Taratasy Voaloha’e Hoahy o Korintianao
10 Teako hohai’areo ry rahalahy, fa tambane i rahogney eo o razambeintikagneo iaby sady nitsake i riakey iareo iaby. 2 Natao badisa iareo iaby naho fa nagnorike i Mosesy, tamy iareo tambane i rahogney eoy naho nitsake i riakeỳ. 3 Nihinagne hanegne ara-pagnahy mitovy iareo iaby, 4 sady ninogne rano ara-pagnahy mitovy. Ty anto’e, ninogne tamy i lamilamy ara-pagnahy nagnorike iareoy iareo. Tsy ia ze lamilamy zay fa i Kristy. 5 Faie ndra tie eo zay, le tsy nifale tamy ty ankamaroa iareo ty Andrianagnahare, le nimatemate tam-patrambey agne iareo.
6 Andrambesantika fianaragne o raha niseho rehoe. Mila mitao tikagne mba tsy hagniry raha raty manahake iareo, 7 ndra hanjare ho mpanompo sampy manahake ty ila’e amy iareo, arake i voasoratse tihoey tie: “Nitoboke i vahoakey, le nihinagne sady ninogne. Nitsangagne iareo naho fa niavy eo mba hifalefale.” 8 Tsy toko’e hijangajanga ka tikagne, manahake ty ila’e tamy iareo nijangajanga rey, le 23 000 ty nimate tamy iareo tagnate ty andro raike. 9 Tsy toko’e hitsapa hevetse i Jehovah ka tikagne, manahake ty ila’e tamy iareo nitsapa hevetse azey, hafarà’e iareo vinono i meregne rey. 10 Tsy toko’e higneogneogne, manahake ty ila’e tamy iareo nigneogneogne rey tikagne, hafarà’e iareo vinono i mpandringagney. 11 Nanjò iareo o raha rehoe mba ho fianaragne ho antika sady nisorategne reo mba ho fampitaoagne ho antika. Tsy ia zay fa itika velogne amy ty ahavia ty fara ty tontolo toy zao.
12 Ze ndaty mihevetse ty tegna’e tie fa mitsangagne areke, le mila mitao mba tsy hotonta. 13 Tsy misy tsapa hevetse mahazo anareo naho tsy ze fa mpahazo o ndatio avao. Faie azo atokisagne ty Andrianagnahare, le tsy hienga anareo ho azo ty tsapa hevetse tsy hotante’areo. Fa naho fa misy tsapa hevetse, le hisia’e lalagne hiakara’e mba hahavita’areo hiaretse aze.
14 Ilaiso’areo areke o fanompoan-tsampio ry ragnetse teako. 15 Ndaty mahay magnambake inareo irehafakò, le afake mitsara ty raha rehafeko. 16 Tsy mandrambe soa amy i lio i Kristỳ vao tika naho fa minogne amy i kope fisaoragne isaorantikagney? Tsy mandrambe soa amy i vata i Kristỳ ka vao tika naho fa mihinagne amy i mofo tapahentikagney? 17 Raike avao i mofoy. Ndra tie maro areke tikagne, le vatagne raike avao, satria sambe mihinagne amo o mofo raike iohoe tikagne iaby.
18 Dineho’areo o Israelita arake ty nofotseo: Tsy miarake mihinagne ty raha atao sorogne amy i alitaray eo vao iareo? 19 Ino areke ty teako horehafegne? Misy dika’e vao ty raha atao sorogne hoahy o sampio? Ndra, misy dika’e vao o sampio? 20 Aha’a. Ty raha teako horehafegne areke le izao, ty raha atolo o ndaty boake amy ty firenena hafao ho sorogne, le atao iareo sorogne hoahy o demoniao fa tsy ho an’Andrianagnahare. Tsy teako naho misy raha iharoa’areo amo o demoniao. 21 Tsy afake minogne amy ty kope i Jehovah naho amy ty kope o demoniao nareo. Tsy afake mihinagne amy ty “lataba i Jehovah” naho amy ty lataba o demoniao eo ka nareo. 22 Sa ‘manao ze hahavignetse i Jehovah tikagne’? Itikagne tsy raha mahery ambone’e, sa tsy izay?
23 Azo atao ze kila raha, faie tsy ze kila raha ro mahasoa. Azo atao ze kila raha, faie tsy ze kila raha ro mampahery. 24 Tsy toko’e hipay ze hahasoa ty vata’e avao ty ndaty tsikiraidraike fa ze hahasoa ty hafa ka.
25 Hano’areo iaby ze hena avarotse a bezara ey, fa ko magnontanetane noho i feo ty fieretsereta’areoy. 26 Ty anto’e, “ahy i Jehovah ty tane toy naho ze kila raha ama’e eo.” 27 Naho misy tsy mpino manasa azo sady te handeha ho agne rehe, le hano iaby ze raha aroso’e ho azo fa ko magnontane, amy izay milamigne ty feo ty fieretsereta’o. 28 Faie naho misy mirehake ama’o tie: “Raha natao sorogne toy”, le ko mihinagne noho i ndaty nampahafantatse azoy naho noho ty feo ty fieretseretagne. 29 Tsy ty feo ty fieretsereta’o avao ty teako horehafegne amy izay, fa ty feo ty fieretsereta ty ndaty hafa ka. Fa nagnino moa i fahafahakoy ro toko’e hotsarae ty feo ty fieretsereta ty hafa? 30 Ndra tie misaotse an’Agnahare aza raho sady manan-jo hihinagne, le tsy toko’e hanao izay naho izay ty hahavy ty hafa hagnomey tsiny ahy.
31 Ndra mihinagne areke nareo ndra minogne ndra inogn’ino raha atao’areo, le anò mba hagnomeagne voninahitse an’Agnahare ze kila raha. 32 Mitaoa mba tsy hanao raha va’e hamingagne o Jiosio naho o Grikeo vaho o fiangonan’Andrianagnahareo, 33 manahake ty ikezahako mba hampifale ze kila ndaty amy ze kila raha. Izay ty ikezahako atao. Mikezake mampifale ze kila ndaty amy ze kila raha raho, fa tsy mipay ze hahasoa ty vatako avao, fa ty hahasoa ty maro mba hahavy iareo ho voavonje.