Talily Soa Nisorate i Jaona
3 Nisy lahilahy Fariseo zay, i Nikodemosy ty agnara’e. Agnisa ty mpitondra tamo o Jiosio eo reke. 2 Nandeha tamy i Jesosy agne reke tie indraike halegne zay, le hoe reke tama’e: “O Raby,* hai’ay fa mpagnanatse nirahen’Agnahare vata’e rehe. Ty anto’e, tsy misy ndaty hahavita i fahagagagne natao’o rey naho tsy i Andrianagnahare ro magnampe aze.” 3 Le hoe ty navale i Jesosy aze: “Volagneko ama’o,* fa naho tsy aterake indraike ty ndaty raike, le tsy ho afake hahita i Fanjakàn’Andrianagnaharey.” 4 Le hoe ty Nikodemosy tama’e: “Akore ty hahavy ty ndaty raike fa bey haterake indraike? Mbe afake hiheregne an-tron-drene’e agne indraike vao reke, le haterake indraike?” 5 Hoe ty navale i Jesosy aze: “Volagneko ama’o, fa ze tsy aterake amy ty alala ty rano naho ty fagnahy, le tsy ho afake hizilike amy i Fanjakàn’Andrianagnaharey ao. 6 Ze atera ty nofotse, le nofotse. Fa ze atera ty fagnahy, le fagnahy. 7 Ko atao’o mahagaga azo areke i rehako manao tihoey tie: Tsy maintsy aterake indraike nareo. 8 Mandeha amy ze tea’e hombagne o tiokeo. Rei’o ty feo’e faie tsy fanta’o tie boake aia reke le hombaia. Hoe izay ka ze ndaty atera ty fagnahy.”
9 Le hoe ty navale i Nikodemosy aze: “Le ho mete vao ze raha rezay?” 10 Le hoe ty navale i Jesosy aze: “Mpampianatse o Israelio vao rehe, le tsy mahay o raha rehoe? 11 Volagneko ama’o, fa ze raha hai’ay ro rehafe’ay, le ze raha nitrea’ay ka ro ambara’ay, faie tsy rambese’areo ze raha ambara’ay. 12 Ty raha an-tane etoy aza tsy inoa’areo naho rehafeko ama’areo, le akore ty hinoa’areo naho raha an-dagnitse agne ty rehafeko? 13 Ankoatse izay, le tsy nisy ndaty niakatse an-dagnitse agne naho tsy i nizotso boake agney avao, le i Ana o ndatỳ. 14 Nahanto i Mosesy i meregne tam-patrambey agney. Manahake izay ka fa tsy maintsy hahantogne i Ana o ndatỳ, 15 amy izay hahazo havelogne nainai’e ze mino aze.
16 “Tena tean’Andrianagnahare vata’e ty tontolo toy, le nimea’e i Ana’e bakotokagney, amy izay hahazo i havelogne nainai’ey ze maneho finoagne aze fa tsy hozamagne. 17 Tsy ty hitsara ty tontolo toy ty anto’e nagnirahan’Agnahare i Ana-dahi’ey, fa ty hagnavotse ty tontolo toy amy ty alala’e. 18 Ze maneho finoagne ty agnara’e, le tsy hotsaraegne. Fa ze tsy maneho finoagne aze, le fa vita ty fitsaragne aze satria reke tsy naneho finoagne i Anan’Agnahare bakotokagney. 19 Izao ty foto i fitsaragney: Niavy tamy ty tontolo toy eto i hazavagney faie ndra aleo o ndatio i iegney ta i hazavagney satria raty ty raha atao iareo. 20 Ze zatse manao raha raty, le malaigne i hazavagney sady tsy mbamy i hazavagney mbeo, amy izay tsy mibaribary i raha atao’ey. 21 Fa ze manao ty maregne, le mandeha mbamy i hazavagney mbeo, amy izay hotrea mibaribary tie mifagnarake amy ty zoton’arofon’Andrianagnahare i raha atao’ey.”
22 Tafara izay, le nandeha ambanevolo i Jodia agne ty Jesosy naho i mpiana’e rey. Nijanogne naharetsaretse tagne niarake tamy iareo reke sady nanao badisa ndaty. 23 Fa i Jaona nanao badisa ta Ainona tao satria nisy ranobey ty tao. Marine i Saleima ty misy o toeragne iohoe. Nandeha mbama’e mbeo areke o ndatio mba hatao’e badisa. 24 Mbe tsy nigadraegne ty Jaona tamy izay.
25 Nisy Jiosy raike zay nialy hevetse tamo o mpiana i Jaonao, miomba ty hampalio agnatrehan’Agnahare eo. 26 Nandeha mbamy i Jaona mbeo areke iareo sady nirehake tama’e tie: “O Raby, hai’o i lahilahy niarake ama’o ta moro i Jordana tagney, i nirehafe’o tama’ay ty miomba azey, manao badisa ka reke tie amy izao sady le mangororoke mbama’e mbeo iaby o ndatio.” 27 Le hoe ty navale i Jaona: “Tsy ho nanan-draha ndra raike ty ndaty raike, naho tsy nimeigne aze boake an-dagnitse agne zay. 28 Toe inareo ka ty vavolombelogne tie fa nirehake raho tie: ‘Tsy iraho o Kristio, fa nirahegne hialoha aze avao raho.’ 29 I mpagnengay ty tompo i ampela hengaegney. Faie tena ho fale ty nama i mpagnengay naho fa mitsangagne agnila i mpagnengay eo sady maharey aze mirehake. Tena fale hoe izay ka areke raho. 30 Tsy maintsy hihamaro ty ndaty manonjohy aze fa ty ahy hihegne.”
31 Boake ambone agne reke, le ambone ze kila ndaty iaby. Fa i boake an-tane etoỳ, le mirehake ty raha an-tane etoy satria reke boake an-tane etoy. Fa i boake an-dagnitse agney, le ambone ze kila ndaty iaby. 32 Nambara’e ty raha nitrea’e naho nirei’e faie tsy nisy ndaty nagneke izay. 33 Fa ze nagneke i fagnambara’ey, le nino tamy ty fo’e* tie maregne ty Andrianagnahare. 34 I nirahen’Agnaharey ro mirehake ty saontsin’Agnahare. Naho fa magnomey ty fagnahi’e ty Andrianagnahare, le tsy matity.* 35 Tea i Raentika an-dagnitse agney i Ana-dahi’ey, le nimea’e aze iaby ze kila raha. 36 Ze maneho finoagne i Anakey, le hahazo havelogne nainai’e. Fa ze tsy magnorike ty raha rehafe i Anakey, le tsy hahazo i havelogney fa ho vignetse ama’e avao ty Andrianagnahare.*