Asa o Apostolio
25 Telo andro tafara ty niavia i Festosy tamy i faritaney eo naho ty nandrambesa’e fahefagne, le niala ta Kaisaria agne reke sady nionjogne mba Jerosalema mbeo. 2 Nirehake raha mba hanoheragne i Paoly tama’e o lahibey ty mpisorogneo naho ty lohandoha’e amo o Jiosio. Nihalale tamy i Festosy areke iareo 3 mba hagneke i fangataha iareoy, le handefa i Paoly ho a Jerosalema agne. Iareo amy iò fa nifagnarake tie hietake, le hamono aze naho fa an-dalagney reke. 4 Faie namale ty Festosy tie, hotanagne a Kaisaria agne avao hey ty Paoly sady toe tsy ho ela ka reke le hiheregne agne. 5 Hoe reke: “Afake mizotso miarake amako mba Kaisaria mbeo o lahibei’areò, le hirehake ty raha raty natao’e naho toe nisy vata’e zay.”
6 Nijanogne tamy iareo tagne tagnate ty valo andro ndra folo andro teo ho eo reke, le avy eo nandeha nizotso mba Kaisaria mbeo. Ie nihamaray igne, le nitoboke tamy i seza fitsaragney eo reke sady nampangalae’e ty Paoly. 7 Naho fa nizilike ty Paoly, le nitsangagne nagnodidigne aze o Jiosy nizotso boake a Jerosalema agneo. Maro ty raha raty nirehafe iareo mba hanoagne kitomboke i Paoly, ie amy izao raha tsy moramora iaby, faie tsy nivita iareo ty nagnaporofo aze.
8 Faie izao ty nirehafe i Paoly naho fa niaro tegna reke: “Tsy nanohetse ty Lalàna o Jiosio raho sady tsy nanota tamy i tempolỳ ro tsy nanohetse i Kaisara.” 9 Faie nipay hasoa tamo o Jiosio ty Festosy, le hoe ty navale’e i Paoly: “Tea’o vao ty handeha a Jerosalema agne, le hotsaraegne agnatrehako eo miomba ze raha zay?” 10 Faie hoe ty Paoly: “Mitsangagne aloha i toeragne fitsara i Kaisaray etoa raho satria eto ty toko’e hitsaragne ahy. Tsy nanao raha raty tamo o Jiosio raho sady hai’o soa zay. 11 Fa naho toe nanao raha raty toko’e hamonoagne ahy vata’e raho, le ekeko ty hamonoagne ahy. Fa naho tsy misy maregne i raha rehafe o lahilahy rehoe tie nao nataoko rey, le tsy misy manan-jo hanolotse ahy mba hampifalefaleagne iareo avao. Hampiakareko amy i Kaisara agne ty raharaha toy!” 12 Naho fa boake nirehake tamy i kosaie’e rey ty Festosy, le izao ty navale’e: “Nampiakare’o amy i Kaisara agne ty raharaha toy, le ho amy i Kaisara agne vata’e rehe.”
13 Ie andro tsiampeampe tafara izay, le niavy ta Kaisaria agne ty Agripa Mpanjaka naho i Berenika mba hitilike i Festosy arake ty fomba fifagnaja iareo. 14 Satria iareo nijanogne tagne tagnate ty andro maromaro, le nirehafe i Festosy tamy i mpanjakay ty miomba i Paolỳ. Hoe reke:
“Misy lahilahy gadra nenga i Feliksa zay ty eto. 15 Tamy iraho ta Jerosalema agney, le nirehake amako o lahibey ty mpisorogneo naho ty androanavy o Jiosio tie nao nanao raha raty zao reke. Nangatake amako iareo tie toko’e homelohegne reke. 16 Faie nivaleako iareo tie tsy fomba o Romanao ty manolotse i ndaty haratiratie iareoy amy iareo mba hampifalefaleagne iareo avao. Mila ampifagnatrefegne hey iareo, le engagne hiaro tegna ka i ndaty rehafegne tie nanao raha ratỳ. 17 Naho fa niavy eto areke iareo, le tsy nangatake andro raho fa tamy ty hamaray igne avao, le avy le nitoboke tamy i seza fitsaragney eo raho sady nampangalaeko ka i lahilahỳ. 18 Nitsangagne i ndaty nitory azey, faie tsy ty raha raty nieretsereteko ho natao’e ty raha nirehafe iareo. 19 Kay toe miomba ty fivavaha iareo o raha ialia iareo hevetseo naho ty miomba ze o lahilahy atao tihoe Jesosy fa nimate faie izizoa i Paoly tie fa nivelogne zao. 20 Tsy nihaiko ty hatao mba handaminagne i aly hevetsey, le nagnonteneako reke tie, tea’o vao ty ho a Jerosalema agne, le hotsaraegne agne ty miomba ze raharaha zay? 21 Faie nangatake ty Paoly mba hotanagne am-pirizò ao avao hey, satria i Manan-kaja Fara’e Amboney ty tea’e hanapa-kevetse miomba i raharahay. Le nagnomey baiko raho mba hitanagne aze am-pirizò ao avao hey amparake ty andefasako aze amy i Kaisara agne.”
22 Le hoe ty Agripa tamy i Festosy: “Mba te haharey ze lahilahy zay raho.” Le hoe ty Festosy: “Haharey aze rehe naho maray.” 23 Ie nihamaray igne, le niavy ty Agripa naho i Berenika sady natoro iareo tie tena manam-boninahitse lahibey iareo. Nizilike tamy i tragno fitsaragney ao iareo naho o mpitari-tafikeo vaho ty ndaty ambone tamy i tanàgney eo. Naho fa nagnomey baiko ty Festosy, le nampidiregne ty Paoly. 24 Hoe ty Festosy: “O Agripa Mpanjaka naho inareo iaby magnatreke eto miarake ama’aio: O lahilahy trea’areo iohoe, le nangatahe ty Jiosy a Jerosalema agne naho ty Jiosy etoagne amako mba hovonoegne. Nikorakorake iareo tie toko’e hovonoegne reke. 25 Faie nitreako tie tsy nanao raha toko’e hamonoagne aze reke. Faie naho fa nampiakare o lahilahy iohoe amy i Manan-kaja Fara’e Amboney agne ze raharaha zay, le nanapa-kevetse raho fa handefa aze agne. 26 Faie tsy fantako ka ty raha hosorateko miomba aze amy i Tompokoy agne. Nenteko agnatreha’areo eto reke, lohotsie fa ihe Agripa Mpanjaka, amy izay raho mba misy raha hosorateko naho fa vita ty famotopotoragne aze. 27 Ty anto’e, hoe tsy mete ty mandefa gadra, ie amy izao tsy rehafegne ty raha raty natao’e.”