Hodi estuda Bíblia ho Testemuña ba Jeová, Ita aprende ona lia-loos husi Bíblia. Buat neʼebé Ita aprende ajuda duni Ita atu iha relasaun diʼak ho Maromak no lori bensaun barak, hanesan esperansa atu moris iha mundu paraízu iha Maromak nia Ukun okos. Ita-nia fiar ba Maromak nia Liafuan sai metin liután, no liuhusi ransu malu iha reuniaun sira, Ita simu ona bensaun barak. Ita mós komprende ona oinsá mak Jeová hamutuk ho ninia povu ohin loron.​—Zac 8:23.

Kuandu Ita prepara atu hetan batizmu, diʼak atu hanoin filafali kona-ba hanorin Kristaun neʼebé báziku hamutuk ho katuas sira iha kongregasaun. (Ebr 6:1-3) Jeová sei kontinua fó bensaun ba Ita-nia hakaʼas an atu hakbesik liután ba nia, no Ita sei hetan kolen neʼebé nia promete ona.​—João 17:3.

1. Tanbasá mak Ita hakarak hetan batizmu?

2. Sé mak Jeová?

• “Jeová mak Maromak loos iha lalehan no iha rai. La iha Maromak seluk.”​—Deut 4:39.

• “Ita neʼebé naran Jeová, Ita mesak deʼit mak Maromak neʼebé Aas Liu Hotu iha mundu tomak.”​—Sal 83:18.

3. Tanbasá mak importante atu uza Maromak nia naran?

• “Imi tenke halo orasaun hanesan neʼe: ‘Ami Aman iha lalehan, halo Ita-nia naran sai santu.’”​—Mt 6:9.

• “Ema hotu neʼebé bolu Jeová nia naran sei hetan salvasaun.”​—Rom 10:13.

4. Bíblia uza títulu no liafuan saida deʼit atu esplika kona-ba Jeová?

• “Jeová mak Kriadór ba buat hotu iha mundu tomak, nia mak Maromak neʼebé iha ba nafatin.”​—Isa 40:28.

• “Ami Aman iha lalehan.”​—Mt 6:9.

• “Maromak mak domin.”​—1 João 4:8.

5. Saida deʼit mak Ita bele fó ba Maromak Jeová?

• “Imi tenke hadomi Jeová imi-nia Maromak, ho imi-nia laran tomak, ho imi-nia moris tomak, ho imi-nia neon tomak no ho imi-nia kbiit tomak.”​—Mc 12:30.

• “Imi tenke adora Jeová, imi-nia Maromak, no ba nia deʼit mak imi tenke halo serbisu sagradu.”​—Lc 4:8.

6. Tanbasá mak Ita hakarak laran-metin ba Jeová?

• “Haʼu-nia oan, sai matenek bá, no halo haʼu-nia laran haksolok, atu nuneʼe haʼu bele hatán ba ida neʼebé koʼalia aat haʼu.”​—Prov 27:11.

7. Ita halo orasaun ba sé? Ita halo orasaun liuhusi sé-nia naran?

• “Tebes haʼu [Jesus] hatete loloos ba imi katak, se imi husu buat naran deʼit ba Aman, nia sei fó ba imi hodi haʼu-nia naran.”​—João 16:23.

8. Ita bele halo orasaun kona-ba saida deʼit?

• “Neʼe duni, imi tenke halo orasaun hanesan neʼe: ‘Ami Aman iha lalehan, halo Ita-nia naran sai santu. Halo Ita-nia Ukun toʼo mai rai. Halo Ita-nia hakarak sai loos iha rai, hanesan iha lalehan. Fó mai ami ai-han ba ohin nian, no fó perdua ba ami-nia sala, hanesan ami mós fó perdua ona ba ema neʼebé halo sala hasoru ami. Keta husik ami monu ba tentasaun, maibé salva ami husi aat-naʼin.’”​—Mt 6:9-13.

• “Ita fiar nia, katak buat naran deʼit neʼebé ita husu hodi tuir ninia hakarak, nia rona ita.”​—1 João 5:14.

9. Tanbasá mak dala ruma Jeová la simu ema nia orasaun?

• “Sira sei bolu Jeová atu husu ajuda, maibé nia sei la hatán ba sira . . . tanba sira-nia hahalok neʼebé aat.”​—Miq 3:4.

• “Jeová nia matan hateke ba ema laran-loos sira, no nia see tilun ba sira-nia harohan; maibé Jeová fila kotuk ba sira neʼebé halo buat aat.”​—1 Ped 3:12.

10. Sé mak Jesus Kristu?

• “Simão Pedro hatán: ‘Ita mak Kristu, Maromak moris nia Oan-Mane.’”​—Mt 16:16.

11. Tanbasá mak Jesus mai toʼo mundu?

• “Oan-Mane husi Ema . . . mai, laʼós atu ema serbí nia, maibé atu serbí no atu fó ninia moris hodi sosa fali ema barak.”​—Mt 20:28.

• “Haʼu [Jesus] tenke haklaken mós liafuan diʼak kona-ba Maromak nia Ukun iha sidade sira seluk, tanba neʼe mak Maromak haruka haʼu mai.”​—Lc 4:43.

12. Oinsá mak Ita hatudu agradese ba Jesus nia sakrifísiu?

• “Nia mate ba ema hotu atu nuneʼe sira neʼebé moris la moris tan ba sira-nia an rasik, maibé moris ba ida neʼebé mate ba sira no moris hiʼas ona.”​—2 Kor 5:15.

13. Jesus simu pozisaun saida?

• “Kbiit tomak iha lalehan no rai entrega ona mai haʼu.”​—Mt 28:18.

• “Maromak foti nia ba pozisaun neʼebé aas liu no ho laran-diʼak Maromak fó ba nia naran ida neʼebé boot liu naran sira seluk.”​—Flp 2:9.

14. Ita fiar ka lae, katak Grupu Administradór husi Testemuña ba Jeová mak “atan laran-metin no matenek” neʼebé Jesus hili?

• “Sé loos mak atan laran-metin no matenek neʼebé ninia naʼi hili atu tau matan ba naʼi nia atan sira, atu fó ai-han ba sira iha tempu loloos?”​—Mt 24:45.

15. Saida mak espíritu santu? Neʼe mak anju ida ka lae? Esplika toʼok.

• “Anju neʼe hatán ba nia: ‘Espíritu santu sei tun ba ó, no kbiit husi Maromak neʼebé Aas Liu Hotu sei tun ba ó. Tan neʼe, oan neʼebé sei moris mai mak santu no ema sei bolu nia nuʼudar Maromak nia Oan-Mane.’”​—Lc 1:35.

• “Tan neʼe, se imi ema sala-naʼin mós hatene fó buat diʼak ba imi-nia oan sira, sá tan ho imi-nia Aman iha lalehan! Nia sei fó duni espíritu santu ba ema neʼebé husu ba nia.”​—Lc 11:13.

16. Jeová uza ona ninia espíritu santu atu halo saida?

• “Jeová kria lalehan liuhusi ninia liafuan, no nia halo buat hotu iha lalehan liuhusi iis husi ninia ibun.”​—Sal 33:6.

• “Kuandu espíritu santu tun ba imi, imi sei simu kbiit, no imi sei sai haʼu-nia testemuña . . . toʼo rai sira neʼebé dook liu iha mundu.”​—Após 1:8.

• “Profesia iha Eskritura la mai husi ema ida nia hanoin. Tanba profesia la fó sai husi ema nia hakarak, maibé ema koʼalia liafuan husi Maromak tanba espíritu santu book sira atu fó sai liafuan sira-neʼe.”​—2 Ped 1:20, 21.

17. Saida mak Maromak nia Ukun?

• “Maromak iha lalehan sei harii ukun ida neʼebé sei nunka lakon. No ukun neʼe sei la entrega ba povu sira seluk. Ukun neʼe sei harahun no halakon liurai sira-neʼe hotu nia ukun, no ukun neʼe mesak mak sei hamriik ba nafatin.”​—Dan 2:44.

18. Maromak nia Ukun sei lori benefísiu saida mai Ita?

• “Nia sei hamaran sira-nia matan-been hotu husi sira-nia matan, mate sei la iha tan, no ema sei la triste tan ka tanis ka sente moras. Buat sira neʼebé uluk nian lakon tiha ona.”​—Apok 21:4.

19. Tanbasá mak Ita fiar katak lakleur tan Ukun neʼe sei lori bensaun mai Ita?

• “Ninia dixípulu hakbesik ba nia mesamesak no husu: ‘Fó-hatene mai ami, bainhira mak buat sira-neʼe sei akontese, no sinál saida mak sei hatudu katak Ita toʼo ona mai no mundu neʼe nia rohan mai ona?’ Jesus hatán ba sira: ’ . . . Nasaun ida sei kontra nasaun seluk no ukun ida sei kontra ukun seluk, no rai-hamlaha no rai-nakdoko sei mosu iha fatin oioin. Ema sei haklaken liafuan diʼak kona-ba Maromak nia Ukun iha mundu tomak nuʼudar sasin ba nasaun hotu, depois neʼe, mundu nia rohan sei mai.’”​—Mt 24:3, 4, 7, 14.

• “Iha loron ikus sira sei iha problema barak neʼebé susar atu tahan. Tanba ema sei hadomi deʼit sira-nia an, hadomi osan, gaba an, loko an, koʼalia aat Maromak no ema, la halo tuir inan-aman, la hatene fó agradese, la hatudu laran-metin, la hadomi malu, la rona malu, koʼalia aat hodi hafoʼer ema seluk nia naran, la kontrola an, siʼak, la hadomi buat neʼebé diʼak, traidór, ulun-toos, foti an, hadomi deʼit ksolok duké hadomi Maromak, iha ema nia oin sira hatudu hahalok katak sira adora Maromak, maibé sira la moris tuir sira-nia adorasaun.”​—2 Tim 3:1-5.

20. Oinsá mak Ita bele hatudu katak Ita hafolin Maromak nia Ukun?

• “Neʼe duni, kontinua buka uluk Maromak nia Ukun no buat neʼebé loos tuir Maromak nia haree.”​—Mt 6:33.

• “Jesus hatete ba ninia dixípulu sira: ‘Se ema ruma hakarak tuir haʼu, nia tenke nega ninia an rasik no lori ninia ai-riin terus nian no kontinua laʼo tuir haʼu.’”​—Mt 16:24.

21. Sé mak Satanás no anju aat sira?

• “Imi husi imi-nia aman Diabu . . . Horiuluk kedas, nia mak ohodór.”​—João 8:44.

• “Samea boot neʼe soe tun tiha ba rai. Nia mak samea uluk nian, neʼebé hanaran Diabu no Satanás, neʼebé lohi ema iha mundu tomak. Nia soe tun tiha ba rai hamutuk ho ninia anju sira.”​—Apok 12:9.

22. Satanás duun saida kona-ba Jeová no ema neʼebé adora Nia?

• “Feto neʼe hatán ba samea: ‘Ami bele han ai-fuan husi ai-hun sira iha jardín neʼe. Maibé kona-ba ai-fuan husi ai-hun neʼebé iha jardín nia klaran, Maromak dehan ona: “Imi labele han ai-fuan husi ai-hun neʼe, imi labele kaer ai-hun neʼe. Se lae, imi sei mate.”’ Rona tiha neʼe, samea dehan ba feto neʼe: ‘Tuir loloos, imi sei la mate. Tanba Maromak hatene katak iha loron neʼebé imi han ai-fuan neʼe, imi-nia matan sei nakloke no imi sei sai hanesan Maromak hodi hatene buat diʼak no aat.’”​—Gén 3:2-5.

• “Satanás hatán ba Jeová: ‘Se ema ida besik ona atu mate, nia sei fó buat hotu neʼebé nia iha atu salva nia moris.’”​—Job 2:4.

23. Oinsá mak Ita bele hatudu katak lia neʼebé Satanás hasaʼe mak bosok?

• “Serbí [Maromak] ho laran tomak.”​—1 Krón 28:9.

• “Toʼo haʼu mate, haʼu sei nunka husik haʼu-nia laran-metin!”​—Job 27:5.

24. Tanbasá mak ema mate?

• “Sala tama iha mundu liuhusi ema ida, no mate tanba sala. Nuneʼe ema hotu mate tanba ema hotu halo ona sala.”​—Rom 5:12.

25. Ema mate nia kondisaun mak hanesan saida?

• “Ema neʼebé moris hela hatene katak sira sei mate, maibé ema neʼebé mate ona la hatene buat ida.”​—Ecle 9:5.

26. Saida mak esperansa ba ema neʼebé mate ona?

• “Maromak sei fó moris-hiʼas ba ema neʼebé hatudu hahalok loos no mós ema neʼebé hatudu hahalok la loos.”​—Após 24:15.

27. Ema naʼin-hira mak bá lalehan atu ukun hamutuk ho Jesus?

• “Haree Bibi-Oan hamriik iha Foho Siaun hamutuk ho ema naʼin-144.000, no iha sira-nia reen-toos hakerek tiha Bibi-Oan nia naran no ninia Aman nia naran.”​—Apok 14:1.

Liuhusi estuda Bíblia, Ita aprende ona kona-ba Maromak Jeová nia hakarak no oinsá atu halo tuir ninia matadalan neʼebé loos. Karik Ita halo ona mudansa balu ba Ita-nia hahalok no dalan neʼebé Ita halaʼo Ita-nia moris. No tanba Ita foti desizaun atu moris tuir Jeová nia matadalan neʼebé loos, agora Ita kumpre ona kritéria atu serbí Jeová iha dalan neʼebé nia simu nuʼudar haklaken-naʼin ba liafuan diʼak.

Pergunta sira tuirmai neʼe sei ajuda Ita atu komprende ho klaru Jeová nia matadalan neʼebé loos, no fó-hanoin Ita buat balu neʼebé Ita bele halo atu Maromak bele simu Ita nuʼudar ninia atan. Informasaun sira-neʼe sei ajuda Ita komprende katak importante duni atu halo buat hotu ho konxiénsia neʼebé moos hodi fó glória ba Jeová.​—2 Kor 1:12; 1 Tim 1:19; 1 Ped 3:16, 21.

Ami fiar katak buat neʼebé Ita estuda ona sei book Ita atu hakruʼuk ba Jeová nia ukun no sai parte ba ninia organizasaun. Pergunta no Eskritura sira tuirmai neʼe sei ajuda Ita atu analiza Ita-nia kumpriensaun kona-ba oinsá atu hakruʼuk ba Jeová nia arranju iha kongregasaun, iha família, no mós kona-ba sistema polítiku iha mundu neʼe. Ita sei hafolin liután Jeová nia arranju sira atu hanorin no hametin ninia povu iha dalan espirituál. Arranju sira-neʼe inklui reuniaun Kristaun sira, tan neʼe hakaʼas an atu asiste no hola parte iha reuniaun sira tuir Ita-nia kbiit no situasaun.

Parte neʼe mós sei ajuda Ita hanoin kona-ba tanbasá importante atu haklaken beibeik hodi ajuda ema seluk hatene kona-ba Jeová no buat neʼebé nia halo daudaun ba sira. (Mt 24:14; 28:19, 20) Ikusliu, parte neʼe sei fó-hanoin Ita kona-ba tanbasá Ita-nia desizaun atu dedika an no hetan batizmu mak importante. Ita bele fiar katak Jeová hafolin tebes Ita-nia hakarak atu hatudu agradese ba ninia laran-diʼak neʼebé boot.

1. Bíblia hanorin saida kona-ba arranju kaben nian? Tuir Bíblia, saida mak razaun ida deʼit atu halo divórsiu?

• “Imi lee tiha ona ka lae, katak horiuluk kedas Maromak kria mane no feto? No Maromak hatete: ‘Tan razaun neʼe mak mane ida sei husik ninia inan-aman no nia sei hela hamutuk ho ninia feen no sira naʼin-rua sei sai isin ida deʼit.’ Nuneʼe sira laʼós tan naʼin-rua maibé isin ida deʼit. Neʼe duni, buat neʼebé Maromak tau hamutuk, ema keta haketak. . . . Ema naran deʼit neʼebé soe ninia feen no kaben fali ho ema seluk, nia halo adultériu. Maibé, só deʼit kuandu feen halo sala seksuál mak ninia laʼen bele soe nia.”​—Mt 19:4-6, 9.

2. Tanbasá mak ema neʼebé moris hamutuk nuʼudar feen-laʼen tenke kaben tuir lei? Se Ita kaben ona, Ita rejistu ona tuir governu nia lei ka lae? Ka se Ita halaʼo ona kaben tradisionál nian, governu no komunidade rekoñese ida-neʼe ka lae?

• “Kontinua fó-hanoin sira atu hakruʼuk no halo tuir governu no autoridade sira.”​—Tito 3:1.

• “Ema hotu tenke respeitu moris kaben nian, no keta hafoʼer relasaun kaben nian, tanba Maromak sei tesi-lia ba ema neʼebé halo sala seksuál, no ema neʼebé halo adultériu.”​—Ebr 13:4.

3. Saida mak Ita-nia knaar iha família laran?

• “Haʼu-nia oan, rona ba ó-nia aman nia dixiplina, no keta fila kotuk ba ó-nia inan nia hanorin.”​—Prov 1:8.

• “Laʼen mak ulun ba ninia feen hanesan Kristu mak ulun ba kongregasaun . . . Laʼen sira, kontinua hadomi imi-nia feen, hanesan Kristu mós hadomi kongregasaun.”​—Éf 5:23, 25.

• “Aman sira, keta halo imi-nia oan sai laran-hirus, maibé kontinua haboot sira ho dixiplina no ho hanorin neʼebé tuir Jeová nia hakarak.”​—Éf 6:4.

• “Imi oan sira, halo tuir imi-nia inan-aman iha buat hotu, tanba ida-neʼe halo Naʼi kontente tebes.”​—Kol 3:20.

• “Imi feen sira, hakruʼuk ba imi-nia laʼen.”​—1 Ped 3:1.

4. Tanbasá mak ita tenke hatudu respeitu ba moris?

• “[Maromak] rasik mak fó iis, fó moris no buat hotu ba ema. . . . Liuhusi nia mak ita hetan moris, book an no iha.”​—Após 17:25, 28.

5. Tanbasá mak ita labele oho ema, inklui mós bebé neʼebé iha inan nia knotak?

• “Se mane sira baku malu no hakanek feto ida neʼebé isin-rua no . . . se sira ida mate, entaun ema neʼebé halo ida-neʼe tenke mate, tanba moris tenke troka moris.”​—Éx 21:22, 23.

• “Ita-nia matan haree ona haʼu iha haʼu-nia inan nia knotak; antes haʼu-nia isin parte ida-idak iha, Ita hakerek ona parte hotu neʼe iha Ita-nia livru kona-ba loron sira bainhira Ita halo parte ida-idak.”​—Sal 139:16.

• “Jeová odi . . . liman neʼebé fakar ema laran-moos nia raan.”​—Prov 6:16, 17.

6. Saida mak Maromak nia mandamentu kona-ba raan?

• “Kontinua hasees an . . . husi raan [no] husi animál neʼebé buti mate.”​—Após 15:29.

7. Tanbasá mak ita tenke hadomi irmaun-irmán sira?

• “Haʼu fó ba imi ukun-fuan foun ida, katak imi hadomi malu. Hanesan haʼu hadomi ona imi, imi mós tenke hadomi malu. Se imi hadomi malu, ema hotu sei hatene katak imi mak haʼu-nia dixípulu.”​—João 13:34, 35.

8. Atu la hadaʼet moras aat ka moras neʼebé bele halo ema seluk mate: (a) Tanbasá mak ema ho moras neʼebé bele hadaʼet presiza kuidadu atu la hakoʼak no reʼi ema seluk? (b) Tanbasá mak nia labele hirus se ema ruma la konvida nia ba sira-nia uma? (c) Se ema ida sente katak nia kona ona moras ruma neʼebé bele hadaʼet, tanbasá mak nia presiza koko raan antes atu namora? (d) Tanbasá mak ema ho moras neʼebé bele hadaʼet tenke fó-hatene ba koordenadór ba grupu katuas antes hetan batizmu?

• “Keta iha tusan ho ema ida, maibé imi-nia tusan mak hadomi malu. . . . ‘Imi tenke hadomi imi-nia maluk hanesan imi-nia an rasik.’ Ema neʼebé iha domin la halo aat ba ninia maluk.”​—Rom 13:8-10.

• “Keta buka diʼak deʼit ba imi-nia an rasik, maibé buka mós ema seluk nia diʼak.”​—Flp 2:4.

9. Tanbasá mak Jeová hakarak Ita atu fó perdua ba ema seluk?

• “Kontinua hatudu pasiénsia ba malu no prontu atu fó perdua ba malu ho laran tomak maski ema halo buat ruma neʼebé hakanek imi-nia laran. Hanesan Jeová prontu atu fó perdua ba imi ho laran tomak, imi mós tenke halo nuneʼe.”​—Kol 3:13.

10. Se Ita-nia maluk Kristaun ida koʼalia aat hodi hafoʼer Ita-nia naran ka hamatak Ita, Ita presiza halo saida?

• “Se ó-nia maun ka alin ida halo sala hasoru ó, bá koʼalia ho nia mesamesak hodi hatudu sai ninia sala. Se nia rona ba ó, neʼe katak ó lori fali ona ó-nia maun ka alin neʼe ba dalan loos. Maibé se nia la rona ba ó, lori tan ema ida ka rua, atu nuneʼe liuhusi sasin naʼin-rua ka tolu nia liafuan mak bele hametin kazu hotu. Se nia la rona sira, bá fó-hatene kongregasaun. Se nia la rona mós ba kongregasaun, haree nia hanesan ó haree ema husi nasaun seluk no kobradór impostu sira.”​—Mt 18:15-17.

11. Jeová hanoin oinsá kona-ba hahalok sala tuirmai?

▪ Sala seksuál

▪ Uza imajen ka estátua iha adorasaun

▪ Hahalok omoseksuál

▪ Naʼok

▪ Taru osan

▪ Hemu lanu

• “Keta lohi imi-nia an. Ema neʼebé halo sala seksuál, adora estátua, halo adultériu, mane neʼebé fó an ba mane seluk atu halo hahalok omoseksuál, no mane neʼebé halo hahalok omoseksuál, naʼok-teen, kaan-teen, lanu-teen, ema neʼebé gosta koʼalia liafuan kroʼat, ka ema neʼebé hamatak ema seluk, sira sei la simu Maromak nia Ukun nuʼudar liman-rohan.”​—1 Kor 6:9, 10.

12. Saida mak Ita sei halo kuandu hasoru tentasaun atu halo sala seksuál, inklui mós hahalok seksuál oioin ho ema neʼebé laʼós Ita-nia kaben?

• “Hasees an husi sala seksuál!”​—1 Kor 6:18.

13. Tanbasá mak ema Kristaun tenke hadook an husi droga ka ai-moruk balu neʼebé bele estraga sira-nia neon?

• “Fó imi-nia isin nuʼudar sakrifísiu neʼebé moris, santu no Maromak simu, katak halo serbisu sagradu ho imi-nia kbiit atu hanoin. Keta halo tuir mundu ohin neʼe, maibé troka imi-nia an hodi hafoun imi-nia hanoin, atu nuneʼe imi bele hatene loloos kona-ba Maromak nia hakarak neʼebé diʼak no perfeitu no halo Maromak kontente.”​—Rom 12:1, 2.

14. Hahalok saida deʼit mak Maromak bandu neʼebé iha ligasaun ho anju aat sira?

• “Iha imi-nia leet labele iha . . . ema neʼebé siʼik futuru, ema neʼebé halo masonik, ema neʼebé buka sinál oioin atu siʼik futuru, matan-dook, ema neʼebé fekit ema seluk, ema neʼebé husu ba ema neʼebé koko atu koʼalia ho ema mate ka husu ba ema neʼebé siʼik futuru, ka ema neʼebé husu ema mate.”​—Deut 18:10, 11.

15. Se ema Kristaun ida halo sala sériu no nia hakarak hadiʼa ninia relasaun diʼak ho Jeová, saida mak nia presiza halo?

• “Haʼu fó sai haʼu-nia sala ba Ita; haʼu la taka haʼu-nia sala. Haʼu dehan: ‘Haʼu sei fó sai haʼu-nia sala sira ba Jeová.’”​—Sal 32:5.

• “Iha ema ruma neʼebé moras iha imi-nia leet ka lae? Nia tenke bolu katuas sira iha kongregasaun, no sira sei halo orasaun ba nia no kose mina ba nia hodi Jeová nia naran. No orasaun neʼebé ema hatoʼo ho fiar sei halo ema moras sai diʼak fali, no Jeová sei halo nia hamriik. No mós, se nia halo ona sala, ninia sala sei hetan perdua.”​—Tgo 5:14, 15.

16. Se Ita hatene katak maluk Kristaun ida halo ona sala sériu ruma, Ita presiza halo saida?

• “Se ema ida haree ka hatene kona-ba sala ruma, entaun nia mak sai sasin. Nuneʼe se nia rona tiha avizu iha ema barak nia oin atu fó sasin hasoru ema neʼebé halo sala neʼe, maibé nia la fó sai kona-ba neʼe, nia halo ona sala. Nia tenke hatán ba ninia sala.”​—Lev 5:1.

17. Se iha ona avizu katak ema ida laʼós tan Testemuña ba Jeová, saida mak Ita presiza halo?

• “Labele ransu tan ho ema neʼebé bolu an nuʼudar maun-alin maibé nia halo sala seksuál, kaan-teen, adora estátua, koʼalia liafuan kroʼat, lanu-teen ka ema neʼebé hamatak ema seluk, imi keta han ho ema hanesan neʼe.”​—1 Kor 5:11.

• “Se ema ruma bá vizita imi no la lori hanorin neʼe, imi keta simu nia iha imi-nia uma no keta kumprimenta nia.”​—2 João 10.

18. Tanbasá mak Ita presiza habelun ho ema neʼebé hadomi Jeová?

• “Ema neʼebé laʼo hamutuk ho ema matenek sei sai matenek, maibé ema neʼebé ransu ho ema beik sei hetan problema boot.”​—Prov 13:20.

• “Keta husik ema seluk lohi imi. Ransu hamutuk ho ema aat sei estraga toman diʼak.”​—1 Kor 15:33.

19. Tanbasá mak Testemuña ba Jeová neutrál kona-ba buat polítiku?

• “Sira laʼós parte husi mundu neʼe, hanesan haʼu [Jesus] mós laʼós parte husi mundu neʼe.”​—João 17:16.

20. Tanbasá mak Ita presiza halo tuir governu?

• “Ema hotu tenke hakruʼuk ba autoridade sira, tanba Maromak mak husik sira hotu atu iha podér; no sira simu pozisaun oioin husi Maromak.”​—Rom 13:1.

21. Se ema nia lei mak kontra Maromak nia ukun-fuan, Ita sei halo saida?

• “Ami tenke halo tuir Maromak nuʼudar ukun-naʼin duké halo tuir ema.”​—Após 5:29.

22. Kuandu Ita buka serbisu, eskritura saida deʼit mak bele ajuda Ita atu la sai parte ba mundu?

• “Nasaun sei la foti tan surik hasoru nasaun seluk, no sira mós sei la aprende tan funu.”​—Miq 4:3.

• “Haʼu-nia povu, sai husi nia [Babilónia Boot], atu nuneʼe imi labele hola parte iha ninia sala sira, no labele hola parte iha ninia kastigu sira.” ​—Apok 18:4.

23. Atividade halimar saida deʼit mak Ita sei hili, no atividade saida deʼit mak Ita tenke hasees an?

• “Jeová . . . odi ema hotu neʼebé gosta violénsia.”​—Sal 11:5.

• “Hakribi buat neʼebé aat no kaer metin ba buat neʼebé diʼak.”​—Rom 12:9.

• “Kontinua hanoin kona-ba buat hotu neʼebé loos, buat hotu neʼebé importante, buat hotu neʼebé diʼak tuir Maromak nia haree, buat hotu neʼebé moos, buat hotu neʼebé haburas domin, buat hotu neʼebé merese respeitu, no buat hotu neʼebé santu no buat hotu neʼebé merese hahiʼi.”​—Flp 4:8.

24. Tanbasá mak Testemuña ba Jeová la halaʼo adorasaun hamutuk ho relijiaun seluk?

• “Imi labele han husi ‘Jeová nia meza’ no mós anju aat nia meza.”​—1 Kor 10:21.

• “‘Haketak imi-nia an’, Jeová dehan, ‘no keta kona buat neʼebé la moos’; ‘no haʼu sei simu imi’.”​—2 Kor 6:17.

25. Prinsípiu saida deʼit mak ajuda Ita bainhira deside atu tuir ka la tuir selebrasaun ruma?

• “Sira ransu fali ho nasaun seluk no simu nasaun sira-neʼe nia dalan sira. Sira kontinua serbí nasaun sira-neʼe nia estátua sira, no buat sira-neʼe sai nuʼudar lasu ba sira.”​—Sal 106:35, 36.

• “Ema neʼebé mate ona la hatene buat ida.”​—Ecle 9:5.

• “Sira laʼós parte husi mundu neʼe, hanesan haʼu mós laʼós parte husi mundu neʼe.”​—João 17:16.

• “Uluk imi uza ona tempu barak atu halo tuir nasaun sira-nia hakarak hodi halo hahalok aat toʼo la sente moe, iha hakarak aat neʼebé labele kontrola, hemu tua barak demais, festa arbiru, halibur malu hodi hemu tua barak, no adora estátua neʼebé kontra ukun-fuan.”​—1 Ped 4:3.

26. Oinsá mak istória sira iha Bíblia ajuda Ita atu deside kona-ba selebra ema nia tinan ka lae?

• “Loron terseiru mak Faraó nia loron-moris, no nia halo festa ba ninia atan hotu, no iha sira-nia leet nia lori sai xefe neʼebé toma konta ba liurai nia hemu no xefe ba padeiru. Nia entrega fali knaar ba ninia atan neʼebé toma konta ba nia hemu. . . . Maibé Faraó tara xefe ba padeiru iha ai-riin.” ​—Gén 40:20-22.

• “Bainhira Herodes selebra ninia loron-moris, Herodias nia oan-feto dansa ba sira no ida-neʼe halo Herodes laran-haksolok tebetebes. Tan neʼe, nia jura hodi promete atu fó buat naran deʼit neʼebé feto neʼe husu. Tuirmai, feto neʼe husu hodi tuir ninia inan nia liafuan, no dehan: ‘Fó mai haʼu João Batista nia ulun iha bandeja ida.’ Nuneʼe, nia haruka ema bá komarka hodi tesi João nia ulun.” ​—Mt 14:6-8, 10.

27. Tanbasá mak Ita hakarak halo tuir matadalan husi katuas sira?

• “Halo tuir sira neʼebé dirije imi iha imi-nia leet no hakruʼuk ba sira, tanba sira kontinua tau matan ba imi nuʼudar ema neʼebé sei hatán ba Maromak, atu nuneʼe sira bele tau matan ba imi ho haksolok laʼós ho halerik, tanba ida-neʼe sei lori buat aat ba imi.”​—Ebr 13:17.

28. Tanbasá mak importante ba Ita no Ita-nia família atu fahe tempu hodi lee no estuda Bíblia beibeik?

• “Nia gosta tebes Jeová nia ukun-fuan. Nia lee no medita Ninia ukun-fuan loron no kalan. Nia sei sai hanesan ai-hun ida neʼebé kuda besik bee-dalan, ai-hun neʼebé fó fuan tuir ninia tempu, ninia tahan sira sei la sai namlaek. No nia sei hetan susesu iha buat hotu neʼebé nia halo.”​—Sal 1:2, 3.

29. Tanbasá mak Ita gosta tuir no hola parte iha reuniaun sira?

• “Haʼu sei fó sai Ita-nia naran ba haʼu-nia maun-alin sira; iha kongregasaun nia leet haʼu sei hahiʼi Ita.”​—Sal 22:22.

• “Mai ita hanoin malu hodi fó laran-manas ba malu atu hatudu domin no hahalok diʼak, no maski ema balu sai toman ona atu la halibur hamutuk, maibé imi keta haluha atu halibur hamutuk, no fó aten-brani ba malu, liuliu bainhira imi haree loron neʼe besik daudaun ona.”​—Ebr 10:24, 25.

30. Saida mak serbisu importante liu neʼebé Jesus fó ona mai ita?

• “Laʼo bá no hanorin ema husi nasaun hotu atu sai haʼu-nia dixípulu, fó batizmu ba sira. . . . Hanorin sira atu halo tuir mandamentu hotu neʼebé haʼu fó ona ba imi.”​—Mt 28:19, 20.

31. Kuandu ita fó kontribuisaun ba serbisu iha mundu tomak, ka atu ajuda irmaun-irmán sira, ita presiza iha atitude saida atu bele halo Jeová kontente?

• “Hahiʼi Jeová ho ó-nia sasán neʼebé folin-boot.” ​—Prov 3:9.

• “Diʼak atu ema ida-idak fó tuir buat neʼebé nia deside ona iha laran, laʼós ho laran-todan ka obriga an, tanba Maromak hadomi ema neʼebé fó ho laran haksolok.”​—2 Kor 9:7.

32. Susar saida deʼit mak ema Kristaun sei hasoru?

• “Ksolok ba sira neʼebé hetan terus bainhira halo hahalok loos, tanba Ukun lalehan mak sira-nian. Ksolok ba imi kuandu ema koʼalia aat imi, fó-terus ba imi no koʼalia liafuan aat oioin hodi bosok kona-ba imi tanba haʼu. Haksolok no kontente bá, tanba imi-nia kolen boot tebes iha lalehan. Tanba uluk sira mós fó-terus hanesan neʼe ba profeta sira neʼebé moris antes imi.”​—Mt 5:10-12.

33. Tanbasá hetan batizmu nuʼudar Testemuña ba Jeová mak priviléjiu espesiál?

• “Ita-nia liafuan sai buat neʼebé halo haʼu-nia laran kontente no haksolok, tanba haʼu lori Ita-nia naran, oh Jeová.”​—Jer 15:16.

Baibain programa batizmu nian sei halaʼo iha asembleia no reuniaun boot husi Testemuña ba Jeová. Iha diskursu batizmu nia rohan, oradór sei husu ema neʼebé atu hetan batizmu atu hamriik no hatán ho lian makaʼas no klaru ba pergunta rua tuirmai neʼe:

1. Ita arrepende ona Ita-nia sala sira, dedika an ona ba Jeová, no simu ona ninia dalan atu salva Ita liuhusi Jesus Kristu ka lae?

2. Ita komprende katak Ita-nia batizmu hatudu katak Ita mak Testemuña ba Jeová ida no sai parte ba Jeová nia organizasaun ka lae?

Bainhira ema neʼebé atu hetan batizmu hatán “Sin” ba pergunta rua neʼe, neʼe hatudu katak sira “fó sai iha ema barak nia oin” katak sira tau fiar ba Jesus nia sakrifísiu, no ho laran tomak dedika ona sira-nia an ba Jeová. (Rom 10:9, 10) Antes halo ida-neʼe, importante ba Ita atu hanoin didiʼak no halo orasaun kona-ba pergunta rua neʼe, atu nuneʼe Ita bele hatán tuir buat neʼebé Ita rasik fiar ona.

Ita halo ona orasaun hodi dedika an ba Jeová no promete atu adora nia mesak deʼit no tau uluk ninia hakarak iha Ita-nia moris ka lae?

Ita hakarak no prontu duni atu hetan batizmu iha asembleia ka reuniaun boot tuirmai ka lae?

Bainhira hetan batizmu, Ita presiza hatais iha dalan oinsá? (1 Tim 2:9, 10; João 15:19; Flp 1:10)

Ita presiza hatais iha dalan neʼebé “respeitu no ho hanoin neʼebé loos” atu hatudu katak ita “adora Maromak”. Tan neʼe, ema neʼebé atu hetan batizmu labele hatais roupa neʼebé badak, aperta demais, mihis liu, ka sabraut. Sira mós la hatais roupa neʼebé iha liafuan ruma. Sira presiza hatais roupa neʼebé moos, kabeer no hatudu respeitu ba tempu importante neʼe.

Bainhira hetan batizmu, Ita presiza hatudu hahalok saida? (Lc 3:21, 22)

Jesus nia batizmu mak ezemplu ba ema Kristaun ohin loron. Liuhusi ninia hahalok, Jesus hatudu katak tempu batizmu mak importante tebes. Tan neʼe, fatin neʼebé atu halaʼo batizmu laʼós fatin atu goza malu, halimar, nani, ka hatudu hahalok seluk neʼebé la respeitu. Ita mós lakohi hatudu an hanesan ema neʼebé foin manán buat ruma. Maski tempu batizmu halo Ita kontente, maibé Ita tenke hatudu sai Ita-nia ksolok iha dalan neʼebé respeitu.

Oinsá mak tuir reuniaun beibeik no ransu ho maluk sira iha kongregasaun ajuda Ita atu moris tuir Ita-nia dedikasaun ba Jeová?

Depois hetan batizmu, tanbasá mak importante atu nafatin estuda mesak no hola parte beibeik iha serbisu haklaken?