Asa o Apostolio
18 Niala ta Atena tao ty Paoly tafara izay, le niavy ta Korinto agne. 2 Nahatrea ze Jiosy atao tihoe Akoila zay reke naho fa tao. A Ponto agne ty fiavia i Akoila. Vaho niavy boake a Italia agne iareo amy i Prisila vali’e tamy izay. Ty anto’e, nandily ze Jiosy iaby mba hiala a Roma agne ty Klodio. Nandeha tamy iareo agne ty Paoly, 3 sady lelia’e nijanogne tan-tragno iareo agne naho niara-niasa tamy iareo satria nitovy ty asa iareo. Sambe mpamboatse tragnolay iareo. 4 Nanao lahajaka tamy i sinagogay agne ty Paoly isake sabata sady nandrese lahatse o Jiosio naho o Grikeo.
5 Naho fa nizotso boake a Makedonia agne ty Silasy naho i Timoty, le nifantoke tanterake tamy ty fampianaragne ty saontsin’Agnahare ty Paoly, sady nitory tamo o Jiosio mba hagnaporofoagne tie i Jesosy o Kristio. 6 Faie lava nanohetse aze naho nanivetive aze o Jiosio, hafarà’e nakopakopa’e i akanjo’e ivela’ey sady hoe reke tamy iareo: “Malio raho, fa inareo avao ro ho tompon’antoke amy ty lio’areo. Handeha amo o ndaty boake amo o firenena hafao agne areke raho manomboke amy izao.” 7 Niala ty eo reke, le nandeha tan-tragno ze lahilahy atao tihoe Titosy Josto zay ao. Mpivavake aman’Agnahare reke, le marine i sinagogay ty misy ty tragno’e. 8 Faie nanjare nino i Tompo ty Krispo, i mpifehe i sinagogaỳ naho ty ndaty iaby an-tragno ama’e ao. Maro ka ty Korintiana nino naho natao badisa naho fa naharey i talily soay. 9 Ie tamy ze halegne zay, le nirehake tamy i Paoly tamy ty alala ty fahitagne ty Tompo tie: “Ko matahotse fa mitoria avao sady ko mitsigne, 10 fa hiarake ama’o raho. Tsy hisy ndaty hikasikasike azo ka, satria maro ty ndatiko amy ty tanàgne toy eto.” 11 Le nijanogne tagne tagnate ty tao’e raike naho enem-bolagne reke mba hitory ty saontsin’Agnahare tamy iareo.
12 Tamy ty fotoagne naha gorvernoram-paritse i Galio tamy ty faritse i Akaia, le niharo hevetse o Jiosio mba hanoheragne i Paoly, le nindese iareo tamy i toeragne fitsaragney agne reke, 13 sady hoe iareo: “Ty lahy toy mandrese lahatse o ndatio mba hivavake aman’Agnahare faie mifanohetse amy i lalànay ty raha atoro’e.” 14 Faie naho fa ho nirehake ty Paoly, le nirehake tamo o Jiosio ty Galio tie: “Naho toe nanao raha raty ndra nandika lalàna vata’e ty lahilahy tiagne, le vognogne hitsanogne anareo hatrake am-para’e raho. 15 Fa naho aly hevetse miomba ty rehake naho ty agnaragne vaho i lalàna’areoy, le alamino’areo agne. Izaho tsy hitsara izay.” 16 Le rinoa’e hiala i toeragne fitsaragney iareo. 17 Hafarà’e tsinepa iareo ty Sostena, i mpifehe i sinagogaỳ, le jinera iareo taloha i toeragne fitsaragney eo. Faie le mbe tsy nizilike tamy ze raha rezay avao ka ty Galio.
18 Ndra tie teo ze raha rezay, le nijanogne andro tsiampeampe tagne ty Paoly. Nanao veloma i rahalahy rey reke tafara izay, le nandeha sambo mba Siria mbeo iareo amy i Prisila naho i Akoila. Nampagnitsife’e fohe i volo’ey naho fa niavy ta Kenkrea ao reke, satria nisy vava natao’e. 19 Naho fa niavy ta Efesosy agne iareo, le nenga’e tao iareo fa ireke nizilike tamy i sinagogay ao sady nandrese lahatse o Jiosio. 20 Ndra tie nangatahe iareo mba hijanogne elaela tao aza reke, le tsy nimete. 21 Faie nifanao veloma iareo, le nirehake tamy iareo reke tie: “Hiheregne ama’areo atoy indraike raho naho zoton’arofo i Jehovah.” Nandeha sambo boake a Efesosy ao reke, 22 le nizotso mba Kaisaria mbeo. Niakatse boake agnate sambo ao reke, le nanalama i fiangonagney, naho fa niavy eo nizotso mba Antiokia mbeo.
23 Nijanogne kedekede tagne hey reke vaho izay nandeha nagneneke ty faritse i Galatia naho i Frijia, le nampahery ze mpianatse tagne.
24 Nisy Jiosy raike atao tihoe Apolosy zay, niavy ta Efesosy ao. A Aleksandria agne ty fiavia’e. Nahay nanao lahajaka reke sady nahay soa ty Soratse Masigne. 25 Nampianaregne ty lala i Jehovah o lahilahy iohoe. Maregne ty fampianaragne nirehafe’e miomba i Jesosy satria narehe i fagnahỳ reke. Faie ty badisa i Jaona avao ro nifanta’e. 26 Le nanomboke nitory tamy i sinagogay ao reke sady tena tsy natahotse naho fa nanao izay. Naho fa naharey aze ty Prisila naho i Akoila, le nente iareo niarake tamy iareo ty Apolosy, sady vao mainke nihazavae iareo soa tama’e ty lalan’Agnahare. 27 Nite handeha ta Akaia agne ty Apolosy, le nanoratse hoahy ty mpianatse agne o rahalahio mba handrisihagne iareo handrambe aze soa. Naho fa niavy agne reke, le tena nampea’e soa o ndaty nanjare mpino noho ty hasoa fagnahy miambake nasehon’Agnahareo. 28 Tena nafana fo reke naho fa nagnaporofo tagnatreha o ndatio eo tie diso o Jiosio. Natoro’e iareo boake amy ty Soratse Masigne ao fa i Jesosy ro Kristy.