, 20) Ami-nia maluk balu hola parte iha serbisu neʼebé ami bolu serbisu pioneiru.

Pioneiru sira uza tempu barak atu haklaken. Testemuña ba Jeová hotu mak haklaken-naʼin neʼebé fó sai liafuan diʼak. Maibé, Testemuña balu serbí nuʼudar pioneiru regulár, no sira uza oras 70 fulan-fulan atu haklaken. Atu bele halo ida-neʼe, sira barak hamenus sira-nia tempu atu buka osan. Testemuña balu tan, simu knaar atu serbí nuʼudar pioneiru tempu-tomak iha fatin neʼebé presiza haklaken-naʼin. Sira uza oras 130 ka liu fulan-fulan atu haklaken. Sira neʼebé serbí nuʼudar pioneiru kontente atu moris simples deʼit tanba sira hatene katak Jeová sei fó buat neʼebé sira presiza. (Mateus 6:31-33; 1 Timóteo 6:6-8) Testemuña sira neʼebé labele serbí nuʼudar pioneiru regulár ka pioneiru tempu-tomak, bele serbí nuʼudar pioneiru estra hodi uza oras 30 ka 50 fulan ida atu haklaken.

Pioneiru sira haklaken tanba hadomi Maromak no ema. Hanesan Jesus, ami haree katak ema presiza duni atu hatene kona-ba Maromak no ninia hakarak. (Marcos 6:34) Ami iha liafuan diʼak neʼebé bele ajuda ema ohin loron, no fó sira esperansa kapás ba futuru. Domin ba ema seluk book pioneiru sira atu uza sira-nia tempu no forsa atu ajuda ema hatene lia-loos. (Mateus 22:39; 1 Tesalónika 2:8) Tanba sira halo ida-neʼe, sira-nia fiar sai metin liután, sira hakbesik liután ba Maromak, no hetan haksolok iha sira-nia moris.​—Apóstolu 20:35.

• Esplika toʼok saida mak pioneiru?

• Saida mak book Testemuña balu atu serbí nuʼudar pioneiru?

Husi tempu uluk, eskola kona-ba Bíblia mak importante ba Testemuña ba Jeová. Ami-nia organizasaun prepara eskola espesiál balu ba sira neʼebé uza sira-nia tempu tomak atu haklaken, atu sira bele ‘kumpre didiʼak sira-nia serbisu ba Maromak’.​—2 Timóteo 4:5.

Eskola Serbisu Pioneiru. Pioneiru regulár neʼebé serbí ona ba tinan ida ka liu bele tuir eskola neʼe. Eskola neʼe halaʼo durante loron neen no baibain halaʼo iha Reuniaun-Fatin. Objetivu ba eskola neʼe mak atu ajuda pioneiru sira hakbesik liután ba Jeová, atu haklaken iha dalan oioin ho diʼak liután, no atu kontinua serbí Maromak ho laran-metin.

Eskola ba Haklaken-Naʼin Tempu-Tomak. Eskola neʼe halaʼo durante fulan rua hodi fó treinu ba pioneiru sira neʼebé iha ona esperiénsia barak no prontu atu muda no serbí iha fatin neʼebé sukursál haruka sira atu bá. Sira banati-tuir Jesus Kristu nia ezemplu, nia mak Haklaken-Naʼin boot liu hotu neʼebé serbí iha rai. Sira halo tuir liafuan neʼebé dehan: “Haʼu mak neʼe! Haruka haʼu bá!” (Isaias 6:8; João 7:29) Sira presiza moris simples liu bainhira sira muda ba fatin neʼebé dook husi sira-nia hela-fatin. Karik sira mós presiza aprende kostume foun, tahan klima neʼebé la hanesan, no han ai-han neʼebé sira la toman. Dala ruma, sira mós presiza aprende língua foun. Eskola neʼe ajuda irmaun-irmán klosan sira no kaben-naʼin sira ho tinan 23 toʼo 65, atu haburas hahalok Kristaun nian neʼebé sira presiza iha sira-nia serbisu ba Maromak, no hetan matenek atu bele aumenta sira-nia serbisu iha Jeová nia organizasaun.

Eskola Gilead. Iha lian Ebraiku liafuan “Gilead” signifika “Fatuk butuk neʼebé nuʼudar sasin”. Husi tinan 1943, ema naʼin-8.000 liu tuir ona eskola Gilead no simu knaar atu sai misionáriu hodi fó sasin “iha mundu tomak” no sira hetan duni susesu. (Apóstolu 13:47) Bainhira misionáriu sira foin bá rai-Perú, la iha kongregasaun iha neʼebá, maibé agora iha ona kongregasaun 1.000 liu. Bainhira misionáriu foin komesa serbí iha rai-Japaun, Testemuña la toʼo ema naʼin-10, maibé agora iha ona ema naʼin-200.000 liu. Durante fulan lima, sira neʼebé tuir Eskola Gilead estuda Maromak nia Liafuan ho didiʼak. Pioneiru tempu-tomak, misionáriu, ema Betel, ka katuas área bele hetan konvite atu tuir eskola neʼe. Eskola neʼe treinu sira atu hametin no ajuda atu halo Maromak nia serbisu iha mundu tomak.

• Saida mak objetivu husi Eskola Serbisu Pioneiru?

• Sé-sé deʼit mak bele tuir Eskola ba Haklaken-Naʼin Tempu-Tomak?