Pergunta husi lee-naʼin

Bainhira Satanás hatete ba Eva katak Eva sei la mate se nia han husi ai-hun koñesimentu kona-ba buat diʼak no aat, neʼe mak hun ba ideia kona-ba mate-klamar ka lae?

Tuir loloos, lae. Diabu la hatete ba Eva katak se nia han ai-fuan neʼebé Maromak bandu, ninia isin mak sei mate no ninia klamar sei kontinua moris iha fatin seluk. Liuhusi samea, Satanás hatete katak se Eva han ai-fuan husi ai-hun neʼe, ‘nia sei la mate’. Satanás fó ideia katak Eva sei kontinua moris, no hetan moris neʼebé kontente liu iha mundu, moris neʼebé ketak husi Maromak.—Gén 2:17; 3:3-5.

Se doutrina falsu kona-ba mate-klamar la mai husi Eva nia tempu, hanorin neʼe mai husi neʼebé? Ita la hatene ho loloos. Maibé ita hatene katak adorasaun falsu hotu lakon durante Rai-Nabeen iha Noé nia tempu. Depois Rai-Nabeen la iha hanorin falsu ruma iha mundu tanba Noé no ninia família deʼit mak moris liu Rai-Nabeen, no sira halaʼo adorasaun neʼebé loos.

Entaun hanorin falsu kona-ba mate-klamar hahú depois tempu Rai-Nabeen. Bainhira Maromak haketak língua sira iha Babel no ema “namkari ba fatin oioin iha mundu tomak”, karik sira lori hamutuk ho sira ideia kona-ba mate-klamar. (Gén 11:8, 9) Maski ita la hatene ho loloos hanorin falsu neʼe hahú iha neʼebé, maibé ita bele fiar katak “lia-bosok nia aman”, Diabu Satanás mak book ema atu hahú hanorin ida-neʼe no nia kontente loos atu haree ema barak fiar ida-neʼe.—João 8:44.