Oinsá mak Ita bele tama ba mundu foun

Iha informasaun sira antes neʼe esplika katak lakleur tan Maromak sei halakon tiha ema aat no problema hotu husi mundu neʼe. Ita bele fiar katak neʼe sei akontese duni tanba Maromak nia Liafuan Bíblia promete:

‘Mundu neʼe sei lakon tiha.’—1 JOÃO 2:17.

Maibé ita bele fiar katak sei iha ema neʼebé hetan salvasaun tanba eskritura neʼe mós promete:

“Ema neʼebé halo Maromak nia hakarak sei moris ba nafatin.”

Tan neʼe atu hetan salvasaun, ita presiza halo tuir Maromak nia hakarak. Atu hatene Maromak nia hakarak, ita presiza hatene uluk kona-ba nia.

“HATENE DIDIʼAK” MAROMAK HODI HETAN SALVASAUN

Dezeñu sira: 1. Enfermeira ida tuur iha rai, kole tebes no estrese. 2. Nia deskansa iha restaurante no haree ninia kolega serbisu kontente lee revista ida. 3. Ninia kolega serbisu lee eskritura ida ba nia no fó kartaun kontaktu jw.org.

Jesus hatete: “Neʼe mak moris rohan-laek: Katak sira hatene didiʼak kona-ba Ita, Maromak loos mesak deʼit.” (João 17:3) Atu bele hetan salvasaun no moris ba nafatin, ita presiza “hatene didiʼak” Maromak. Neʼe laʼós deʼit rekoñese katak Maromak iha ka hatene buat balu kona-ba nia. Ita presiza sai ninia belun. Kuandu ita hakarak habelun ho ema ida, ita presiza uza tempu barak atu koñese belun neʼe, nuneʼe mós kuandu ita hakarak hametin relasaun belun ho Maromak. Haree toʼok lia-loos importante balu husi Bíblia neʼebé bele ajuda ita atu haburas no hametin relasaun nuʼudar belun ho Maromak.

Lia-loos neʼebé ita aprende husi Bíblia

Ita aprende katak Maromak hakarak ita atu moris iha Paraízu.

Nia kria ema primeiru, Adão no Eva, no tau sira iha fatin neʼebé furak naran jardín Eden. Sira mak ema perfeitu, no Maromak fó ba sira buat hotu neʼebé sira presiza atu moris ho kontente. Sira bele moris ba nafatin. Se sira nafatin habelun ho Maromak, sira sei la mate. Maibé sira hili atu la halo tuir mandamentu simples neʼebé Maromak fó ba sira.

Ita aprende tanbasá ohin loron ita hasoru terus.

Tanba mane primeiru Adão la halo tuir Maromak, nia no ninia bei-oan hotu lakon oportunidade atu moris ba nafatin. Bíblia dehan: “Sala tama iha mundu liuhusi ema ida, no mate tanba sala.” (Roma 5:12) Hanesan ema ida hetan moras neʼebé hadaʼet tutan husi ninia inan-aman, Adão hadaʼet sala ba ninia jerasaun hotu. Rezultadu mak ita hotu sai ferik-katuas no mate.

Ita aprende saida mak Maromak halo ona atu ajuda ita.

Bíblia dehan: “Maromak hadomi tebes mundu toʼo fó nia Oan-Mane mesak, atu nuneʼe ema hotu neʼebé hatudu fiar ba nia sei la lakon, maibé hetan moris rohan-laek.” (João 3:16) Maromak haruka Jesus mai mundu atu fó ninia moris hodi salva ita. Kona-ba hahalok domin neʼe, mane Indianu ida neʼebé idade 86 naran Prabhakar hatete: “Neʼe hatudu sai Jeováa nia domin boot mai haʼu. Ninia domin fó esperansa mai haʼu atu bele moris ba nafatin.”

Ita aprende oinsá ita bele hatudu agradese ba buat neʼebé Maromak halo ona mai ita.

Bíblia dehan katak ita bele hatudu agradese ba buat neʼebé Maromak halo ona hodi “halo tuir ninia ukun-fuan sira”. (1 João 2:3) Maromak Jeová nia domin hatudu mai ita katak ita bele moris kontente agora. (Isaias 48:17, 18, nota-rodapé) Maromak lakohi ita hetan terus. Nia promete katak se ita halo tuir ninia matadalan, ita laʼós deʼit bele moris kontente agora maibé mós bele iha oportunidade atu moris ba nafatin.

LEE MAROMAK NIA LIAFUAN BÍBLIA LOROLORON

Enfermeira neʼe hateke saʼe ba lalehan nuʼudar nia lee Bíblia durante tempu deskansa. — Ita bele hetan salvasaun hodi husu ajuda ba Maromak liuhusi orasaun no halo tuir ninia hakarak

Ita presiza han beibeik atu bele moris. Maibé Jesus hatete: “Ema labele moris deʼit ho paun, maibé ho liafuan hotu neʼebé sai husi Jeová nia ibun.”—Mateus 4:4.

Ohin loron, ita bele hetan Jeová nia liafuan iha Bíblia. Nuʼudar Ita aprende Bíblia, ita sei hetan lia-loos importante kona-ba saida mak Maromak halo iha tempu uluk, ohin loron, no mós iha futuru.

HUSU AJUDA BA MAROMAK LIUHUSI ORASAUN

Se Ita hakarak halo tuir Maromak maibé sente susar atu husik buat neʼebé Maromak la simu, saida mak Ita bele halo? Ita bele hetan ajuda se Ita hatene didiʼak kona-ba Maromak.

Hanoin toʼok kona-ba feto ida naran Sakura, neʼebé uluk halo hahalok la morál. Bainhira nia hahú estuda Bíblia, nia aprende kona-ba Maromak nia mandamentu atu “hasees an husi sala seksuál”. (1 Korinto 6:18) Sakura halo orasaun ba Maromak atu husu ajuda no konsege hapara ninia toman aat neʼe. Maski nuneʼe nia nafatin luta makaʼas atu tahan hasoru tentasaun. Nia hatete: “Se hanoin seksuál mosu iha haʼu-nia neon, haʼu fó-hatene ba Jeová iha orasaun, tanba haʼu labele luta hasoru neʼe mesak. Orasaun iha duni kbiit atu halo haʼu sente besik ho Jeová.” Hanesan Sakura, ema barak tebes mak koñese daudaun Maromak. Maromak fó kbiit neʼebé sira presiza atu troka sira-nia hahalok no moris tuir buat neʼebé halo nia kontente.—Filipe 4:13.

Bainhira Ita hatene didiʼak Maromak, ‘Maromak mós sei hatene didiʼak Ita’ nuʼudar ninia belun neʼebé folin-boot. (Galásia 4:9; Salmo 25:14) No Ita bele hetan salvasaun no tama ba Maromak nia mundu foun. Maibé mundu foun sei sai oinsá? Informasaun tuirmai sei esplika kona-ba neʼe.

a Jeová mak Maromak nia naran neʼebé temi iha Bíblia.