LISAUN 46
Tanbasá presiza dedika an no hetan batizmu?
Kuandu Ita dedika an ba Jeová, neʼe katak Ita halo orasaun ida hodi promete ba Jeová atu adora nia mesak deʼit no tau uluk ninia hakarak iha Ita-nia moris. (Salmo 40:8) Depois neʼe, Ita hetan batizmu hodi hatudu ba ema seluk katak Ita dedika an ona ba Jeová. Neʼe mak desizaun neʼebé importante liu no sei troka ita-nia moris. Saida mak bele motiva Ita atu foti desizaun neʼe?
1. Saida mak motiva ema ida atu dedika an ba Jeová?
Domin ba Jeová mak motiva ita atu dedika an ba nia. (1 João 4:10, 19) Bíblia hatete: “Imi tenke hadomi Jeová imi-nia Maromak, ho imi-nia laran tomak, ho imi-nia moris tomak, ho imi-nia neon tomak no ho imi-nia kbiit tomak.” (Marcos 12:30) Ita hatudu katak ita hadomi Maromak, laʼós ho liafuan deʼit, maibé mós liuhusi ita-nia hahalok. Hanesan mane no feto neʼebé hadomi malu deside atu kaben, ita-nia domin ba Jeová mós motiva ita atu dedika an ba nia no hetan batizmu.
2. Jeová fó bensaun saida ba ninia Testemuña neʼebé hetan batizmu?
Kuandu Ita hetan batizmu, Ita sai parte ba Jeová nia família neʼebé kontente. Ita sei sente Jeová nia domin iha dalan oioin, no Ita sai besik liután ba nia. (Lee Malaquias 3:16-18.) Ita sei iha Jeová nuʼudar Ita-nia Aman, no mós iha família boot ida husi irmaun-irmán sira iha mundu tomak neʼebé hadomi Jeová no hadomi Ita. (Lee Marcos 10:29, 30.) Klaru katak iha hakat balu neʼebé ita presiza halo antes atu hetan batizmu. Ita presiza aprende kona-ba Jeová, hadomi nia, no tau fiar ba ninia Oan-Mane. Ikusliu, Ita presiza dedika Ita-nia moris ba Jeová. Se Ita halo buat sira-neʼe, no tuirmai hetan batizmu, Ita sei laʼo iha dalan neʼebé lori Ita ba moris neʼebé haksolok ba nafatin. Maromak nia Liafuan hatete: “Agora batizmu salva imi.”—1 Pedro 3:21.
KEʼE KLEʼAN
Buka-hatene tanbasá importante ba Ita atu dedika an ba Jeová no hetan batizmu.
3. Ita hotu tenke hili sé mak ita sei serbí
Iha tempu uluk, povu Izraél balu hanoin katak sira bele adora Jeová no mós iha tempu hanesan adora maromak falsu Baal. Maibé Jeová haruka profeta Elias atu korrije sira-nia hanoin neʼebé sala. Lee 1 Reis 18:21, depois koʼalia hamutuk kona-ba pergunta tuirmai:
Ema Izraél tenke halo desizaun kona-ba saida?
Hanesan ho povu Izraél, ita mós tenke hili sé mak ita sei serbí. Lee Lucas 16:13, depois koʼalia hamutuk kona-ba pergunta tuirmai:
Tanbasá mak ita labele adora Jeová no buat seluk iha tempu hanesan?
Oinsá mak ita bele hatudu ba Jeová katak ita hili atu adora nia?
4. Hanoin kleʼan kona-ba Jeová nia domin ba Ita
Jeová fó ona prezente furak barak mai ita. Saida mak ita bele fó ba nia? Loke VÍDEO.
Iha dalan saida deʼit mak Jeová hatudu ona ninia domin ba Ita? Lee Salmo 104:14, 15 no 1 João 4:9, 10, depois koʼalia hamutuk kona-ba pergunta tuirmai:
Ita agradese ba Jeová liuliu kona-ba prezente saida?
Prezente sira-neʼe halo Ita sente oinsá kona-ba Jeová?
Kuandu ita simu prezente neʼebé ita gosta tebes, ita hakarak hatudu agradese ba ida neʼebé fó prezente neʼe. Lee Deuteronómio 16:17, depois koʼalia hamutuk kona-ba pergunta tuirmai:
Kuandu Ita hanoin kona-ba buat hotu neʼebé Jeová halo ona ba Ita, neʼe book Ita atu hakarak fó saida ba nia?
5. Dedikasaun lori bensaun barak
Ema barak hanoin katak iha naran-boot, serbisu diʼak no osan barak bele halo sira kontente. Neʼe loos ka lae? Loke VÍDEO, depois koʼalia hamutuk kona-ba pergunta tuirmai.
Maski atleta iha vídeo neʼe gosta tebes joga bola, tanbasá mak nia husik ida-neʼe?
Nia deside atu dedika an ba Jeová, laʼós ba joga bola. Tuir Ita-nia hanoin, ninia desizaun neʼe diʼak ka lae? Tanbasá?
Antes apóstolu Paulo sai ema Kristaun, nia hakarak hetan susesu ho serbisu neʼebé nia halo. Nia estuda ema Judeu nia ukun-fuan husi mestre ida neʼebé naran-boot. Maibé Paulo husik buat hotu neʼe atu bele sai ema Kristaun. Nia arrepende an kona-ba desizaun neʼe ka lae? Lee Filipe 3:8, depois koʼalia hamutuk kona-ba pergunta tuirmai:
Tanbasá mak Paulo hatete katak buat neʼebé nia halo iha tempu uluk mak hanesan “foʼer deʼit”, ka lixu?
Saida mak nia hetan fali?
Ita sente oinsá kuandu kompara serbí Jeová ho buat seluk neʼebé Ita halo iha Ita-nia moris?
Bainhira Paulo sai ema Kristaun, nia hetan buat barak neʼebé diʼak liu fali buat neʼebé nia husik
EMA BALU DEHAN: “Haʼu hatene neʼe mak lia-loos maibé haʼu seidauk prontu atu hetan batizmu.”
Tuir Ita-nia hanoin, tanbasá mak diʼak atu dedika Ita-nia an ba Jeová?
PONTU IMPORTANTE
Domin book ita atu dedika an ba Jeová no hetan batizmu.
Rezumu
Tanbasá mak Jeová merese simu ita-nia domin no adorasaun ho laran tomak?
Oinsá mak Jeová fó bensaun ba ninia Testemuña neʼebé hetan ona batizmu?
Ita hakarak dedika Ita-nia an ba Jeová ka lae?
BUKA-HATENE LIUTÁN
Haree toʼok tanbasá mak artista ida no atleta ida hili atu dedika an ba Jeová.
Pergunta husi joven sira—Haʼu sei halo saida ho haʼu-nia moris?—Haree fali tempu uluk (6:54)
Buka-hatene razaun seluk tan atu dedika an ba Jeová.
“Tanbasá mak dedika an ba Maromak Jeová?” (Livru Haklaken, 15 Janeiru 2010)
Iha vídeo múzika neʼe, haree toʼok oinsá ema neʼebé dedika an ba Jeová bele hetan ksolok.
Lee istória “Ba tinan barak, haʼu sempre hanoin: ‘Tanbasá mak ita moris?’” no haree toʼok saida mak motiva feto ida atu analiza kona-ba buat neʼebé importante liu ba nia.
“Bíblia troka ema nia moris” (Informasaun husi Livru Haklaken)