LISAUN ESTUDU 46
Jeová garantia katak mundu sei sai Paraízu
“Ema hotu neʼebé buka bensaun ba ninia an rasik iha rai sei hetan bensaun husi Maromak lia-loos nian.”—ISA 65:16.
KNANANUK 3 Ami-nia forsa no esperansa
IHA LISAUN NEʼE:a
1. Profeta Isaias fó sai mensajen saida ba ema Izraél?
PROFETA Isaias dehan katak Jeová mak “Maromak lia-loos nian”. Liafuan neʼebé tradús nuʼudar “lia-loos” signifika “amen”. (Isa 65:16, nota) “Amen” katak “sai nuneʼe bá”, ka “loos duni”. Dala barak Bíblia uza liafuan “amen” atu hatudu katak buat neʼebé Jeová ka Jesus hatete ka halo mak loos duni. Isaias nia mensajen ba ema Izraél mak klaru: Buat neʼebé Jeová fó-hatene nanis sempre sai loos. Jeová prova ona ida-neʼe hodi kumpre ninia promesa hotu.
2. Tanbasá ita bele tau fiar ba Jeová nia promesa sira kona-ba futuru, no ita sei koʼalia kona-ba pergunta saida deʼit?
2 Ita mós bele tau fiar ba Jeová nia promesa sira kona-ba futuru ka lae? Liutiha tinan 800 husi Isaias nia tempu, apóstolu Paulo esplika tanbasá ita bele fiar katak Maromak nia promesa sira sempre sai loos. Paulo hatete: “Tanba Maromak nunka bosok.” (Ebr 6:18) Hanesan bee-matan neʼebé iha bee moos labele prodús bee meer, nuneʼe mós Jeová, Hun ba lia-loos, labele bosok. Tan neʼe, ita bele tau fiar duni ba buat hotu neʼebé Jeová hatete, inklui ninia promesa sira kona-ba futuru. Iha lisaun neʼe, ita sei koʼalia kona-ba pergunta sira tuirmai: Saida mak Jeová promete mai ita kona-ba futuru? No oinsá Jeová garantia katak ninia promesa sira sei sai loos?
SAIDA MAK JEOVÁ PROMETE?
3. (a) Promesa saida mak folin-boot ba Maromak nia atan sira? (Apokalipse 21:3, 4) (b) Ema balu dehan saida bainhira ita haklaken ba sira kona-ba neʼe?
3 Ita sei koʼalia kona-ba promesa neʼebé folin-boot ba Maromak nia atan sira iha mundu tomak. (Lee Apokalipse 21:3, 4.) Jeová promete katak iha futuru “mate sei la iha tan, no ema sei la triste tan ka tanis ka sente moras”. Ita barak uza eskritura neʼe bainhira haklaken ba ema kona-ba moris iha Paraízu. Ema balu dehan saida bainhira ita koʼalia ba sira kona-ba neʼe? Karik sira balu dehan: “Neʼe sei nunka sai loos.”
4. (a) Saida mak Jeová hatene nanis kona-ba ita-nia tempu? (b) Bainhira fó sai ninia promesa, saida tan mak Jeová halo?
4 Klaru katak bainhira Maromak dirije apóstolu João atu hakerek kona-ba moris iha Paraízu, Jeová hatene katak ita sei fahe esperansa neʼe ba ema seluk bainhira haklaken kona-ba Maromak nia Ukun. Jeová mós hatene katak ema barak sei sente susar atu fiar ba promesa kona-ba “buat foun sira”. (Isa 42:9; 60:2; 2 Kor 4:3, 4) Entaun, oinsá mak ita bele hametin ema seluk no mós ita rasik nia fiar katak promesa iha Apokalipse 21:3, 4 sei sai loos? Jeová laʼós deʼit fó sai kona-ba promesa furak, maibé nia mós fó razaun oioin kona-ba tanbasá ita bele tau fiar ba ida-neʼe. Razaun hanesan saida?
JEOVÁ GARANTIA KATAK NINIA PROMESA SEI SAI LOOS
5. Eskritura saida mak fó ita razaun atu tau fiar ba Maromak nia promesa, no eskritura neʼe dehan saida?
5 Ita bele hetan razaun oioin atu tau fiar ba Jeová nia promesa kona-ba Paraízu iha Apokalipse 21:5, 6a. Neʼe dehan: “Ida neʼebé tuur iha kadunan dehan: ‘Haree bá! Haʼu halo buat hotu sai foun.’ Nia mós dehan: ‘Hakerek liafuan sira-neʼe bá, tanba liafuan sira-neʼe mak loos no ema bele tau fiar.’ No nia dehan ba haʼu: ‘Liafuan sira-neʼe sai loos ona! Haʼu mak Alfa no Ómega, ida neʼebé primeiru no ida neʼebé ikus.’”
6. Tanbasá liafuan iha Apokalipse 21:5, 6 hametin ita-nia fiar ba Maromak nia promesa?
6 Tanbasá eskritura neʼe hametin ita-nia fiar ba Maromak nia promesa? Livru Wahyu Klimaksnya esplika versíkulu sira-neʼe hodi hatete: “Neʼe hanesan Jeová rasik asina dokumentu ida hodi garantia katak ninia promesa sira kona-ba futuru sei sai loos.”b Maromak nia promesa hakerek iha Apokalipse 21:3, 4. Tuirmai, iha versíkulu 5 no 6 Jeová asina ka fó garantia katak nia sei kumpre ninia promesa. Mai ita aprende kona-ba liafuan neʼebé Jeová uza atu fó garantia.
7. Sé mak koʼalia liafuan iha versíkulu 5, no tanbasá neʼe espesiál?
7 Maromak nia garantia hahú ho liafuan: “Ida neʼebé tuur iha kadunan dehan.” (Apok 21:5a) Liafuan sira-neʼe espesiál duni tanba Jeová rasik mak koʼalia, no Jeová koʼalia dala tolu deʼit iha livru Apokalipse. Entaun laʼós anju ida ka Jesus mak fó garantia, maibé Jeová rasik! Neʼe fó prova katak ita bele duni tau fiar ba ninia liafuan tuirmai. Tanbasá? Tanba Jeová “nunka bosok”. (Tito 1:2) Tan neʼe, ita bele fiar katak liafuan iha Apokalipse 21:5, 6 sei sai loos duni.
“HAREE BÁ! HAʼU HALO BUAT HOTU SAI FOUN”
8. Saida mak Jeová hatete atu garantia katak ninia promesa sei sai loos? (Isaias 46:10)
8 Mai ita koʼalia kona-ba liafuan: “Haree bá!” (Apok 21:5) Liafuan Gregu neʼebé tradús nuʼudar “haree bá!” temi beibeik iha livru Apokalipse. Livru ida kona-ba Bíblia esplika katak fraze neʼe uza hodi “haruka lee-naʼin atu tau atensaun ba buat neʼebé sei fó sai tuirmai”. Tuirmai Maromak koʼalia saida? Nia hatete: “Haʼu halo buat hotu sai foun.” Sin, Jeová koʼalia kona-ba buat neʼebé nia sei halo iha futuru no nia hatene katak nia sei kumpre duni ida-neʼe. Iha lian Gregu orijinál, liafuan “haʼu halo buat hotu sai foun”, neʼe hanesan nia kumpre daudaun promesa sira-neʼe.—Lee Isaias 46:10.
9. (a) Liafuan “halo buat hotu sai foun” refere ba buat rua saida? (b) Saida mak sei akontese ba “lalehan uluk nian no rai uluk nian”?
9 Mai ita koʼalia kona-ba fraze neʼebé mosu tuirmai iha Apokalipse 21:5: “Halo buat hotu sai foun.” Iha kapítulu neʼe, fraze neʼe refere ba buat rua neʼebé Jeová sei halo. Primeiru, Jeová sei halakon tiha sistema tuan. Segundu, nia sei lori sistema neʼebé foun. Apokalipse 21:1 dehan: “Lalehan uluk nian no rai uluk nian lakon tiha ona.” “Lalehan uluk nian” refere ba governu sira neʼebé hetan influénsia husi Satanás no anju aat sira. (Mt 4:8, 9; 1 João 5:19) Dala ruma, Bíblia uza liafuan “rai” atu refere ba ema neʼebé hela iha mundu. (Gén 11:1; Sal 96:1) Tan neʼe, “rai uluk nian” refere ba ema aat neʼebé moris ohin loron. Jeová sei la hadiʼa “lalehan” no “rai” neʼebé agora iha, maibé nia sei halakon sira iha dalan neʼebé kompletu. Nia sei troka lalehan uluk nian no rai uluk nian ho “lalehan foun no rai foun”, neʼe mak governu foun no ema ho hahalok loos.
10. Saida mak Jeová sei halo foun?
10 Iha dalan saida tan mak Jeová sei halo buat hotu sai foun? (Apok 21:5) Jeová sei hadiʼa mundu no ema atu sai perfeitu. Isaias fó sai nanis katak mundu tomak sei sai fatin furak hanesan jardín Eden. Jeová mós sei hafoun ita hodi kura ita ida-idak iha dalan neʼebé kompletu. Ema neʼebé ain-kudeik, matan-delek, no tilun-diuk sei hetan kura, no ema mate mós sei moris fali.—Isa 25:8; 35:1-7.
“LIAFUAN SIRA-NEʼE MAK LOOS NO EMA BELE TAU FIAR. . . . LIAFUAN SIRA-NEʼE SAI LOOS ONA!”
11. Jeová haruka João atu halo saida, no tanbasá?
11 Saida tan mak Maromak hatete atu garantia ninia promesa? Jeová hatete ba João: “Hakerek liafuan sira-neʼe bá, tanba liafuan sira-neʼe mak loos no ema bele tau fiar.” (Apok 21:5) Jeová laʼós deʼit haruka João atu “hakerek”, maibé nia mós fó razaun. Nia hatete: “Tanba liafuan sira-neʼe mak loos no ema bele tau fiar”, katak ninia liafuan sira sei sai loos duni. Ita agradese tanba João halo tuir hodi “hakerek” liafuan sira-neʼe. Rezultadu mak ita bele lee Maromak nia promesa kona-ba Paraízu no medita kona-ba bensaun furak neʼebé ita sei simu.
12. Tanbasá Jeová dehan: “Liafuan sira-neʼe sai loos ona”?
12 Tuirmai Maromak hatete saida? “Liafuan sira-neʼe sai loos ona!” (Apok 21:6) Jeová koʼalia hanesan ninia promesa hotu kona-ba Paraízu akontese ona, tanba la iha buat ida mak bele hanetik nia atu kumpre ninia hakarak. Jeová koʼalia buat ida tan atu garantia katak nia sei kumpre ninia promesa. Saida mak neʼe?
“HAʼU MAK ALFA NO ÓMEGA”
13. Tanbasá Jeová hatete: “Haʼu mak Alfa no Ómega”?
13 Hanesan temi ona, Jeová rasik mak koʼalia dala tolu iha vizaun neʼebé João haree. (Apok 1:8; 21:5, 6; 22:13) Situasaun ida-idak, Jeová hatete: “Haʼu mak Alfa no Ómega.” Iha alfabetu lian Gregu letra primeiru mak alfa no letra ikus mak ómega. Hodi uza liafuan “Alfa no Ómega”, Jeová hatudu katak kuandu nia hahú buat ruma, nia sei halo ida-neʼe toʼo hotu no susesu.
Bainhira Jeová hahú halo buat ruma, nia sei halo ida-neʼe toʼo hotu (Haree parágrafu 14, 17)
14. (a) Fó toʼok ezemplu kona-ba bainhira mak Jeová hatete “Alfa” no bainhira mak nia sei hatete “Ómega”. (b) Génesis 2:1-3 fó garantia saida?
14 Depois Jeová kria tiha Adão no Eva, Nia fó sai ninia hakarak ba ema no rai. Bíblia hatete: “Maromak haraik bensaun ba sira, no Maromak dehan ba sira: ‘Iha oan no sai barak bá, halo nakonu no domina rai neʼe.’” (Gén 1:28) Iha tempu neʼebá, neʼe hanesan Jeová hatete “Alfa” tanba Jeová fó sai ninia hakarak ba mundu no ema. Iha futuru, nia sei hatete “Ómega” bainhira nia kumpre ninia hakarak iha dalan neʼebé kompletu, no Adão no Eva nia bei-oan sira neʼebé laran-metin halo nakonu mundu no halo mundu sai Paraízu. Depois Jeová “kria hotu ona lalehan no rai ho buat hotu neʼebé iha laran”, tuirmai Jeová fó garantia. Ita bele lee ida-neʼe iha Génesis 2:1-3. (Lee.) Jeová hatete katak loron hitu mak sagradu. Neʼe katak sá? Jeová garantia katak nia sei kumpre duni ninia hakarak ba ema no rai. Neʼe sei sai loos duni iha loron hitu neʼe nia rohan.
15. Tanbasá Satanás hanoin katak nia bele hanetik Jeová atu kumpre Jeová nia hakarak?
15 Bainhira Adão no Eva kontra, sira sai sala-naʼin, no hatutan sala no mate ba sira-nia bei-oan hotu. (Rom 5:12) Tan neʼe, haree hanesan Satanás hanetik Maromak nia hakarak kona-ba halo mundu nakonu ho ema neʼebé perfeitu no laran-metin, no hanetik tiha Jeová atu hatete “Ómega”. Karik Satanás hanoin katak Jeová la iha opsaun barak atu kumpre ninia hakarak. Opsaun ida mak atu halakon tiha Adão no Eva, no kria kaben-naʼin foun atu bele kumpre ninia hakarak ba ema. Maibé se Maromak halo ida-neʼe, Diabu bele duun katak Maromak bosok-teen. Tanbasá? Tanba iha Génesis 1:28, Jeová fó-hatene ba Adão no Eva katak sira-nia bei-oan mak sei halo nakonu mundu.
16. Tanbasá Satanás hanoin katak nia bele duun Jeová sei labele kumpre Jeová nia hakarak?
16 Karik Satanás hanoin Maromak iha opsaun saida tan? Karik Satanás hanoin katak Jeová sei husik Adão no Eva atu iha oan no sai barak maibé sira nunka bele sai perfeitu. (Ecle 7:20; Rom 3:23) Se Adão no Eva nia oan no bei-oan sira labele sai perfeitu, Diabu bele duun katak Jeová labele kumpre ninia hakarak, no mundu Paraízu labele nakonu ho ema neʼebé perfeitu no laran-metin.
17. Oinsá mak Jeová rezolve buat neʼebé akontese iha jardín Eden, no rezultadu ikus mak saida? (Haree mós dezeñu.)
17 Satanás nunka imajina buat neʼebé Jeová sei halo. Jeová iha solusaun neʼebé diʼak liu atu kumpre ninia hakarak maski Satanás, Adão no Eva kontra. (Sal 92:5) Jeová husik Adão no Eva atu iha oan, no liuhusi dalan neʼe mak Jeová nia liafuan sai loos, no hatudu katak nia laʼós bosok-teen. Jeová hatudu katak se nia hakarak halo buat ruma, la iha ida mak bele hapara. Nia kontinua kumpre ninia hakarak hodi fó “bei-oan” ida neʼebé sei salva Adão no Eva nia bei-oan sira neʼebé laran-metin. (Gén 3:15; 22:18) Bei-oan neʼe sei fó ninia moris nuʼudar sakrifísiu atu salva ema. Karik Satanás nunka imajina kona-ba solusaun neʼe. Tanbasá? Tanba arranju neʼe bazeia ba domin neʼebé la hanoin an deʼit. (Mt 20:28; João 3:16) Satanás la iha hahalok neʼe, nia hanoin an deʼit. Arranju neʼe sei kumpre saida? Iha Kristu nia Ukun ba Tinan Rihun Ida nia rohan, Adão no Eva nia bei-oan sira neʼebé perfeitu no laran-metin sei moris iha mundu paraízu, hanesan buat neʼebé Jeová hakarak. Iha tempu neʼebá, Jeová sei hatete “Ómega”.
OINSÁ ATU HAMETIN FIAR BA JEOVÁ NIA PROMESA KONA-BA PARAÍZU
18. Ita iha razaun tolu saida atu fiar ba Maromak nia promesa? (Haree mós kaixa “Razaun tolu atu fiar ba Jeová nia promesa”.)
18 Iha lisaun neʼe, ita aprende ona tanbasá ita bele fiar katak mundu sei sai Paraízu. Saida mak ita bele hatete ba ema seluk neʼebé duvida kona-ba promesa neʼe? Primeiru, Jeová rasik mak promete. Livru Apokalipse hatete: “Ida neʼebé tuur iha kadunan dehan: ‘Haree bá! Haʼu halo buat hotu sai foun.’” Nia iha matenek, kbiit, no hakarak atu halo ninia promesa sai loos. Segundu, Jeová hatene katak buat neʼebé nia promete sei akontese duni. Tan neʼe nia hatete: “Liafuan sira-neʼe mak loos no ema bele tau fiar. . . . Liafuan sira-neʼe sai loos ona!” Terseiru, bainhira Jeová hahú halo buat ruma, nia sei halo ida-neʼe toʼo hotu no susesu. Tan neʼe nia hatete: “Haʼu mak Alfa no Ómega.” Jeová sei prova katak Satanás mak bosok-teen no labele hapara Jeová nia hakarak.
19. Bainhira ema duvida kona-ba Maromak nia promesa kona-ba Paraízu, Ita bele halo saida?
19 Hanoin-hetan, bainhira Ita haklaken ba ema kona-ba oinsá Jeová garantia katak ninia promesa sei sai loos, Ita mós hametin Ita rasik nia fiar. Tan neʼe, kuandu Ita lee promesa furak kona-ba Paraízu neʼebé temi iha Apokalipse 21:4 no ema ruma dehan: “Neʼe sei nunka sai loos”, saida mak Ita bele halo? Ita bele lee no esplika versíkulu 5 no 6, no hatudu oinsá Jeová rasik garantia ninia promesa neʼe.—Isa 65:16.
KNANANUK 145 Maromak promete Paraízu
a Ita sei aprende oinsá Jeová fó garantia katak ninia promesa kona-ba Paraízu sei sai loos. Bainhira ita koʼalia ba ema seluk kona-ba garantia neʼe, neʼe sei hametin ita-nia fiar ba Jeová nia promesa sira.