Taratasy Voaloha’e Hoahy o Korintianao

13 Naho mirehake amy ty fireha o ndaty naho amy ty firehan’anjely raho, faie tsy managne hatea, le hanahake ty fagneno o sabao ndra hanahake ty fagneno o kantsigneo avao. 2 Naho managne fahaiagne maminany raho sady mahatakatse ze raha mietake masigne naho managne ze fahalalagne iaby sady naho managne ze hene finoagne iaby, le mahavita mamindra vohitse, faie tsy manan-katea, le tsy misy dika’e raho. 3 Ndra tie aviliko iaby aza ty fanagnako mba hagnomeagne hanegne ty hafa, sady ndra tie hataoko sorogne aza ty vatako mba hireharehako, faie tsy managne hatea raho, le tsy misy soa azoko boake amy izay.

4 Ty hatea le manam-paharetagne naho soa fagnahy. Ty hatea tsy mialogne. Ty hatea tsy mirehareha, tsy rengevoke, 5 tsy manao raha mahamegnatse, tsy mipay ze hahasoa ty vata’e, tsy tsiela boseke, tsy mitagne am-po. 6 Tsy mifale noho ty tsy hamaregnagne, fa mifale noho ty hamaregnagne. 7 Ty hatea mandefetse ze kila raha, mino ze kila raha, mitama ze kila raha, miaretse ze kila raha.

8 Tsy ho levogne nainai’e ty hatea. Faie ndra tie misy aza ty fahaiagne maminany, le hofoagne zay. Ndra tie misy aza ty fahaiagne mirehake amy ty firehake sambe hafa, le tsy hitohy avao zay. Ndra tie misy aza ty fahalalagne, le hofoagne zay. 9 Ampaha’e avao ty fahalalagne anagnantika, le ampaha’e avao ka ty faminaniagne ambarantika. 10 Faie naho fa avy i fenoy, le hofoagne i ampaha’ey. 11 Tamy iraho mbe niajaja, le nirehake manahake o ajajao, nieretseretse manahake o ajajao, nanao ty fisaigna o ajajao. Faie amy iraho fa bey hinane zao, le nialako ty raha fatao o ajajao. 12 Amy izao, le manjavonjavogne ty raha treantika manahake ty magnente amo o fitaratse manjavonjavogneo. Faie amy ty hoavy, le hazava soa ty raha treantika manahake tihoe mifagnatreke mivantagne. Amy izao, le ampaha’e avao ty fahalalagne anagnako. Faie amy ty hoavy, le hanagne fahalalagne feno* raho manahake ty ahafantaran’Agnahare ahy soa. 13 Faie ndra tie eo zay, le mbe eo ty raha telo retoa: Finoagne, fanantenagne naho hatea. Faie ty hatea ro fara’e lahibey amy iareo.