Talily Soa Nisorate i Lioka
11 Nivavake tamy ze toeragne raike zay ty Jesosy tie indraike zay. Naho fa boake nivavake reke, le hoe ty raike tamy i mpiana’e rey tama’e: “O Tompo, ampianaro mivavake zahay manahake ty nampianara i Jaona o mpiana’eo.”
2 Hoe areke ty Jesosy tamy iareo: “Naho fa mivavake nareo, le mirehafa hoe izao: ‘O Baba, hohamasignegne abey i tahina’oy. Lonike abey mba ho avy i Fanjakà’oy. 3 Omeo anay isan’andro ze hanegne tsahatse anay. 4 Mamelà ty fahota’ay, satria izahay ka mamela ty fahadisoa ty ndaty manao raha tsy mete ama’ay. Ko minday anay amy ty tsapa hevetse.’”
5 Hoe ka reke tamy iareo: “Andao hatao tihoe managne ragnetse ty raike ama’areo. Ie tamy i vakimira halegne indraike zay, le nandeha ama’e agne rehe sady nanao tihoe: ‘O ragnetse, mba meo mofo telo hey raho, 6 fa misy ragneko boake lavitse zay niavy amako ao, faie tsy managne raha haroso ho aze raho.’ 7 Faie tsy niakatse i ragne’oy fa namale azo tihoe: ‘Ko tsiboregne raho. Fa mihily i lala’aỳ, le i anako kedekedey ka fa miroro miarake amako am-pandreagne etoagne. Tsy afake mifoha areke raho mba hagnomey azo ze raha paliae’o zay.’ 8 Rehafeko ama’areo, fa ndra tie mpiragnetse aza nareo, le tsy ho nifoha reke mba hagnomey azo i raha paliae’oy. Faie noho irehe nisisike avaoy, le hifoha reke mba hagnomey azo i raha paliae’oy. 9 Izao areke ty raha rehafeko ama’areo: Mangataha avao, le homeagne nareo. Mipaliava avao, le hahatrea nareo. Mampinkonkogna avao, le hosokafegne nareo. 10 Satria ze mangatake ro mahazo, le ze mipay ro hahatrea, le ze mampinkonkogne ka ro hosokafegne. 11 Ia ty rae hagnomey meregne ty ana’e naho angataha’e fiagne? 12 Ndra naho angataha ty ana’e atoly, le hagnomey aze kalengo?* 13 Inareo aza ndra tie ndaty raty fagnahy mahay magnomey raha soa ty ana’areo, somandrake fa i Rae’areo an-dagnitse agney! Azo antoke fa hagnomey fagnahy masigne hoahy ze mangatake ama’e reke.”
14 Tafara izay, le nandroake demonia mahamoagne tamy ty lahilahy raike ty Jesosy. Naho fa niakatse boake tamy i lahilahỳ ao i demoniay, le nanjare nahay nirehake reke. Nigaga i vahoakey iaby. 15 Faie hoe ty ila’e tamy iareo: “Fahefagne boake amy i Belzeboba, i lahibey o demoniaoy o ahavita’e mandroake demoniao.” 16 Fa ty ila’e nangatake famantaragne boake an-dagnitse agne mba hitsapagne aze. 17 Nihai’e ze eretsere iareo zay, le hoe reke tamy iareo: “Horava ze fanjakagne mialy an-tragno. Hisaratsarake ka ze keleiagne mialy an-tragno. 18 Hoe izay ka, fa naho i Satana avao ro mialy amy ty vata’e, le haharetse vao ty fanjakà’e? Mirehake izay raho, satria hoe nareo tie, fahefagne boake amy i Belzeboba ty androahako demonia. 19 Naho boake amy i Belzeboba ty fahefagne ahafahako mandroake demonia, le boake amy ia ty fahefagne ahafaha o ana’areò mandroake demonia? O ana’areò avao areke ro hitsara anareo amy i reha’areo teoy. 20 Fa naho amy ty alala ty rambopitàn’Andrianagnahare ty androahako demonia, le fa niavy tama’areo teo vata’e i Fanjakàn’Andrianagnaharey, faie tsy nifanta’areo. 21 Naho misy lahilahy matanjake sady ampe fitaovagne fialiagne miambegne ty tragno’e, le ho voaaro ze fanagnagne amy i tragno’ey ao. 22 Faie naho misy lahilahy matanjake ambone’e manafike aze sady mandrese aze, le halae o lahilahy iohoe ama’e iaby i fitaovam-pialiagne nitokisa’e rey, sady hozarae’e amy ty hafa ka ze raha nalae’e ama’e. 23 Ze tsy manohagne ahy, le manohetse ahy, le ze tsy mamory miarake amako, le mampiparitake.
24 “Naho misy demonia miala amy ty ndaty raike, le mandeha am-patrambey agne reke mba hipay toeragne hitofatofagne. Ie reke tsy nahatrea toeragne, le izao ty nirehafe’e: ‘Hiheregne amy i tragno nialàkoy agne raho.’ 25 Ie reke niavy ao, le aheo’e naho malio soa sady mihengo soa i tragnoy. 26 Le mandeha reke mipay demonia fito hafa mbe raty ambone’e, le mizilike amy i tragnoy ao iareo sady lelia’e mijanogne ao. Mbe ho raty ambone i talohay areke ty ho fiaigna ze ndaty zay.”
27 Tamy i Jesosy mbe nirehake ze raha zaỳ, le nisy ampela tamy i vahoakey eo nirehake mafe tihoe: “Sambatse ty troke nisy azo naho ty nono ninonoa’o!” 28 Faie hoe ty Jesosy: “Aha’a, tsy izay. Ze mitsanogne ty saontsin’Agnahare sady magnorike izay ro sambatse!”
29 Naho fa nihamaro nihamaro avao ty ndaty tama’e teo, le hoe reke: “Raty fagnahy ty taranake toy! Lava mipay famantaragne avao iareo, faie tsy misy famantaragne homeagne iareo naho tsy i famantaragne tamy i Jona igne avao. 30 I Jona zao nanjare famantaragne hoahy o Ninivitao, le hanahake izay ka i Ana o ndatỳ amy ty taranake toy. 31 Amy i Andro Fitsaragney, le hovelomegne amy ty mate miarake amy ty taranake toy i mpanjakavave i atimoy,* le hanoro amy ty taranake toy tie diso iareo. Ty anto’e, lavitse ty nisy aze faie le niavy amy i Solomona agne reke mba hitsanogne ty fahendrea’e. Faie misy lahibey ambone i Solomona ty eto. 32 Amy i Andro Fitsaragney ka, le hovelomegne amy ty mate miarake amy ty taranake toy ty ndaty ta Ninive agne, le hanoro amy ty taranake toy tie diso iareo. Ty anto’e, nibebake iareo naho fa nitory tamy iareo ty Jona. Faie misy lahibey ambone i Jona ty eto. 33 Naho fa mamelogne jiro ty ndaty raike, le tsy ahaja’e i jiroy ndra lombofa’e, fa atao’e amy i fisiagne azey eo, amy izay mahatrea i hazavagney ze ndaty mizilike amy i efetsey ao. 34 O masò ty jiro o vatagneo. Naho mifantoke amy ty raha raike avao ty maso’o, le hazava ty vata’o iaby. Fa naho mialogne ty maso’o, le haiegne ty vata’o iaby. 35 Mitaoa avao areke mba tsy haiegne i hazavagne ama’o aoy. 36 Naho mazava tsy misy maienkiegne ty vata’o, le hazava ie iaby, manahake ty agnilova o jirò azo amy i hazava’ey.”
37 Naho fa boake nirehake izay ty Jesosy, le nisy Fariseo raike zay nanasa aze mba hihinagne ama’e agne. Nandeha tan-tragno i Fariseoy agne areke reke, le nandre nitso-kiho tamy i latabatsey eo mba hihinagne. 38 Faie niendrake i Fariseoy naho fa nahatrea i Jesosy tsy mba nanasa tagnagne fa le avy le nihinagne avaoy. 39 Faie hoe ty Tompo tama’e: “Inareo Fariseò, le liove’areo ty ivela o kopeo naho o fingao, faie ty agnate’areo ao feno hatea mena naho haraty fagnahy. 40 Ry tsy misaigne! Tsy i namboatse ivela’ey avao ka vao ty namboatse i agnate’e aoy? 41 Naho fa miferenaigne ndaty sady magnomey raha aze nareo, le anò’areo avy am-po zay, amy izay halio nareo. 42 Faie hoazon-doza nareo Fariseò, satria magnomey ty ampahafolo o solilao naho o peganonio* vaho ty karazan’agnagne hafa nareo, faie tsy darea’areo ty rare’e naho ty hatea an’Agnahare. Maregne fa tsy maintsy omeigne ty ampahafolo i raha rey, faie tsy atao ambanen-draha ka o raha hafa rehoe. 43 Hoazon-doza nareo Fariseò, satria tea’areo ty mitoboke aloha ey naho fa amo o sinagogao agne naho ty ho salamaegne am-pagnajagne naho fa a bezara ey. 44 Hoazon-doza ka nareo satria manahake o kibory tsy misy famantaragneo, le liàlià o ndatio avao satria tsy hay iareo.”
45 Le nisy raike tamy iareo nahay Lalànao namale i Jesosy tihoe: “O Mpagnanatse, magnafa-baraka anay ka anio ze o reha’o zao.” 46 Le hoe ty Jesosy tama’e: “Hoazon-doza nareo mahay Lalànao, satria ampindese’areo entagne sarotse indesegne o ndatio, ie amy izao ndra ty rambon-tagna’areo raike tsy mitsapa aze.
47 “Hoazon-doza nareo satria amboare’areo ty kibory o mpaminanio, ie amy izao ty raza’areo ty namono aze. 48 Inareo avao areke ty vavolombelogne amy ty raha natao ty raza’areo sady tohagna’areo iareo. Ty anto’e, iareo namono i mpaminany rey, le inareo ty mamboatse ty kibori’e. 49 Izay ty mahavy i Andrianagnahare fara izay ty mahilalay hisaontsy hoe izao: ‘Hagnirake mpaminany naho apostoly ho amy iareo agne raho, le ty ila’e hovonoe iareo naho henjehe iareo. 50 Izay ty anto’e mahavy ty taranake toy ho tompon’andraikitse amy ty lio ze mpaminany iaby naté iareo, nanomboke tamy ty nagnoregnagne ty tontolo toy. 51 Nanomboke amy ty lio i Abela hatrake amy ty lio i Zakaria, i nivonoegne tam-pagnivoa i alitaray eo naho tamy i tempolỳ eoy.’ Rehafeko ama’areo, fa ho tompon’andraikitse amy ty lio iareo ty taranake toy.
52 “Hoazon-doza nareo mahay Lalànao satria nalae’areo ty lakilé i fahalalagney. Tsy mizilike nareo, faie ze te hizilike kezahe’areo sakanagne.”
53 Naho fa niala ty eo reke, le nifandrombogna o mpampianatse lalànao naho o Fariseò sady tsy nadò iareo fa nagnontenea iareo raha maro, 54 amy izay iareo mahatrea raha hamandrihagne aze amy ty raha rehafe’e.