Sira fó sira-nia an ho hakarak rasik​—iha Taiwán

FEEN-LAʼEN pioneiru ida naran Choong Keon no Julia husi Sydney, rai-Austrália hatete: “Uluk ami naʼin-rua serbisu part-time deʼit. Ami hela iha fatin ida kapás tebes. Buat hotu iha. Uma mós la dook malu husi família ka kolega sira-nian.” Maibé sira hatete katak sira-nia moris sei falta buat ida. Falta saida? Sira dehan tuir loloos sira iha oportunidade hodi halo buat barak liután atu serbí Jeová, maibé sira laran rua-rua hela kona-ba desizaun neʼe.

Iha loron ida, bainhira sira tuir reuniaun boot ba loron tolu iha tinan 2009, sira rona diskursu ida kona-ba haklaken iha rai seluk neʼebé hatete: “Hanoin kona-ba ai-knanoik ida-neʼe: Kondutór ida la bele fila ninia karreta bá-mai se karreta neʼe para hela. Hanesan neʼe mós se ita la halo buat ruma, Jesus mós la bele uza ita hodi haklaken iha dalan oioin.”a Sira sente liafuan neʼe kona duni sira-nia moris. Iha reuniaun boot neʼe sira mós rona kona-ba misionáriu naʼin-rua husi Taiwán nia entrevista. Sira konta kona-ba serbí iha Taiwán halo sira kontente tebes no sei presiza ema barak tan atu ajuda haklaken iha neʼebá. Ida-neʼe mós halo Choong Keon ho Julia sente liafuan neʼe kona loos sira-nia moris.

Julia hatete katak reuniaun boot hotu tiha, sira halo orasaun ba Jeová hodi sira la bele taʼuk atu muda ba Taiwán. Nia dehan: “Ami taʼuk atu foti desizaun ida-neʼe, tanba ami sente hanesan atu haksoit tun ba tasi neʼebé naruk.” Maibé, iha eskritura ida mak ajuda sira ikusmai bele foti desizaun metin ida. Eskritura neʼe mak Eclesiastes (Pengkhotbah) 11:4 neʼebé hatete: “Ema neʼebé haree ba anin sei la kari fini, no ema neʼebé hateke ba kalohan sei la koʼa.” Ho ida-neʼe, Julia nia laʼen, Choong Keon hatete: “Ami deside karik diʼak liu atu kari no koʼa ona, duké haree no hateke deʼit.” Tuirmai, sira halo orasaun dala barak no lee misionáriu nia esperiénsia sira. Sira mós hakerek e-mail bá-mai ho kolega sira iha Taiwán hodi husu kona-ba informasaun atu moris iha Taiwán. Fulan tolu liutiha, sira faʼan sira-nia karreta ho sasán hotu depois muda ba Taiwán.

“HAKLAKEN MAK BUAT DIʼAK TEBES!”

Agora daudaun, iha irmaun-irmán ho idade 21 toʼo 73 neʼebé mai husi rai seluk neʼebé serbí hela iha Taiwán hamutuk naʼin-100 liu. Iha sira-nia leet, iha mós irmán 50 liu mak seidauk iha kaben. Irmaun-irmán sira-neʼe mai husi rai hanesan Austrália, Inglaterra, Kanadá, Fransa, Japaun, Koreia, España, no Estadus Unidus. Saida mak ajuda irmaun-irmán sira-neʼe hodi bele moris iha rai seluk? Mai ita koʼalia liután kona-ba ida-neʼe.

Irmán klosan ida naran Laura neʼebé serbí daudaun nuʼudar pioneiru iha Taiwán, uluk iha ninia rai Kanadá, nia la gosta tebes atu bá haklaken. Nia konta: “Uluk tanba haʼu ladún fó atensaun didiʼak oinsá atu haklaken, entaun, haʼu baruk tebes atu sai ba haklaken.” Loron ida ninia kolega sira bolu nia ba Méxiku hamutuk hodi haklaken ba fulan ida iha neʼebá. Ikusmai Laura hatete: “Neʼe mak dala primeiru iha haʼu-nia moris haʼu sente haʼu fó-laran hodi haklaken ho didiʼak, afinál haklaken mak buat diʼak tebes!”

Tan neʼe, bainhira fila fali ba ninia rai, Laura halo planu atu muda ba Taiwán. Hodi bele halo tuir ninia planu neʼe, nia muda ba grupu ida iha Kanadá ho lia-xina no nia mós komesa aprende lia-xina. Ikusmai, iha tinan 2008 nia muda duni ba Taiwán. Laura hatete: “Tinan ida liutiha mak haʼu foin sente bele adapta moris iha Taiwán. Maibé agora haʼu gosta tebes atu moris iha neʼe, haʼu lakohi fila ba Kanadá ona.” Kona-ba haklaken nia dehan saida? Nia hatete: “Haʼu gosta tebes hodi bele haklaken iha-neʼe. Bainhira ita haree ita-nia estudante Bíblia komprende kona-ba Jeová no troka sira-nia moris, ksolok hanesan neʼe ita la bele hetan iha fatin seluk. Tanba serbí iha Taiwán mak haʼu bele iha oportunidade hodi hetan ksolok sira-neʼe.”

DALAN ATU APRENDE LÍNGUA FOUN

Brian ho ninia feen Michelle muda husi Estadus Unidus ba Taiwán iha tinan 8 ona. Foufoun sira sente ladún iha ksolok hodi haklaken iha neʼebá. Maibé misionáriu ida hatete ba sira: “Maski ita fó deʼit tratu oan ida ba ema ida, karik ba nia, neʼe mak dala primeiru iha ninia moris nia foin rona kona-ba Jeová. Entaun, tuir imi-nia hanoin, imi-nia haklaken iha folin ka lae?” Liafuan neʼe anima tebes sira naʼin-rua. Irmaun ida seluk hatete ba sira katak atu la bele laran-tun, lalika kompara ka sukat kona-ba komprende lia-xina toʼo iha neʼebé ona, maibé husik tinan ida liutiha mak foin haree fali. Ikusmai sira naʼin-rua halo tuir no agora sai pioneiru neʼebé diʼak.

Saida mak bele ajuda Ita-boot sira hodi bele aprende língua foun ida? Pasiar toʼok ba rai ida neʼebé Ita hanoin atu muda ba neʼebá iha futuru. Bá tuir sira-nia reuniaun sira, halimar ho irmaun-irmán sira iha neʼebá, bá haklaken hamutuk ho sira. Brian hatete: “Bainhira ita haree ema simu lia-loos no irmaun-irmán sira mós hadomi malu, buat sira-neʼe mós sei book ita hakarak atu muda hodi serbí hamutuk ho sira iha sira-nia rai.”

SÉ MAK TAU MATAN BA SIRA-NIA MORIS?

Irmaun ho irmán pioneiru sira balu neʼebé muda bá Taiwán hodi ajuda haklaken iha neʼebá hanorin inglés hodi bele tau matan ba sira-nia presiza loro-loron nian. Balu hanesan Kristin ho ninia feen Michelle faʼan ikan. Kristin hatete: “Haʼu nunka faʼan ikan iha haʼu-nia moris tomak, maibé se haʼu hakarak moris iha ema nia rai, halo serbisu hanesan neʼe mós la iha buat ida.” Serbisu part-time neʼe ajuda sira feen-laʼen bele tau fokus liu ba serbisu pioneiru no haklaken ba ema.

LALIKA ANSI DEMAIS

William ho ninia feen Jennifer hela iha Taiwán iha tinan 7 ona. Sira muda ba neʼebá husi Amérika. William dehan: “Aprende língua foun, pioneiru, tau matan tan ba kongregasaun, no mós presiza bá serbisu, dala ruma buat sira-neʼe halo ita kole tebes.” Entaun, saida mak ajuda sira naʼin-rua hodi bele kontente nafatin serbí iha neʼebá? Xave ida mak sira la ansi hodi hakarak hatene lalais atu koʼalia lia-xina. Maski aprende uitoan-uitoan, sira kontinua laʼo ba oin nafatin.

William sei hanoin-hetan katuas área nian ida hatete ba nia katak atu hetan susesu, labele hanoin beibeik ba fatin neʼebé ita atu bá. Se hanoin hanesan neʼe, ita sei sente fatin neʼe dook tebes, maibé laʼo tuir hakat ida-idak. Laʼo neineik no haree ba tasi-foho sira, hakfodak mai ita toʼo tiha ona. William dehan sujestaun ida-neʼe ajuda tebes nia ho ninia feen. Nia hatutan tan katak atu hetan susesu hodi haklaken, diʼak mós husu sujestaun husi irmaun sira neʼebé moris iha neʼebá atu ita presiza halo mudansa saida iha neʼebá.

Irmán klosan ida husi Amérika naran Megan mós halo hanesan William no Jennifer. Atu haklaken didiʼak, nia hakaʼas an hodi aprende koʼalia língua xina ho diʼak. Entaun, sábadu-domingu nia sempre bá ho haklaken-naʼin grupu ida hodi haklaken ba peskadór sira iha ponte-kais ida naran Kaohsiung. Iha neʼebá Megan haklaken husi ró ida ba ró seluk. Nia haklaken ba peskadór husi rai-Bangladexe, Índia, Indonézia, Filipinas, Tailándia, no Vanuatu. Tuirmai nia hatete: “Tanba ró sira para ba tempu uitoan deʼit depois bá fali, haʼu tenke aproveita estuda Bíblia ho ema sira-neʼe iha neʼebá kedas. Baibain haʼu presiza estuda ho ema naʼin-haat ka lima dala ida. Haʼu hanoin se haʼu hatene lia-xina uitoan tan karik, neʼe diʼak. Maibé haʼu sei hanoin-hetan irmaun ida hatete ba haʼu: ‘Hakaʼas an hodi halo buat neʼebé ó halo daudaun, Jeová sei ajuda ó.’”

MORIS SIMPLES NO KONTENTE

Bainhira halo planu atu muda ba rai seluk, Cathy buka-hatene uluk rai ida neʼebé mak diʼak ba irmán klosan hanesan nia bele bá. Tuirmai, nia halo orasaun kona-ba neʼe no hakerek karta ba sukursál balu atu hatene rai saida mak la fó perigu ba irmán klosan sira. Sukursál sira fó lista ba nia kona-ba rai neʼebé mak nia bele bá, no nia hili bá Taiwán.

Cathy muda ba Taiwán iha tinan 2004. Nia konta fali: “Atu haʼu-nia osan la hotu lalais, haʼu husu ba irmaun-irmán fatin saida mak haʼu bele hola modo ka ai-fuan neʼebé baratu. Sira-nia sujestaun ajuda tebes haʼu.” Saida mak ajuda nia hodi bele moris simples hanesan neʼe? Nia hatete: “Haʼu halo orasaun beibeik hodi husu Jeová ajuda haʼu han-hemu no hatais simples deʼit. Haʼu sente Jeová rona duni haʼu-nia orasaun tanba nia hanorin haʼu oinsá mak bele moris simples no la hola sasán arbiru deʼit. Haʼu gosta tebes hodi bele moris simples, tanba neʼe mós ajuda haʼu tau fokus liu ba oinsá atu serbí Jeová.”

Maski Cathy kontente ona ho moris simples neʼe, maibé iha buat ida tan mak halo nia kontente liu. Saida mak neʼe? Nia hatán: “Tanba haʼu haklaken iha fatin ida neʼebé ema barak hakarak tebes atu hatene kona-ba lia-loos. Ida-neʼe mak halo haʼu kontente tebes!” Foufoun Cathy foin toʼo iha fatin neʼe, iha tempu neʼebá iha kongregasaun rua deʼit. Maibé agora aumenta toʼo kongregasaun hitu ona. Nia hatete: “Bainhira ita haree ho ita-nia matan rasik oinsá haklaken laʼo ba oin no ita mós kontribui ona ba serbisu neʼe, neʼe halo ita haksolok tebes!”

“AFINÁL SIRA MÓS PRESIZA HAʼU PA!”

Ohin loron Choong Keon ho Julia sente oinsá? Foufoun tanba Choong Keon koʼalia lia-xina la barak, entaun nia sente kongregasaun la presiza nia. Maibé irmaun-irmán sira la sente hanesan neʼe. Agora Choong Keon konta fali: “Bainhira ami-nia kongregasaun fahe ba rua, nuʼudar atan ba kongregasaun haʼu hetan knaar barak tebes. Iha tempu neʼebá haʼu sente haʼu serbí duni iha fatin neʼebé presiza haklaken-naʼin sira. Neʼe halo haʼu sente diʼak tebes.” Tuirmai nia koʼalia ho hamnasa: “Afinál sira mós presiza haʼu pa!” Agora nia serbí nuʼudar katuas ida iha kongregasaun neʼe. Ninia feen Julia hatete: “Ami agora iha ksolok ida neʼebé uluk ami nunka iha. Foufoun ami hanoin mai iha-neʼe hodi ajuda, maibé ami mak hetan fali ajuda hodi haksolok liuhusi esperiénsia furak sira-neʼe. Ami agradese tebes ba Jeová hodi bele fó oportunidade mai ami hodi mai serbí iha-neʼe!”

Sei iha rai barak tan mak presiza haklaken-naʼin atu ajuda halo serbisu koʼa nian. Imi atu ramata eskola ona no planu hela ba imi-nia futuru ka lae? Ka imi mak klosan no hanoin hela oinsá mak imi bele ajuda liután Jeová nia organizasaun? Imi hakarak imi-nia família hetan esperiénsia foun hodi serbí Jeová ka lae? Ka imi toʼo ona idade neʼebé la bele serbisu tan ona maibé iha esperiénsia moris barak hodi ajuda ema seluk? Se imi hotu bele fó imi-nia tempu hodi bá serbí iha fatin neʼebé presiza haklaken-naʼin, Jeová mós sei fó bensaun barak ba imi toʼo imi la bele sura.