LISAUN 36
Hatudu laran-moos iha buat hotu
Ita hotu hakarak iha belun neʼebé hatudu laran-moos. Jeová mós hakarak ninia belun sira atu hatudu laran-moos. Maibé neʼe la fasil iha mundu neʼebé ema barak la hatudu laran-moos. Benefísiu saida mak ita sei hetan se ita hatudu laran-moos iha buat hotu?
1. Saida mak razaun importante liu atu hatudu laran-moos?
Se ita laran-moos, ita hatudu ba Jeová katak ita hadomi no respeitu nia. Hanoin toʼok: Jeová hatene buat hotu kona-ba ita-nia hanoin no hahalok. (Ebreu 4:13) Jeová haree kuandu ita hatudu laran-moos, no nia hafolin ida-neʼe. Ninia Liafuan dehan: “Jeová hakribi ema neʼebé laran-makerek, maibé nia sai belun neʼebé besik ho ema laran-loos.”—Provérbios 3:32.
2. Oinsá mak ita bele hatudu laran-moos iha moris loroloron nian?
Jeová hakarak ita atu “koʼalia loloos ba malu”. (Zacarias 8:16, 17) Neʼe katak sá? Kuandu ita koʼalia ho ita-nia família, maluk serbisu, irmaun-irmán sira, ka autoridade sira, ita lakohi bosok ka fó informasaun neʼebé la loos. Ema neʼebé laran-moos sei la naʼok husi ema seluk, ka hamatak ema seluk. (Lee Provérbios 24:28 no Éfeso 4:28.) Sira mós selu impostu no taxa tuir lei. (Roma 13:5-7) Iha dalan hanesan neʼe no mós dalan seluk, ita “hatudu laran-moos iha buat hotu”.—Ebreu 13:18.
3. Hahalok laran-moos lori benefísiu saida deʼit?
Kuandu ema haree ita nuʼudar ema laran-moos, neʼe halo sira tau fiar ba ita. Ita ajuda ema seluk atu sente seguru iha kongregasaun, hanesan família ida neʼebé hadomi malu. Ita bele sente kontente tanba iha konxiénsia neʼebé moos. Ita-nia hahalok laran-moos bele “fó hahiʼi ba hanorin husi ita-nia Salvadór, Maromak”, no book ema atu hakarak hatene liután kona-ba Maromak Jeová no serbí nia.—Tito 2:10.
KEʼE KLEʼAN
Haree oinsá mak hahalok laran-moos kona Jeová no Ita, no oinsá mak Ita bele hatudu laran-moos iha situasaun oioin iha Ita-nia moris.
4. Hahalok laran-moos halo Jeová kontente
Lee Salmo 44:21 no Malaquias 3:16, depois koʼalia hamutuk kona-ba pergunta tuirmai:
Tanbasá ita labele hanoin katak ita bele subar buat ruma husi Jeová?
Jeová sente oinsá kuandu ita fó sai buat neʼebé loos maski hasoru situasaun susar atu halo ida-neʼe?
Kuandu labarik sira fó sai buat neʼebé loos, sira halo inan-aman kontente. Kuandu ita fó sai buat neʼebé loos, ita halo Jeová kontente
5. Hatudu laran-moos iha tempu hotu
Ema barak hanoin katak dala ruma sira presiza bosok atu hetan rezultadu diʼak. Maibé hanoin toʼok tanbasá ita presiza hatudu laran-moos iha tempu hotu. Loke VÍDEO.
Lee Ebreu 13:18, depois koʼalia hamutuk kona-ba oinsá mak ita bele hatudu laran-moos . . .
ba ita-nia família.
iha serbisu ka eskola.
iha situasaun seluk.
6. Hahalok laran-moos lori benefísiu mai ita
Maski hatudu laran-moos bele lori problema uitoan mai ita, maibé ikusmai ita sempre hetan rezultadu diʼak. Lee Salmo 34:12-16, depois koʼalia hamutuk kona-ba pergunta tuirmai:
Oinsá mak hahalok laran-moos halo Ita-nia moris sai diʼak liu?
Laʼen no feen neʼebé laran-moos hametin sira-nia moris kaben nian
Patraun no xefe sei tau fiar ba serbisu-naʼin neʼebé laran-moos
Sidadaun neʼebé laran-moos iha naran diʼak ho autoridade sira
EMA BALU DEHAN: “Bosok uitoan deʼit la problema.”
Tanbasá Ita fiar katak Jeová odi hahalok bosok hotu?
PONTU IMPORTANTE
Jeová hakarak ninia belun sira sempre hatudu laran-moos liuhusi liafuan no hahalok.
Rezumu
Ita bele hatudu laran-moos iha dalan saida deʼit?
Tanbasá ita labele hanoin katak ita bele subar buat ruma husi Jeová?
Tanbasá mak Ita hakarak hatudu laran-moos iha buat hotu?
BUKA-HATENE LIUTÁN
Oinsá mak inan-aman bele hanorin oan sira atu hatudu laran-moos?
Kuandu kumpre buat neʼebé ita promete, neʼe lori benefísiu saida mai ita?
Haree toʼok ita presiza selu impostu ka lae maski governu la uza iha dalan neʼebé loos.
“Ita presiza selu impostu ka lae?” (Livru Haklaken, 1 Outubru 2011)
Saida mak book mane lohidór ida atu troka ninia moris no halo serbisu ho laran-moos?
“Jeová mak Maromak laran-luak no prontu fó perdua ema” (Livru Haklaken, 1 Jullu 2015)