Haksolok hodi halaʼo moris neʼebé simples

DANIEL NO MIRIAM kaben iha Setembru 2000 no hela iha sidade Barcelona, rai-España. Sira iha moris neʼebé diʼak. Daniel dehan: “Ami hetan saláriu diʼak husi ami-nia serbisu, tan neʼe ami bele bá han iha restaurante, pasiar ba rai seluk, no hatais roupa sira neʼebé diʼak. Ami mós bá haklaken beibeik.” Maibé tuirmai buat ruma akontese.

Diskursu ida husi reuniaun boot ba loron tolu iha 2006 kona tebes Daniel nia laran. Diskursu neʼe husu pergunta neʼe: “Ita hakaʼas an hodi ajuda sira neʼebé ‘laʼo daudaun ba mate’ atu laʼo fali iha dalan ba moris rohan-laek ka lae?” (Provérbios [Amsal] 24:11) Diskursu neʼe esplika katak ita iha responsabilidade atu haklaken Bíblia nia mensajen tanba neʼe bele salva ema nia moris. (Apóstolu 20:26, 27) Daniel dehan: “Haʼu sente hanesan Jeová mak koʼalia ba haʼu iha tempu neʼebá.” Diskursu neʼe mós hatete katak, se ita mak halo serbisu barak ba Jeová, ita-nia haksolok sei sai boot liután. Daniel rekoñese katak neʼe loos duni, tanba nia bele haree Miriam neʼebé serbí daudaun nuʼudar pioneiru iha tempu neʼebá haksolok tebes ho ninia moris.

Diskursu neʼe kona duni Daniel, tan neʼe nia deside atu halo mudansa ba ninia moris. Nia komesa hamenus ninia oras serbisu, foti pioneiru, no planu hamutuk ho Miriam atu bá serbí iha fatin neʼebé presiza tan haklaken-naʼin hodi bele hetan haksolok liután.

FOUFOUN SUSAR, MAIBÉ HAKSOLOK FALI

Iha Maiu 2007, Daniel no Miriam para husi serbisu no muda ba rai neʼebé uluk sira vizita, rai-Panamá. Fatin neʼebé sira atu haklaken mak illa sira iha arkipélagu Bocas del Toro husi Tasi Karibe. Iha fatin sira-neʼe, maioria ema Ngabe. Daniel no Miriam rai ona osan balu, tan neʼe sira hanoin bele hela iha Panamá maizumenus ba fulan ualu.

Iha illa sira-neʼe, sira uza ró no bisikleta. Sira sei hanoin-hetan dala primeiru sira uza bisikleta iha loron neʼebé manas tebes, no sira tenke hean bisikleta ba kilómetru 30 liu hodi tun-saʼe foho. Iha tempu neʼebá, Daniel sente kole tebes toʼo besik dezmaia. Maibé ema Ngabe sira simu diʼak, liuliu tanba Daniel no Miriam aprende ona sira-nia lian uitoan hodi koʼalia ba sira. Lakleur deʼit sira hetan ona estudante Bíblia hamutuk 23.

Maibé saida mak akontese bainhira sira uza hotu sira-nia osan? Daniel hatete: “Ami-nia matan nakonu ho matan-been, no ami komesa halo fali planu atu fila ba España. Ami sente triste tebes tanba ami sei husik ami-nia estudante sira.” Maibé fulan ida liutiha, ami simu mensajen furak ida. Miriam dehan: “Ami hetan konvite atu serbí nuʼudar pioneiru tempu-tomak. Ami haksolok tebes hodi bele kontinua serbí iha neʼe!”

HAKSOLOK BOOT LIU HOTU

Tanba mudansa barak iha ita-nia organizasaun, iha 2015 Daniel ho Miriam simu knaar atu serbí fali nuʼudar pioneiru regulár. Sira halo saida kona-ba neʼe? Sira tau fiar ba promete iha Salmo 37:5 neʼebé dehan: “Husik Jeová dirije ó-nia dalan; sadere ba nia, no nia sei ajuda ó.” Sira hetan serbisu ida hodi apoia sira-nia pioneiru, no ohin loron sira serbí iha kongregasaun ida iha provínsia Veraguas, rai-Panamá.

Daniel hatete: “Antes ami sai husi España, ami duvida kona-ba ami bele halaʼo moris neʼebé simples ka lae. Maibé ohin loron ami iha moris neʼebé simples deʼit, no ami la falta buat ida iha ami-nia moris.” Sira-nia haksolok boot liu mak saida? Sira dehan: “La iha buat ida mak bele kompara ho haksolok neʼebé ami iha hodi ajuda ema haraik-an sira aprende kona-ba Jeová!”