Talily Soa Nisorate i Lioka

8 Ie tsiela tafara izay, le nandeha an-drova naho t’ambanevohitse agne ty Jesosy mba hitory i talily soa miomba i Fanjakàn’Andrianagnahareỳ. Niarake tama’e i 12 lahy rey, 2 naho ty ampela ila’e fa nisitragne’e tamy ty arete’e sady niroahe’e ty demonia tama’e. Agnisa izay ty Maria Magdalena i nisy demonia fitoy, 3 i Johana valy i Koza i mpiandraikitse ty tragno i Heroday, i Sosana naho ty ampela maro hafa nampiasa ty fanagna iareo mba hikarakaragne i Jesosy naho i mpiana’e rey.

4 Naho fa nivory tama’e teo i vahoake rey naho i ndaty niarake tama’e boake amy ty tanàgne sambe hafa rey, le nirehake fagnoharagne tamy iareo reke. 5 Hoe reke: “Nisy mpambole raike nandrarake* tabiry. Naho fa nandrarake i tabiry rey reke, le ty ila’e nipoke tan-dalagne ey. Niliàlià o ndatio i tabiry rey sady nihane o vorogneo naho fa nitrea iareo. 6 Ty ila’e tamy i tabiry rey nipoke tamy ty lamilamy. Ie naho fa nitiry reke, le nimaike naho fa niavy eo satria tsy nisy rano hotrohe i vaha’ey. 7 Ty ila’e amy i tabiry rey ka nipoke tamy ty tane feno raha mitiry misy fatipatike. Nitiry reketse i tabiry rey i raha mitiry misy fatipatike rey, le namehefehe aze. 8 Fa ty ila’e nipoke tamy ty tane soa. Naho fa nitiry i tabiry rey, le namokatse. Ty ila’e amy i tabiry rey ohatse namokatse 100.” Naho fa boake nirehake o raha rehoe ty Jesosy, le nirehake mafe tihoe: “Ho anareo ze afake mitsanogne, le mitsanogna soa.”

9 Faie nagnontenea i mpiana’e rey aze ty dika i fagnoharagney. 10 Le hoe reke: “Inareo ro nengagne hahazo ty heve ty raha mietake masigne miomba i Fanjakàn’Andrianagnaharey, fa o ndatio fagnoharagne ty irehafagne aze ama’e, amy izay iareo magnente faie tsy mahatrea, le maharey ka faie tsisy raha rendre’e. 11 Izao areke ty dika i fagnoharagney: I tabiry rey le ty saontsin’Agnahare. 12 I tabiry nipoke tan-dalagne ey rey, le ze ndaty maharey i saontsin’Agnaharey, faie afaha i Devoly am-po’e ao i saontsin’Agnaharey, amy izay reke tsy mino sady tsy ho voavonje. 13 I tabiry nipoke tamy ty lamilamy tey rey, le ze ndaty maharey ty saontsin’Agnahare sady mandrambe aze am-pifaleagne faie tsy mamahatse ama’e ao i saontsin’Agnaharey. Tsielatsiela avao areke ty ninoa iareo aze, le naho fa nisy fitsapagne nahazo iareo, le tsy nino sasa iareo. 14 I tabiry nipoke tamy ty tane feno raha mitiry misy fatipatike rey, le ze maharey ty saontsin’Agnahare faie ty finekoneko naho ty harena vaho ty fahafinaretagne amy ty fiaignagne ro mamehefehe iareo, hafarà’e tsy mahavagnom-boa. 15 I tabiry nipoke tamy ty tane soa rey, le ze ndaty tena soa fo. Naho fa maharey i saontsin’Agnaharey iareo, le rambese iareo am-po. Mamoa ka iareo sady miaretse.

16 “Tsy misy ndaty mamelogne jiro, le handomboke aze amy ty bole ndra hanao aze ambane fandreagne ao. Fa tsy maintsy hatao’e amy i fisiagne azey eo i jiroy, amy izay mahatrea i hazavagney ze ndaty mizilike amy i efetsey ao. 17 Tsy misy raha mietake tsy habaribary zao, le tsy misy raha soa haja lelia’e tsy hotrea ndra lelia’e tsy hofantatse zao. 18 Mitaoa soa areke nareo naho fa mitsanogne, satria ze managne le vao mainke homeagne maro, fa ze tsy managne le ndra ze kede anagna’e aza mbe halaegne ama’e ka.”

19 Niavy mba hagnente i Jesosy ty rene’e naho i rahalahi’e rey faie tsy niafake nimbama’e mbeo satria nimaro loatse i ndatỳ. 20 Nisy ndaty areke nirehake tamy i Jesosy tie: “Ao ty rene’o naho i rahalahi’o rey mitsangagne an-tane ao te hahatrea azo.” 21 Faie hoe ty navale i Jesosy iareo: “Ty ndaty mitsanogne ty saontsin’Agnahare naho magnorike aze retoa ro reneko naho rahalahiko.”

22 Nijogne agnate lakagne ty Jesosy naho i mpiana’e rey tie indraike zay, le hoe reke tamy iareo: “Andao tika ho a moro’e raike eroy.” Le nandeha iareo. 23 Faie naho fa nandeha iareo, le niazon-droro ty Jesosy. Nisy tiobey tampoke ty tan-drano ey, le nanomboke nifeno rano i laka iareoy sady fa ho nilenteke. 24 Nandeha mbamy i Jesosy mbeo areke iareo mba hamoha aze. Hoe iareo: “O Mpagnanatse, Mpagnanatse, homate tika!” Le nitsangagne ty Jesosy sady nikomandie’e i tiokey naho i rano nivalitaboakey, le avy le nipendregne. 25 Hoe reke tamy iareo naho fa niavy eo: “Nimbaia ty finoa’areo?” Faie tena natahotse naho nigaga iareo, le nifampirehake tihoe: “Ia maregne ty ndaty toio rikiahe? Aia ndra o tiokeo naho o ranò naho fa komandie’e, le magnorike ty reha’e!”

26 Le nitoly tamy ty faritse nisy o Gerasianao ey iareo. Manandrife i Galelia ty misy o faritse iohoe. 27 Naho fa nizotso boake agnate i lakagney ao ty Jesosy, le nisy lahilahy raike nisy demonia boake amy i tanàgney eo zay nifanampe ama’e. Fa ela o lahilahy iohoe ro tsy niakanjo sady tsy nipetrake an-tragno reke fa tan-kibory ey avao. 28 Naho fa nahatrea i Jesosy reke, le nikorakorake sady niankohoke tagnatreha’e eo. Nirehake mafe ka reke tie: “Ino ty idira’o amy ty aferako Jesosy, Ana i Andrianagnahare Fara’e Amboney? Mihalale ama’o raho mba tsy hampijale ahy.” 29 (Ty anto’e, nikomandie i Jesosy i demoniay mba hiakatse amy i lahilahỳ ao. Fa ela o demonia iohoe ro tama’e tao. Mateteke ka ro nirohizagne seny ty tagna’e naho ty tombo’e sady nisy ndaty nampiambenegne aze. Faie tinapatapa’e i seny narohy aze rey, le nindese i demoniay amy ty toeragne mitokagne agne reke.) 30 Nagnontane aze ty Jesosy tie: “Ia ty agnara’o?” Le hoe reke: “I Legiona.” Ty anto’e, maro ty demonia tama’e tao. 31 Le nihalale tamy i Jesosy iareo mba tsy halefa’e amy i lavake tsikeokeokey agne. 32 Nisy lambo maro nandrazegne rezay ty tamy i vohitsey eo. Nihalale tamy i Jesosy i demonia rey mba hengagne hizilike amy i lambo rey ao, le neke’e i fangataha iareoy. 33 Niakatse tamy i lahilahỳ ao areke i demonia rey, le nizilike tamy i lambo rey ao. Nirifatse ty lay i lambo rey, le nitonta tamy ze hatsagne zay, le nivarigne tamy i ranoy agne. 34 Naho fa nahatrea ze raha niseho zay i mpiara-dambo rey, le nilay mba hitalily amy ty ndaty an-tanàgne ao naho amy ty faritse magnodidigne ey.

35 Nandeha mbeo areke o ndatio mba hagnente ze raha niseho zay. Ie naho fa niavy tamy i Jesosy eo iareo, le nahatrea i lahilahy nisy demoniay nitoboke tan-tombo i Jesosy eo. Fa niakanjo reke tamy izay sady fa niaregne ka ty sai’e. Nanjare natahotse areke i ndaty rey. 36 Ze nahatrea i raha nisehoy, le nitalily tamy iareo ty fomba nahasitragne i lahilahy nisy demoniay. 37 Nangatake tamy i Jesosy areke i ndaty maro boake amy ty faritse nisy o Gerasianao rey mba hiala i faritse misy iareoy, satria tena natahora iareo reke. Nandeha mbamy i lakagney mbeo areke ty Jesosy. 38 Faie nihalale mafe tama’e i lahilahy nisy demoniay mba henga’e hiarake ama’e, faie tsy nimete ty Jesosy sady hoe reke tamy i lahilahỳ: 39 “Akia rehe molia, le tantarao amo o ndatio ze raha nataon’Andrianagnahare tama’o.” Nandeha areke i lahilahỳ, le natalili’e tamy ty ndaty nagneragne i tanàgney ty raha natao i Jesosy tama’e.

40 Naho fa niheregne a Galelia agne ty Jesosy, le nirambese i vahoakey soa reke satria fa nandigne aze iareo iaby. 41 Faie nisy lahilahy raike mpifehe o sinagogao zay nimbama’e mbeo. I Jairo ty agnara’e. Niankohoke tan-tombo i Jesosy eo reke sady nihalale aze mba handeha an-tragno’e agne. 42 Ty anto’e, narare fa ho mate ty anak’ampela’e bakotokagne. Roe amby folo taogne o anak’ampela’e iohoe.

Naho fa nandeha ty Jesosy, le nifanisike tama’e eo i vahoakey. 43 Nisy ampela raike zay niazo ty lio lava tagnate ty 12 taogne. Tsy nisy ndaty nahavita nagnasitragne o arete’e iohoe. 44 Niharine i Jesosy boake afara’e ao reke, le nitsapae’e i ramborambo i akanjo i Jesosỳ, le avy le nijanogne i lio nandeha ama’ey. 45 Le hoe ty Jesosy: “Ia nitsapa ahio?” Faie nandietse iaby i ndaty rey, le hoe ty Petera: “O Mpagnanatse, ty hamaro o ndaty magnodidigne azo naho mifanisike ama’o eò vao le mbe agnontenea’o izaio.” 46 Faie hoe ty Jesosy: “Nisy ndaty nitsapa ahy ty teo, satria tsapako tie nisy hery niala ty tamako.” 47 Nihay i ampelay tie nisy nahatrea i raha natao’ey, le nandeha mbamy i Jesosy mbeo reke sady nihondrahondra. Niankohoke tamy i Jesosy eo reke, le nambara’e tagnatreha o ndatio eo iaby ty anto’e nitsapà’e i Jesosy naho ty nahavy aze le avy le nisitragne. 48 Faie hoe ty Jesosy tama’e: “Ty finoa’o ro nahasitragne azo anake. Akia mandehana, le ko minekoneko sasa.”

49 Tamy i Jesosy mbe nirehakey, le nisy irake boake an-tragno i mpifehe sinagogay agne niavy. Le hoe reke tamy i Jairo: “Fa nimate anio i anak’ampela’oy. Ko sahiragnegne sasa o Mpagnanatseo.” 50 Naho fa naharey izay ty Jesosy, le hoe ty navale’e: “Ko matahotse fa managna finoagne avao, le hoavotse reke.” 51 Naho fa niavy tan-tragno agne reke, le tsy nisy ndaty nenga’e hizilike tao naho tsy i Petera, i Jaona, i Jakoba naho i Jairo mirovaly avao. 52 Faie nitagny iaby i ndaty rey sady nijerajera ty aragna’e noho ty alahelo iareo i ajajay. Le hoe ty Jesosy: “Ko tomagny nareo, satria tsy raha mate o ajajao fa miroro.” 53 Le nihehea iareo ty Jesosy, satria nihay iareo tie fa mate i ajajay. 54 Nirambese i Jesosy ty tagna i ajajay sady hoe reke tama’e: “O pelake, mifohaza!” 55 Le niheregne ty fiai’e sady le avy le nifoha reke. Nirehafe i Jesosy ka iareo mba hagnomey aze raha hohane’e. 56 Tsy nisy hoe’e ty nihafalea i rae aman-drene’e rey naho fa nahatrea izay. Faie rinara i Jesosy iareo mba tsy hirehadrehake ndra amy ia ndra amy ia i raha nisehoy.