Letra ebraiku neʼebé kiʼik liu hotu

Ita fiar metin katak Maromak nia promesa hotu sei sai loos? Jesus fiar ida-neʼe, no ninia hanorin ajuda ema atu hametin sira-nia fiar. Porezemplu, iha Mateus 5:18, Jesus dehan: “Haʼu hatete loloos ba imi katak, maski karik lalehan no rai sei lakon, maibé letra kiʼik ida ka sinál kiʼik husi letra ida sei la lakon iha Ukun-Fuan toʼo buat hotu sai loos.”

Husi alfabetu lia-ebraiku nian, letra kiʼik liu mak י (yod). Neʼe mak letra primeiru husi tetragrama, ka Maromak nia naran santu, Jeová.a Eskriba no ema farizeu sira hafolin tebes Maromak nia Ukun-Fuan, toʼo sira fiar katak “sinál kiʼik” husi letra ida-idak mós importante.

Jesus hatete maski lalehan no rai bele lakon, maibé liafuan husi Ukun-Fuan sei nunka lakon. Maibé tuir loloos, Bíblia hatete katak lalehan no rai sei nunka lakon. (Salmo [Mazmur] 78:69) Tan neʼe, Jesus nia liafuan bele hametin ita-nia fiar katak buat hotu husi Ukun-Fuan sei sai loos, inklui mós buat neʼebé kiʼik liu.

Maromak Jeová hanoin duni kona-ba buat kiʼik ka lae? Sin. Hanoin toʼok: Maromak bandu ema Izraél antigu atu labele hatohar bibi nia ruin bainhira sira prepara Festa Salvasaun nian. (Êxodo [Keluaran] 12:46) Karik neʼe mak mandamentu neʼebé kiʼik deʼit. No karik ema Izraél mós la komprende tansá mak sira labele hatohar bibi nia ruin. Maibé liuhusi buat kiʼik neʼe mak Jeová fó sai nanis katak bainhira ema fó kastigu-mate ba Mesias iha ai-riin terus nian, Mesias nia ruin ida mós sei la tohar.​—Salmo (Mazmur) 34:20; João 19:31-33, 36.

Jesus nia liafuan hanorin saida mai ita? Ita mós bele fiar metin katak Maromak Jeová nia promesa hotu sei sai loos, inklui mós promesa neʼebé kiʼik liu. Kuandu ita hanoin kona-ba letra ebraiku neʼebé kiʼik liu hotu, ida-neʼe ajuda duni ita atu hametin ita-nia fiar!