Talily Soa Nisorate i Lioka

6 Tamy ze andro sabata indraike zay, le nandalo tamy ze horake zay ty Jesosy naho i mpiana’e rey. Nandrofotse voam-bare erike avao iareo nandehay. Nikosehe iareo tamy ty tagna iareo i voam-barey, le nihane iareo. 2 Naho fa nahatrea izay o Fariseò, le nirehake tie: “Nagnino nareo ro manao ty raha tsy azo atao amy ty andro Sabata?” 3 Faie hoe ty navale i Jesosy iareo: “Mbe tsy nivakie’areo tamy i Soratse Masigney ao vao ty raha natao i Davida naho i lahilahy niarake tama’e rey naho fa nikeré iareo? 4 Nizilike tamy i anjomban’Agnaharey ao reke tamy izay, le nangatake tamy i mofo masigney, le nimea i mpisorombeỳ. Nihinagne ty Davida, le nimea’e ka i lahilahy niarake tama’e rey, ie amy izao tsy misy ndaty mahazo mihinagne amy i mofo masigney naho tsy o mpisorogneo avao. 5 Le hoe reke tamy iareo: “I Ana o ndatỳ ty Tompo o Sabatao.”

6 Ie tamy ty sabata nagnarake, le nizilike tamy ze sinagoga raike zay ao ty Jesosy sady nampianatse tao. Nisy lahilahy raike nimate ty tagna’e havana zay ty tao. 7 Le nambena o mpampianatse lalànao naho o Fariseò ty Jesosy, mba hahatreavagne tie hagnasitragne amy ty andro Sabata vao reke sa tsy hagnasitragne, amy izay iareo hahatrea raha hanoagne kitomboke aze. 8 Faie nihay i Jesosy ze eretsere iareo zay, le hoe reke tamy i lahilahy mate tagnagney: “Mitsangana agnivo etia rehe.” Le nitsangagne i lahilahỳ sady niheo agnivo eo. 9 Hoe ty Jesosy naho fa niavy eo: “Magnontane anareo raho, ty aia ty azo atao amy ty andro Sabata, ty manao soa sa ty manao raty? Ty mamonje aigne sa ty mamono?” 10 Naho fa boake nagnente iareo iaby ty Jesosy, le hoe reke tamy i lahilahy mate tagnagney: “Ahitsio i tagna’oy.” Naho fa nahitsy i lahilahỳ i tagna’ey, le nisitragne. 11 Faie niboseke o Fariseò naho o mpampianatse lalànao, le nandeha sady nifampirehake ty raha hatao iareo amy i Jesosy.

12 Tie indraike zay, le nandeha am-bohitse agne ty Jesosy mba hivavake. Nivavake taman’Agnahare avao reke tagnate i halegney. 13 Ie nimaraindray, le nitokave’e i mpiana’e rey, le nijobogne 12 lahy tamy iareo reke. Nitokave’e tihoe apostoly o 12 lahy rehoe. 14 Intoa ty agnara iareo: I Simona i tokavegne tihoe Peteray, i Andrea rahalahi’e, i Jakoba, i Jaona, i Filipo, i Bartolomeo, 15 i Matio, i Tomasy, i Jakoba ana i Alfeo, i Simona i tokavegne tihoe mafana fo oy, 16 i Jodasy ana i Jakoba naho i Jodasy Iskariota i nanjare mpamadikey.

17 Naho fa nizotso niarake tamy iareo boake am-bohitse ey ty Jesosy, le nitsangagne tamy ze tane mira zay eo. Nimaro ty mpiana’e teo naho ty ndaty boake a Jodia, a Jerosalema vaho boake amy ty faritse i Tiro naho i Sidona niavy eo mba hitsanogne aze naho hositragne’e tamy ty arete’e. 18 Ndra ty ndaty nisy demonia ka aza nisitragne’e. 19 Le te ho nitsapa aze iaby i vahoakey, satria nisy hery nagnasitragne iareo ty boake ama’e naho fa nitsapa aze iareo.

20 Le nagnente i mpiana’e rey ty Jesosy sady nirehake tie:

“Sambatse nareo mahantrao, satria anareo i Fanjakà i lagnitseỳ.

21 “Sambatse nareo kerégneo, satria hovontsignegne.

“Sambatse nareo mitagnio, satria hihehe.

22 “Sambatse nareo naho heje o ndatio, avibỳ iareo, naho sarà iareo tie nanao raha raty vaho haratie iareo* noho ty amy i Ana o ndatỳ. 23 Mifalea naho mitsinjaha amy ze andro zay, satria homean’Agnahare valesoa lahibey nareo. Fa hoe izay avao ka ty raha natao ty raza iareo tamo o mpaminany talohao.

24 “Faie loza ty hanjò anareo mpagnarivò, satria fa niazo’areo iaby ze raha soa toko’e homeagne anareo.

25 “Loza ty hanjò anareo vontsigne amy izaò satria hokerégne nareo.

“Loza ty hanjò anareo miheheo, satria hisaogne naho hitagny nareo.

26 “Loza ty hanjò anareo tsiririe o ndatiò, satria izay ty raha natao ty raza iareo tamo o mpaminany sandokeo.

27 “Faie izao ty raha rehafeko ama’areo mitsanogne ahio: Teavo’areo avao ty fahavalo’areo, le manoa raha soa hoahy ze malaigne anareo. 28 Isalalao raha soa ze magnozogne anareo, le mivavaha ka hoahy ze magnaratiraty anareo. 29 Naho misy mitakapike i fifi’o raikey, le atoliho agne ka i raikey. 30 Naho misy mangalake i akanjo’o ivela’ey, le omeo agne ka i akanjo’o agnate’ey. Omeo ze mangatake ama’o. Naho misy ndaty ka mangalake ty fanagna’o, le ko takegne sasa.

31 “Izao ka, ze raha tea’areo hatao o ndatio ama’areo ro anò amy iareo.

32 “Naho ze ndaty tea anareo avao ro tea’areo, le tsy hisy valesoa hoazo’areo. Ty anto’e, ndra o mpanotao tea ze ndaty tea aze. 33 Naho ze ndaty manao soa ama’areo avao ka ro anoa’areo soa, le tsy hisy valesoa hoazo’areo. Ty anto’e, ndra o mpanotao manao hoe izay. 34 Naho ze ndaty atokisa’areo fa hagnavake ty vola’areo avao ro ampitrosae’areo, le tsy hisy valesoa hoazo’areo. Ty anto’e, ndra o mpanotao mitama tie, mbe havaha ty nama’e ty vola nampitrosae’e aze. 35 Fa inareo, teavo’areo avao ty fahavalo’areo, le manoa ty soa, sady mampindrama, faie ko mitama tie hahazo ndra inogn’ino. Naho manao izay nareo, le hahazo valesoa lahibey sady hanjare ho ana i Fara’e Amboney, satria reke soa fagnahy amy ze tsy misaotse aze naho amy ze raty fagnahy. 36 Mikezaha hamindra fo lognandro, manahake i Rae’areo mpamindra fo oy.

37 “Ankoatse izay ka, le ko mitsaratsara sasa nareo mba tsy hotsaraegne. Ko magnameloke ty hafa nareo, amy izay tsy homelohegne. Mamelà ty fahadisoa ty hafa, amy izay havela ka ty fahadisoa’areo. 38 Mikezaha hotea magnomey, amy izay homea o ndatio ka nareo. Fagnaragnagne maregne soa naho tinindry sady mbe feno miligiligy ka ro haily iareo agnontrogna’areo eo, satria arakarake ty fagnaragnagne ampiasae’areo ro hagnaragna iareo anareo.”

39 Nirehake fagnoharagne tamy iareo ka reke. Hoe reke: “Tsy misy ndaty goa ho afake hitarike ndaty goa, satria naho izay, le sambe hotonta an-davake agne iareo. 40 Ty mpianatse ka le tsy ambone noho i mpampianatse azey. Faie ze ndaty nahazo fampiofagnagne soa, le hanjare hanahake i mpampianatse azey. 41 Nagnino areke rehe ro magnente i akata kidikidy amy ty maso i rahalahi’oy, ie amy izao misy hatae bey miebagne ty amy i maso’oy ey? 42 Akore moa ty ahafaha’o mirehake amy i rahalahi’oy tie: ‘Etia hafahako i akata amy i maso’oy eỳ rahalahy’, ie amy izao tsy trea’o tie misy hatae bey miebagne ty amy i maso’oy? Ry mpanao soa miatreke! Afaho hey i hatae bey amy i maso’oỳ, amy izay hotrea’o soa ty fomba hagnafahagne i akata kidikidy amy i maso i rahalahi’oy eỳ.

43 “Tsy misy hatae soa mamoa voa raty, le tsy misy hatae raty mamoa voa soa. 44 Tsy misy ndaty ohatse hangalake fihamy* amo o raha mitiry misy fatipatikeo ey, ndra hangalake voaloboke amo o raha mitiry misy fatipatikeo ey. 45 Ty ndaty soa, le magnakatse ty raha soa tamirie’e am-po’e ao. Fa ty ndaty raty, le magnakatse ty raha raty tamirie’e am-po’e ao. Ty anto’e, ze raha mameno ty fo o ndatio ro rehafe’e.

46 “Nagnino areke nareo ro mitoka ahike tihoe: ‘O Tompo, Tompo’, faie tsy orihe’areo ty raha rehafeko? 47 Ze magnantogne ahy naho mitsanogne ty rehako sady mampihatse aze, 48 le hanahake ty lahilahy raike te hagnoregne tragno, faie nihaly lavake hey. Ie reke nahatrea lamilamy vaho izay nagnoregne ty foto’e. Ndra hisy ranobey areke, ndra ranovohitse, le tsy horava o tragno iohoe, satria mafe soa ty foto’e. 49 Fa ze mitsanogne ty rehako faie tsy mampihatse aze, le hanahake ty lahilahy raike te hagnoregne tragno, faie tsy nihaly fototse fa le avy le nagnoregne aze ambone faseke ey avao. Hihomake areke o tragno iohoe naho fa misy ranovohitse, sady le tena horava tanterake.”