Hoahy o Galatianao
3 O ry Galatiana tsy misaigne! Ia o nitaogne anareo hanao ratio? Tsy fa nihazavaegne tama’areo mazava soa vao ty anto’e nipehagne i Jesosy Kristy tamy i boda-kataey eo? 2 Intoy misy raha raike teako hagnonteneagne anareo: Noho ty asa i lalànay vao ty nahavy anareo nahazo i fagnahỳ, sa noho inareo nino ty raha nirei’areo? 3 Tena tsy misaigne vata’e vao nareo? Mba fa nanomboke nandeha arake ty fagnahy avao nareo, faie amy izao nareo ndra mandeha arake ty nofotse tanterake. 4 Tsisy dika’e vao ty niareta’areo haoreagne maro? Tsy mino raho tie tsy misy dika’e vata’e zay. 5 I nagnomey anareo fagnahy naho nanao asa mahagaga tama’areo eoy vao, nanao izay noho ty asa i lalànay, sa noho inareo nino ty raha nirei’areo? 6 I Abrahama zao “naneho finoagne i Jehovah, le natao’e ho agnisa ty ndaty maregne.”
7 Hai’areo soa, fa ze manam-pinoagne ro ana i Abrahama. 8 Fa ela bey ty Soratse Masigne ro nanoro tie, hambaran’Andrianagnahare ho maregne o ndaty boake amy ty firenena hafao noho ty finoa’e. Nambara’e i Abrahama mialoha o talily soa iohoe, tamy ireke nisaontsy tihoey tie: “Amy ty alala’o ty hitahiagne ty firenena iaby.” 9 Ze manam-pinoagne areke, le hotahiegne miarake amy i Abrahama, i nanam-pinoagney.
10 Voaozogne ze miantehetse amy ty asa i lalànay, satria voasoratse tie: “Voaozogne ze tsy magnorike lognandro ze raha voasoratse amy ty horognam-boke i Lalànay ao.” 11 Ankoatse izay, le trea mazava tie, tsy misy ndaty ambara ho maregne agnatrehan’Agnahare eo noho i lalànay, satria “ty ndaty maregne, le hovelogne noho ty finoa’e.” 12 Tsy miankigne amy ty finoagne i Lalànay. Fa ty rehafe’e le tihoe, “ze ndaty mankatò irey, le hovelogne amy ty alala irey.” 13 Nivily antikagne ty Kristy mba hagnafahagne antikagne amy ty ozo i Lalànay, le ireke ka ro nanjare voaozogne mba hisolo antika, satria voasoratse tie: “Voaozogne ze ndaty ahantogne amy ty boda-katae.” 14 Niseho zay, amy izay amy ty alala i Kristy Jesosy ro hahazoa o firenenao i fitahiagne nampitamaegne i Abrahamay. Amy izay ka tika hahazo i fagnahy nampitamaegney, noho itika mino.
15 Ry rahalahy, hirehake fagnoharagne fampiasa o ndatio raho: Naho vaho manan-kery ty fifagnekeagne raike, ndra tie ndaty avao aza ty manao aze, le tsy misy ndaty afake mamoagne aze, ndra manovogne aze. 16 Nirehafegne tamy i Abrahama naho tamy ty tarana’e i fampitamagney. Tsy mirehake reke tie, “hoahy o tarana’o reo”, le hoe manondro ndaty maro, fa manondro ndaty tokagne le tihoe, “hoahy i tarana’oy.” Tsy ia zay fa i Kristy. 17 Izao ka ty rehafeko: I Lalàna nimeigne 430 taogne tafara tatoỳ, le tsy namoagne i fifagnekeagne nataon’Agnahare taloha izaỳ, sady tsy mamoagne i fampitamagney ka. 18 Ty anto’e, naho niazo boake amy i lalànay i lovay, le tsy nisy nilagne aze i fampitamagney. Faie tamy ty alala i fampitamagney ty nagnomezan’Agnahare i Abrahama i lovay, taman-kasoa fagnahy.
19 Ino areke ty anto’e nagnomeagne i Lalànay? Nimeigne i Lalànay mba hampibaribary o fandikan-dalànao, amparake ty iavia i taranake nanoagne i fampitamagneỳ. Tamy ty alala ty anjely ty nagnomeagne i Lalànay tam-pelantagna ty mpagnelagnelagne raike eo. 20 Tsy misy mpagnelagnelagne naho ndaty raike avao ro voakasike. Faie raike avao ty Andrianagnahare. 21 Mifanohetse vao areke i Lalànay naho i fampitaman’Agnahare rey? Sagnatria zay! Naho nagnomey fiaignagne i lalànay, le i lalànay ro mahavy o ndatio ho maregne. 22 Faie rehafe ty Soratse Masigne, fa natao ambane fahefà i otay ze kila raha, amy izay ze maneho finoagne ro hahazo i fampitamagne boake amy ty finoagne i Jesosy Kristỳ.
23 Faie tamy i finoagney mbe tsy niavỳ, le niambegne antikagne i lalànay sady nifehe antikagne, amparake ty nandignisantikagne ty nampibaribariagne i finoagney. 24 Nanjare mpiteza antikagne areke i Lalànay, mba hitarike antikagne amy i Kristy mbeo, amy izay tika hambara ho maregne noho ty finoagne. 25 Faie fa niavy i finoagney amy izao, le tsy ambane fahefà i mpitezay sasa tikagne.
26 Naho ty maregne, le anan’Andrianagnahare nareo iaby, satria nareo mino i Kristy Jesosy. 27 Ty anto’e, inareo iaby natao badisa tamy i Kristy aò, le fa miakanjo i Kristy. 28 Tsy misy sasa tihoe Jiosy ndra Grike, ndra mpanompo, ndra ndaty afake, ndra lahilahy, ndra ampela, satria inareo iaby io, le tafaharo amy i Kristy Jesosy ao. 29 Naho ahy i Kristy ka nareo, le tena tarana i Abrahama vata’e sady mpandova naho arake i fampitamagney.