Oinsá mak Bíblia bele ajuda Ita?

Ita barak iha pergunta sira kona-ba moris, mate, susar, no kona-ba futuru. Ita mós preokupa ho buat loroloron nian, hanesan oinsá atu buka moris ka atu sente kontente iha família laran. Ema barak dehan katak Bíblia laʼós deʼit ajuda sira hetan resposta ba pergunta neʼebé importante, maibé mós sai matadalan neʼebé diʼak iha moris loroloron nian. Sin, Bíblia bele duni ajuda ita hotu.

1. Bíblia hatán ba pergunta hanesan saida deʼit?

Bíblia hatán ba pergunta importante sira hanesan: Oinsá mak moris neʼe hahú? Saida mak objetivu ba moris? Tanbasá ita hasoru susar? Oinsá ho ema mate nia kondisaun? Tanbasá iha funu barak maski ema hotu hakarak dame? Iha futuru, saida mak sei akontese ba mundu? Bíblia anima ita atu buka resposta ba pergunta sira-neʼe. No ema barak kontente ho resposta neʼebé sira hetan husi Bíblia.

2. Oinsá mak Bíblia ajuda ita atu kontente iha moris loroloron nian?

Bíblia fó ita matadalan neʼebé diʼak. Porezemplu, matadalan ba família sira oinsá atu bele sente kontente neʼebé loos. Bíblia mós fó matadalan mai ita oinsá atu tahan estrese no oinsá atu sente kontente ho ita-nia serbisu. Nuʼudar ita estuda hamutuk informasaun neʼe, Ita sei aprende Bíblia nia hanorin kona-ba tópiku sira-neʼe no seluk tan. Ita mós sei haree katak ‘Eskritura hotu [buat hotu iha Bíblia laran] mak diʼak’ atu ajuda ita.​—2 Timóteo 3:16.

KEʼE KLEʼAN

Haree oinsá Bíblia ajuda ona ema seluk, oinsá Ita bele sente kontente bainhira lee Bíblia, no tanbasá diʼak atu hetan ajuda husi ema seluk hodi bele komprende Bíblia nia hanorin.

3. Bíblia bele dirije ita

Bíblia mak hanesan lampra neʼebé fó naroman. Ita bele uza Bíblia atu halo desizaun neʼebé diʼak no atu hatene saida mak sei akontese iha futuru.

Lee Salmo 119:105, depois koʼalia hamutuk kona-ba pergunta tuirmai:

• Hakerek-naʼin ba salmo neʼe sente oinsá kona-ba Bíblia?

• Ita rasik sente oinsá kona-ba Bíblia?

4. Bíblia bele hatán ba ita-nia pergunta sira

VÍDEO: Keta lakon esperansa! (1:48)

• Iha vídeo neʼe, pergunta saida deʼit mak feto neʼe husu ba ninia an?

• Oinsá mak estuda Bíblia ajuda nia?

Bíblia anima ita atu husu pergunta. Lee Mateus 7:7, depois koʼalia hamutuk kona-ba pergunta tuirmai:

• Pergunta saida deʼit mak Ita hakarak hetan ninia resposta husi Bíblia?

5. Ita bele sente kontente bainhira lee Bíblia

VÍDEO: Lee Bíblia (2:05)

• Iha vídeo neʼe, saida mak joven sira sente kuandu lee livru baibain?

• Tanbasá mak sira gosta lee Bíblia?

Bíblia bele fó kmaan no esperansa mai ita. Lee Roma 15:4, depois koʼalia hamutuk kona-ba pergunta tuirmai:

• Ita gosta Bíblia nia promesa kona-ba fó kmaan no esperansa ka lae?

6. Ema seluk bele ajuda ita komprende Bíblia

Maski importante atu Ita rasik lee Bíblia, maibé ema barak sente katak hodi koʼalia hamutuk ho ema seluk, neʼe mós bele ajuda. Lee Apóstolu 8:26-31, depois koʼalia hamutuk kona-ba pergunta tuirmai:

• Saida mak bele ajuda ita komprende Bíblia?​—Haree versíkulu 30 no 31.

PONTU IMPORTANTE

Bíblia bele fó matadalan ba ita-nia moris loroloron nian, hatán ba pergunta importante sira, no fó ita kmaan no esperansa.

Rezumu

• Matadalan hanesan saida mak ita bele hetan iha Bíblia?

• Bíblia hatán ba pergunta hanesan saida deʼit?

• Saida mak Ita hakarak atu aprende husi Bíblia?

BUKA-HATENE LIUTÁN

Haree oinsá Bíblia nia matadalan bele ajuda ita ohin loron.

“Bíblia nia hanorin​—Matenek neʼebé nunka sai tuan” (Livru Haklaken No. 1 2018)

Haree oinsá Bíblia ajuda mane ida neʼebé iha problema ho ninia sentimentu husi kiʼik kedas.

Haʼu-nia moris komesa kontente (2:53)

Haree Bíblia nia matadalan kona-ba moris família nian neʼebé kontente.

“Segredu 12 ba família atu moris kontente” (Matan-moris bá! No. 2 2018)

Ema barak konfuzaun kona-ba sé mak ukun mundu. Haree toʼok saida mak Bíblia hatete.

Tanbasá Estuda Bíblia?​—Vídeo kompletu (3:14)