Talily Soa Nisorate i Jaona
16 “Nirehafeko tama’areo ze raha rezay, amy izay nareo tsy miala amako.* 2 Horoahe o ndatio hiala amy i sinagogay ao nareo. Mbe ho avy aza ty fotoagne* hihevera ze ndaty mamono anareo tie manao fanompoagne masigne ho an’Andrianagnahare reke naho fa manao izay. 3 Faie ty anto’e hanoa iareo o raha rehoe, le noho iareo mbe tsy mahafantatse i Rae sady tsy mahafantatse ahy. 4 Faie ndra tie eo zay, le rehafeko ama’areo o raha rehoe, amy izay naho fa avy ty fotoagne isehoa’e, le hotsiaro’areo tie fa nirehafeko tama’areo o raha rehoe.
“Tsy nirehafeko tama’areo hey ze raha rezay tamy ty voaloha’e, satria raho mbe tama’areo teo. 5 Fa handeha amy i nagnirake ahỳ agne raho hinane zao, faie tsy misy ama’areo magnontane ahy tie: ‘Hombaia iheo?’ 6 Faie malahelo ty fo’areo satria nirehafeko tama’areo o raha rehoe. 7 Faie rehafeko ama’areo, fa hahasoa anareo ty fandehanako. Ty anto’e, naho tsy mandeha raho, le tsy ho avy ama’areo atoy i mpagnampey. Fa naho mandeha raho, le hiraheko ama’areo atoy reke. 8 Naho fa avy reke, le hagnomey porofo maharese lahatse amy ty tontolo toy miomba ty fahotagne naho ty hamaregnagne vaho miomba ty fitsaragne. 9 Voaloha’e, hagnomey porofo miomba i fahotagney reke satria tsy mino ahy iareo. 10 Naho fa avy eo reke, hagnomey porofo miomba i hamaregnagney satria handeha amy i Rae agne raho, le tsy hotrea’areo sasa. 11 Naho fa avy eo ka reke hagnomey porofo miomba i fitsaragney, satria fa nitsaraegne i mpitondra ty tontoloy toỳ.
12 “Mbe maro ty raha toko’e horehafeko ama’areo faie tsy hotaka’areo zay naho rehafeko amy izao. 13 Faie naho fa avy reke, ndra i fagnahy ty hamaregnagney, le hitari-dalagne anareo mba hoazo’areo soa ty hamaregnagne iaby. Ty anto’e, tsy ty heve’e manokagne ro horehafe’e fa ze raha rei’e ro horehafe’e. Hambara’e anareo ka ty raha mbe ho avy. 14 Hagnomey voninahitse ahy reke satria hambara’e anareo ze raha nirei’e tamako. 15 Ze raha iaby ahy i Rae, le ahike. Izay ty mahavy ahy mirehake tie, hambara’e anareo ze raha nirei’e tamako. 16 Kedekede ty sisa, le tsy hahatrea ahy sasa nareo. Faie naho fa afake kedekede ka, le hahatrea ahy indraike nareo.”
17 Le nifampirehake ty ila’e amy i mpiana’e rey tie: “Ino ty tea’e horehafegne amy tihoe: ‘Kedekede ty sisa, le tsy hahatrea ahy sasa nareo. Faie naho fa afake kedekede ka, le hahatrea ahy indraike nareo’, naho i reha’e tihoey tie, ‘satria raho handeha amy i Rae agne’?” 18 Nifampirehake areke iareo tie: “Ino ty tea’e horehafegne amy tihoe, ‘kedekede ty sisa’? Tsy fantantikagne ty raha tea’e horehafegne.” 19 Nihay i Jesosy tie te hagnontane aze iareo. Hoe areke ty Jesosy tamy iareo: “Nagnino nareo ro mifagnontane amy i rehako tihoey tie: ‘Kedekede ty sisa, le tsy hahatrea ahy sasa nareo. Faie naho fa afake kedekede ka, le hahatrea ahy indraike nareo’? 20 Volagneko ama’areo to vata’e, fa halahelo naho hitagny nareo, fa ty tontolo toy ho fale. Ho ore nareo faie hivalike hafaleagne ze haorea’areo zay. 21 Manaintaigne ty ampela raike naho fa mitsongo satria fa marine ty fotoagne hiteraha’e. Faie naho fa terake reke, le haligno’e i haorea’ey noho ty hafalea, satria misy ajaja naterake ty amy ty tontolo toy eto. 22 Malahelo ka nareo tie amy izao. Faie naho fa hahatrea anareo indraike raho, le ho fale nareo sady tsy hisy ndaty hahavita hagnafake ze hafalea’areo zay. 23 Tsy hagnontane ahy sasa ka nareo amy ze andro zay. Volagneko ama’areo to vata’e, fa ndra inogn’ino raha angatahe’areo amy i Rae, le homea’e anareo zay amy ty agnarako. 24 Faie hatrake amy izao nareo, le mbe tsy nisy raha nangatahe’areo amy ty agnarako. Mangataha areke, le hahazo nareo, amy izay ho feno ty fifalea’areo.
25 “Nampiasa fagnoharagne raho naho fa nirehake o raha rehoe tama’areo. Faie ho avy ty fotoagne* tsy hampiasako fagnoharagne sasa naho fa mirehake ama’areo, fa le avy le habejako ama’areo ty miomba i Rae. 26 Amy ze andro zay nareo, le hangatake amy i Rae amy ty agnarako. Faie tsy midika zay tie, iraho ty hangatake raha ho anareo ama’e. 27 Ty anto’e, tena tea i Rae nareo satria nareo tea ahy ka sady mino tie, solontegnan’Andrianagnahare raho. 28 Niavy amy ty tontolo toy eto raho mba ho solontegna i Rae. Hiala amy ty tontolo toy eto raho hinane zao, le handeha amy i Rae agne.”
29 Hoe i mpiana’e rey tama’e: “Tsy nampiasa fagnoharagne sasa ihe hinaneo fa le avy le nabeja’o ty raha tea’o horehafegne. 30 Hai’ay hinane zao fa mahay ze kila raha rehe sady tsy misy ndaty mila magnontane azo. Izay ty mahavy anay mino tie boake aman’Agnahare rehe.” 31 Hoe ty navale i Jesosy iareo: “Mino nareo hinane zao? 32 Ho avy ty fotoagne hilaisa’areo tsikiraidraike amy ty tragno’areo agne iaby, le henga’areo raike raho. Fa marine ze fotoagne zay. Faie tsy ho irerike raho satria miarake amako ty Rae. 33 Nirehafeko tama’areo o raha rehoe, amy izay nareo hahazo fiadagnagne amy ty alalako. Hoazon-kaoreagne nareo amy ty tontolo toy eto. Faie manàgna herim-po satria iraho fa nandrese ty tontolo toy!”