HUSI ITA-NIA ARKIVU

Laran-manas no domin neʼebé sira sente mak boot liu fali uluk

IHA loron-sesta, fulan-Setembru 1922, ema naʼin–8.000 tama ba salaun atu tuir reuniaun boot ida. Maski dadeer-saan deʼit, loron neʼe manas ona no aprezentadór fó avizu dehan katak ema bele sai husi salaun se hakarak, maibé la bele tama fali.

Bainhira irmaun-irmán sira kanta tiha knananuk sira, irmaun Joseph Rutherford saʼe ba plataforma. Ema hotu hein namanas atu rona ninia diskursu. Balu hamriik no laʼo tanba la bele tahan manas iha salaun laran. Irmaun Rutherford husu sira atu tuur no rona didiʼak. Durante diskursu laʼo hela, karik irmaun-irmán sira la haree hena boot ida neʼebé lulun ho didiʼak no tara hela iha plataforma nia kakuluk leten.

Irmaun Rutherford koʼalia tópiku ida kona-ba, “Ukun lalehan nian besik ona.” Ba oras ida ho balu, nia koʼalia ho ninia lian neʼebé boot kona-ba oinsá profeta sira iha tempu uluk haklaken kona-ba Maromak nia Ukun. Bainhira ninia diskursu besik atu ramata, nia husu ba rona-naʼin sira, “Ita fiar katak Liurai glória nian hahú ona atu ukun?” Rona-naʼin sira hatán ho lian makaʼas: “Fiar!”

Irmaun Rutherford kontinua koʼalia ho laran-manas dehan: “Se nuneʼe, haklaken fali bá, imi Maromak Aas nia oan sira! . . . Haree bá, Liurai neʼe ukun daudauk ona! Imi mak ninia atan sira neʼebé atu fó sai kona-ba neʼe. Tan neʼe, haklaken, haklaken, haklaken, kona-ba Liurai no ninia ukun.”

Iha tempu neʼe, hena neʼebé tara hela iha leten nakloke tun, no ema bele haree liafuan neʼebé dehan: “Haklaken kona-ba Liurai no ninia ukun.”

Kona-ba tempu neʼe, irmaun Ray Bopp hatete: “Irmaun-irmán sira hotu sai laran-manas tebes.” Anna Gardner hatete katak “salaun nia kakuluk riin sira nakdoko tanba ema barak basa liman”. Fred Twarosh dehan: “Irmaun-irmán sira hotu hamriik dala ida deʼit.” Evangelos Scouffas hatete katak iha tempu neʼe, ema hotu nia matan nakonu ho matan-been.

Ema barak neʼebé tuir reuniaun boot neʼe hola parte ona atu haklaken kona-ba Maromak nia Ukun. Maibé agora sira sente laran-manas liután. Ethel Bennecoff hatete katak laran-manas no domin neʼebé Estudante Bíblia sira sente mak boot liu fali uluk. Odessa Tuck, neʼebé tinan 18 iha tempu neʼebá, dehan katak reuniaun boot neʼe book tebes ninia laran atu halo buat barak liután iha serbisu haklaken. Nia dehan: “Haʼu la hatene saida mak haʼu sei halo ka oinsá no iha neʼebé mak haʼu sei bá. Maibé buat neʼebé haʼu hatene mak, haʼu hakarak sai hanesan Isaías neʼebé dehan, ‘Haʼu mak neʼe! Haruka haʼu bá!’” (Isaías [Yesaya] 6:8) Ralph Leffler hatete: “Loron neʼe mak loron neʼebé kampaña kona-ba haklaken Maromak nia Ukun iha mundu tomak foin komesa.”

Ita bele komprende tanbasá reuniaun boot neʼe iha Cedar Point, Ohio iha tinan 1922 mak tempu neʼebé espesiál tebes iha Testemuña ba Jeová nia istória. George Gangas hatete: “Reuniaun boot ida-neʼe book haʼu atu nunka falta reuniaun boot ida.” Tuir buat neʼebé nia hanoin-hetan, nia nunka falta. Julia Wilcox hatete: “Bainhira ita-nia livru sira temi kona-ba reuniaun boot iha Cedar Point, Ohio, haʼu sempre hanoin fali sentimentu iha tempu haʼu tuir reuniaun neʼe. Haʼu hakarak hatete, ‘Obrigadu Jeová tanba haʼu bele tuir reuniaun boot neʼe.’”

Karik ita mós hanoin-hetan reuniaun boot ida neʼebé halo ita laran-manas no nakonu ho domin ba ita-nia Maromak no Liurai. Bainhira ita hanoin fali reuniaun boot sira-neʼe, ita mós fó agradese ba Jeová tanba ita iha oportunidade atu tuir reuniaun furak atu aprende kona-ba nia.

Iha kotuk, Jeová hatán ba orasaun ida

Arthur no Nellie Claus toʼo sedu atu hetan tuur-fatin neʼebé diʼak. Arthur dehan: “Haʼu fó atensaun didiʼak ba liafuan ida-idak.” Derrepente nia sente kabun moras. Nia lakohi atu sai ba liʼur tanba nia hatene katak sai ona la bele tama fali. Asistente ida husu ba nia, “Tanbasá mak Ita hakarak sai iha tempu hanesan neʼe?” Maibé Arthur hatene katak nia tenke sai duni.

Bainhira Arthur fila mai, nia rona ema basa liman makaʼas iha salaun laran. Nia hakaʼas an atu buka fatin iha salaun nia liʼur hodi rona saida mak akontese iha laran, no nia hetan fatin ida hodi tabele saʼe ba kakuluk leten, maizumenus aas metru 4,8. Tuirmai nia muda ba janela boot ida neʼebé nakloke hela.

Toʼo tiha iha leten, Arthur haree iha irmaun balu mós hamriik bilán hela no hateke tun ba oradór iha kraik. Sira hein hela orden atu tesi tali sira neʼebé kesi hela hena lulun boot ida. Maibé atu tesi tali sira hamutuk iha tempu neʼebé hanesan, sira sei falta tudik ida. Arthur nia bolsu iha tudik kiʼik ka lae? Iha duni, no neʼe halo irmaun sira iha leten sente kalma fali. Arthur no sira seluk buka sira-nia fatin no hein ba sinál atu tesi tali sira. Se sira mak rona irmaun Rutherford hatete liafuan “Haklaken” dala rua, sira sei tesi tali hotu.

Ema sira neʼebé haree hatete katak hena lulun boot ho kór oin tolu nakloke tun kapás tebes. Iha hena nia klaran iha dezeñu ida kona-ba Jesus.

Hotu tiha, irmaun sira esplika ba Arthur katak sira uza eskada ida mak hodi saʼe ba kakuluk leten, maibé ema foti tiha eskada neʼe. Iha leten sira la bele buka ajuda husi ema seluk, entaun sira halo orasaun atu husu Jeová haruka ema ida saʼe bá ho tudik ida. Irmaun sira-neʼe la iha duvida katak Jeová mak hatán sira-nia orasaun iha dalan neʼebé úniku tebes.