Hakarak hatene?

Iha Bíblia, liafuan “eunuco” (lia-portugés) ka “sida-sida” (lia-indonézia) katak sá?

Dala ruma, liafuan neʼe mak kona-ba mane neʼebé kapa ona ninia oin-lulik. Iha Bíblia nia tempu, mane balu sai hanesan neʼe tanba hetan kastigu, sai dadur, ka sai atan. Mane balu hanesan neʼe mós liurai tau fiar no fó knaar ba sira atu tau matan ba feto sira husi liurai nia família. Porezemplu, Bíblia temi kona-ba mane eunuco naʼin-rua naran Hegai ho Saasgaz, neʼebé tau matan ba rai-Pérsia nia Liurai Assueroa nia feen sira.—Ester 2:3, 14.

Tuir Moisés nia Ukun-Fuan, ema neʼebé kapa ona labele sai Maromak nia povu. (Deuteronômio [Ulangan] 23:1) Nuneʼe, bainhira Bíblia temi liafuan “eunuco”, neʼe la dehan katak sempre koʼalia kona-ba mane neʼebé kapa ona, maibé dala ruma neʼe koʼalia kona-ba mane neʼebé serbisu ba liurai. Porezemplu, Bíblia temi profeta Jeremias nia maluk naran Ebed-melec nuʼudar “eunuco” ida. Liafuan neʼe atu dehan deʼit katak nia mak mane ida ho pozisaun aas neʼebé bele hakbesik kedas ba Liurai Zedekias.—Jeremias (Yeremia) 38:7, 8.

Tanbasá mak iha Bíblia nia tempu bibi-atan sira toman haketak bibi-malae husi bibi-timur?

Kona-ba tempu tesi-lia nian neʼebé sei akontese iha futuru, Jesus hatete: “Kuandu Oan-Mane husi ema mai iha ninia glória, . . . nia sei haketak ema, hanesan bibi-atan haketak bibi-malae husi bibi-timur.” (Mateus 25:31, 32) Tansá mak bibi-atan sira toman haketak bibi-malae husi bibi-timur?

Baibain iha loron, bibi-atan sira lori bibi-malae ho bibi-timur no husik sira hamutuk han duʼut iha fatin ida deʼit. Maibé toʼo kalan, bibi-atan tenke halibur fali bibi sira-neʼe no tau iha luhan laran hodi bele proteje bibi sira husi animál fuik no naʼok-teen sira, no mós atu la husik deʼit bibi sira-neʼe iha rai malirin. (Gênesis [Kejadian] 30:32, 33; 31:38-40) Bibi oin rua neʼe tenke tau iha luhan ketaketak, tanba bibi-timur mak fuik liu no bele ataka bibi-malae neʼebé maus, liuliu bibi-malae inan ho bibi-malae oan sira. Tuir livru ida (All Things in the Bible), bibi-atan mós tenke haketak bibi-malae husi bibi-timur bainhira sira “fó-kaben, hois susubeen, no tesi bibi-fulun”. Ema Izraél antigu sira toman ona haree bibi-atan, bibi-malae no bibi-timur, tan neʼe mak Jesus temi kona-ba neʼe iha ninia ai-knanoik.