Taratasy Voaloha’e Hoahy o Korintianao

8 Naho miomba ty hanegne atolotse hoahy o sampio, le managne fahalalagne miomba izay tikagne iaby. Mampirehareha o fahalalagneo, fa ty hatea mampahery. 2 Naho misy mieretseretse tie mahafanta-draha reke, le mbe tsy mahafantatse aze arake ty toko’e ho ie reke naho ty maregne. 3 Fa naho misy ndaty tea an’Agnahare, le hain’Agnahare ze ndaty zay.

4 Naho miomba ty fihinanagne o hanegne atolotse hoahy o sampio, le haintika fa tsy misy dika’e o sampy amy ty tontolo toy etò, sady raike avao ty tena Andrianagnahare. 5 Fa ndra tie misy aza ty tokavegne tihoe andrianagnahare ndra an-dagnitse agne zay ndra an-tane etoy, arake ty fihevera o ndatio tie, misy “andrianagnahare” maro naho “tompo” maro, 6 le raike avao ty tena Andrianagnahare naho amantika. Tsy ia zay fa i Rae. Boake ama’e ze kila raha sady aze tika. Raike avao ka ty Tompo. Tsy ia zay fa i Jesosy Kristy, le tamy ty alala’e ty nampisy ze kila raha sady tamy ty alala’e ty nahavelogne antika.

7 Faie tsy itika iaby ty mahay izay. Noho ty ila’e nanompo sampy tie taloha, le tsy mete amy ty feo ty fieretsereta iareo ty hihinagne ty raha natolotse hoahy o sampio, satria maloto rey tie amy iareo noho iareo maleme. 8 Tsy mahavy antika hiharine an’Andrianagnahare o hanegneo. Tsy tihoe mateantoke tika naho tsy mihinagne, ndra mahazo tombo’e naho mihinagne. 9 Faie mitaoa tsy mone hanjare raha mamingagne ze maleme ze fahafaha’areo mifily zay. 10 Irehe zao mahay fa tsy misy dika’e o sampio, faie akore naho misy ndaty mbe maleme mahatrea azo mihinagne amy ty tempoly o mpanompo sampio ao? Tsy handrisike aze hihinagne raha natolotse hoahy o sampio vao ty feo ty fieretsereta’e? 11 Naho mihinagne rehe, satria mahafantatse tie tsy misy dika’e o sampio, le manimba ze maleme rehe, ie amy izao nimate hoahy o rahalahi’o iohoe ka ty Kristy. 12 Manota amy i Kristy rehe naho manao izay, satria manota amy i rahalahi’oy sady manimba i feo ty fieretsereta iareo malemey. 13 Tsy hihinagne hena sasa areke raho naho ohatse ze hanegne zay avao ro hanjare raha mamingagne o rahalahikò. Tsy hanao ze raha va’e hahavy o rahalahikò haleme finoagne* raho.