LISAUN 18

Informasaun neʼebé diʼak ba rona-naʼin

1 Korinto 9:19-23

SAIDA MAK ITA PRESIZA HALO: Book rona-naʼin atu hanoin didiʼak kona-ba tópiku neʼe no ajuda sira aprende buat ruma neʼebé iha folin-boot.

Hanoin buat neʼebé rona-naʼin hatene ona. Duké repete deʼit buat neʼebé sira rona ona, diʼak liu ajuda sira atu aprende buat neʼebé foun no kleʼan liután kona-ba tópiku neʼe.

Koʼalia liu deʼit kona-ba informasaun neʼebé rona-naʼin hatene ona. Maibé koʼalia neineik uitoan bainhira Ita hatoʼo informasaun neʼebé foun.
Halo riset no hanoin kleʼan. Se bele, temi kona-ba akontesimentu ka faktu ruma neʼebé baibain ema ladún rona atu esplika pontu importante. Hanoin kleʼan kona-ba Ita-nia informasaun no oinsá ida-neʼe liga ho faktu sira neʼebé Ita temi.

Bainhira hanoin didiʼak kona-ba Ita-nia informasaun, diʼak atu husu Ita-nia an pergunta hanesan: saida, tanbasá, bainhira, iha neʼebé, sé, no oinsá. Halo Ita-nia diskursu moris hodi husu pergunta sira-neʼe balu, depois neʼe fó resposta ba pergunta sira-neʼe.
Esplika benefísiu husi Ita-nia mensajen. Esplika oinsá eskritura sira bele ajuda rona-naʼin nia moris loroloron. Esplika kona-ba situasaun neʼebé espesífiku, atitude no hahalok sira neʼebé kona rona-naʼin nia moris.