Saida mak ema balu hatete kona-ba orasaun
“Bainhira haʼu reza, haʼu sente hanesan Maromak iha haʼu-nia sorin kedas, kaer hela haʼu-nia liman no dirije haʼu bainhira haʼu lakon dalan.”—MARÍA.
“Haʼu-nia feen moras ba tinan 13 tanba kankru no ikusmai mate. Iha tempu neʼebá haʼu halo orasaun ba Maromak loron-loron no haʼu sente duni katak nia rona ba haʼu-nia terus. Haʼu sente dame iha laran.”—RAÚL.
“Orasaun mak prezente furak ida husi Maromak mai ita.”—ARNE.
María, Raúl, Arne, no ema barak tan sente katak orasaun mak prezente espesiál. Sira sente katak, liuhusi orasaun sira bele koʼalia ba Maromak, fó agradese ba nia no husu ninia ajuda. Sira fiar metin buat neʼebé Bíblia hatete kona-ba halo orasaun ba Maromak: “Ita fiar nia, katak buat naran deʼit neʼebé ita husu hodi tuir ninia hakarak, nia rona ita.”—1 João 5:14.
Maibé, iha mós ema barak neʼebé la fiar buat neʼebé Bíblia hatete kona-ba orasaun. Neʼe mak buat neʼebé Steve hatete: “Bainhira haʼu tinan 17, haʼu-nia kolega naʼin-tolu mate iha asidente. Ida mate tanba asidente ho karreta, no rua mate tanba mout iha tasi.” Saida mak Steve halo? Nia dehan: “Haʼu reza ba Maromak no husu tanbasá mak buat sira-neʼe akontese, maibé la hetan resposta. Tan neʼe, haʼu husu ba haʼu-nia an, ‘Tanbasá tenke halo orasaun?’” Tanba ema barak sente katak Maromak la hatán sira-nia orasaun, sira hanoin katak saugati deʼit atu halo orasaun.
Ema seluk mós sente katak la presiza halo orasaun tanba se Maromak hatene ona buat hotu, nia mós hatene ona ita-nia problema sira. Tan neʼe ita la presiza fó-hatene ba nia.
Iha mós ema neʼebé fiar katak Maromak lakohi rona ba sira-nia orasaun tanba sala neʼebé sira halo uluk. Jenny hatete: “Haʼu sente folin-laek tanba uluk haʼu halo sala beibeik no neʼe halo haʼu arrepende tebes. Tan neʼe haʼu hatete ba haʼu-nia an katak haʼu la merese atu Maromak rona haʼu-nia orasaun.”
Oinsá Ita rasik sente kona-ba orasaun? Se Ita mós iha duvida, fiar bá katak Bíblia bele ajuda Ita. Ita bele tau fiar ba buat neʼebé Bíblia hatete kona-ba tópiku neʼe.a Ita bele hetan resposta ba pergunta hanesan:
Maromak rona duni ita-nia orasaun ka lae?
Tanbasá Maromak la rona ba orasaun balu?
Oinsá mak Ita tenke halo orasaun atu Maromak rona Ita?
Oinsá mak orasaun bele ajuda Ita?
a Iha Bíblia laran, ita bele hetan orasaun barak neʼebé Maromak nia atan sira halo, inklui mós Jesus Kristu. Iha orasaun 150 liu iha Eskritura Lian Ebraiku, neʼebé dala ruma hanaran Testamentu Tuan.